43
Lohiabada sibona be Israela ena Hamauria Tauna
1 Israela e, Lohiabada,
umui ia havaraia vadaeni Diravana ese ia gwau,
“Do umui gari lasi,
lau ese umui do lau hamauria.
Lau ese umui emui ladana lau atoa vadaeni,
umui be lauegu.
2 Ranu dobuna umui hanaia gwauraia neganai,
lau be umui danu do lau noho.
Umui emui laloa hekwarahi ese,
umui do idia hadikaia ore lasi.
Lahi umui hanaia gwauraia neganai,
ena siahu ese umui do ia gabua lasi.
Hisihisi aukadia umui dekenai idia mai ese,
umui do idia hadikaia lasi.
3 Badina lau be Lohiabada, emui Dirava.
Lau be Israela ena Dirava Helagana,
lau ese umui lau hamauria noho.
Umui do lau hamauria totona,
Aigupito lau negea vadaeni,
emui mauri ena davana unai.
Bona umui do lau hamauria totona,
Etiopia bona Seba lau negea vadaeni,
emui mauri ena davana.
4 Badina be umui emui davana be bada herea lau dekenai.
Lau ese umui lau matauraia noho,
bona umui lau ura henia noho.
Unai dainai bese idauidau momo do lau negea,
umui do lau hamauria totona.
5 Do umui gari lasi,
badina lau be umui danu lau noho.
Dina daekau kahana momokani,
bona dina diho kahana momokani dekena amo,
lau ese emui bese taudia do lau hakaua mai,
emui gabu korikori dekenai.
6 Mirigini kahana taudia do lau hamaoroa, lau gwau,
‘Lauegu bese taudia do umui dogoatao lasi.’
Bona diho kahana taudia danu do lau hamaoroa, lau gwau,
‘Lauegu bese taudia do umui koua lasi.’
Lau ura egu bese taudia ese,
daudau tanodia dekena amo do idia giroa mai,
tanobada ena kahana ibounai dekena amo.
7 Idia be lauegu bese korikori.
Lau ese idia lau havaraia,
idia ese lau do idia hanamoa,
bona egu ladana do idia abia isi totona.”
Israela be Lohiabada ena uitnesi taudia
8 Dirava ia gwau,
“Lauegu bese be kota totona do umui boiridia.
Idia be mai edia matana,
to idia itaia diba lasi.
Idia be mai edia taiana,
to idia kamonai diba lasi.
9 Bese idauidau be kota totona do umui boiridia mai.
Edia dirava edia huanai,
daika ese gabeai do idia vara gaudia idia gwauraia diba?
Edena idau bese dirava ese,
harihari idia vara noho gaudia ia perovetalaia guna?
Inai dirava koikoidia ese,
edia uitnesi taudia do idia mailaia,
bona bema idia be maoro,
namona be edia maoro do idia hamomokania.
To kota lalonai idia hereva diba unai edia dirava be maoro bona momokani, a?
Lasi momokani.
10 Israela taudia e,
umui be lauegu hereva hamomokania taudia.
Lau ese umui lau abia hidi,
egu hesiai gaukara do umui karaia totona,
bona lau do umui diba,
bona lau do umui abidadama henia totona.
Bona do umui diba,
lau sibona be Dirava,
badina be dirava ta lasi ese lau ia gunalaia,
bona lauegu murinai danu,
dirava ta do ia hedinaraia lasi.
11 “Lau inai,
lau sibona be Lohiabada.
Lau sibona be Hamauria Tauna,
hamauria tauna ma ta be lasi.
12 Lau ese dohore idia vara gaudia lau gwauraia guna,
bona unai murinai umui durua totona lau mai.
Bese idauna ta ena dirava ta ese,
nega ta unai bamona ia karaia lasi,
bona umui be lauegu hereva hamomokania taudia,
umui gwauraia noho, lau be Dirava.
13 Oibe, bona nega gunaguna dekena amo lau be Dirava.
Lauegu siahu dekena amo,
ta ese ia heau mauri diba lasi,
bona kara ta lau karaia neganai,
ta ese unai kara ia haidaua diba lasi.”
Babulonia dekena amo heau mauri
14 Israela ena Dirava Helagana,
umui ia hamauria noho Lohiabada ese ia hereva, ia gwau,
“Umui do lau hamauria totona,
tuari taudia Babulonia dekenai do lau siaia.
Lau ese Babulonia hanua ena magu iduara do lau makohia,
bona Babulonia taudia edia tuari boiboi,
be taitai sibona do lau halaoa.
15 Lau be Lohiabada,
emui Dirava Helagana.
Lau ese Israela lau havaraia,
bona lau be emui King.”
16 Gunaguna, Lohiabada ese davara lalonai dala ta ia karaia.
Davara ena hurehure badadia lalonai,
taunimanima edia raka dalana ta ia karaia.
17 Bona Lohiabada ese tuari oreana badana,
be mase bona dika dekenai ia hakaua.
Unai tuari oreana be mai kariota bona hosi danu.
Idia be idia moru diho,
idia toreisi lou diba lasi.
Idia be idia bodo,
lahi ena gida ia bodo bamona.
18 To Lohiabada ia gwau,
“Kara gunadia do umui laloa noho lasi.
Nega gunadia do umui laloa momo lasi.
19 Kamonai!
Kara matamata be do lau karaia.
Inai kara be harihari ia vara noho,
umui itaia diba, ani?
Lau ese taunimanima idia noho diba lasi tanona dekenai,
dala ta do lau karaia,
bona tano kaukau dekenai,
sinavai do lau havaraia.
20 Oibe, uda boromadia ese lau do idia hanamoa,
uda sisia bona kokokoko ese danu.
Badina be nadi kavakava gabuna dekenai,
ranu do lau havaraia,
bona tano kaukau dekenai danu sinavai do lau atoa,
egu abia hidi bese durua totona.
21 Bese be unai, lau karaia vadaeni,
lauegu taudia inai,
bona idia ese ane dekenai,
egu ladana do idia hanamoa!”
Israela ena kara dika
22 Lohiabada ia gwau,
“To Israela e,
oi ese lau oi tomadiho henia lasi,
lau dekenai oi hesiku vadaeni.
23 Umui ese emui mamoe,
be lau dekenai umui mailaia lasi,
do umui gabua totona.
Emui boubou gaudia dekena amo lau umui hanamoa lasi.
Lau ese boubou karadia umui dekena amo lau noia lasi,
unai be metau umui dekenai dainai,
bona bonana namo muramura danu lau noia lasi,
do umui hesiku garina.
24 Umui ese bonana namo muramura,
be lau totona umui hoia lasi,
o emui boromakau edia digara dekena amo,
davana lau dekenai umui henia lasi.
To emui kara dika dekena amo,
umui ese lau dekenai metau umui henia,
bona emui kerere momo dainai,
lau be lau hesiku vadaeni.
25 “To kamonai!
Lau be emui kara dika lau gwauatao Diravana,
bona inai bamona lau karaia noho lauegu ladana dainai.
Lau ese umui emui kara dika do lau laloa noho lasi.
26 “Namona be kota dekenai,
do ita herevalaia!
Emui samania hereva do umui gwauraia!
Emui hereva do umui gwauraia,
emui kara be maoro do umui hamomokania totona.
27 Emui tubuna gunana momokani ese ia kara dika.
Emui gunalaia taudia danu ese lau dekenai idia kara dika.
28 Emui lohia taudia ese lauegu Dubu Helaga idia hamiroa.
Unai dainai Israela lau hadikaia vadaeni.
Lauegu bese korikori lau durua lasi dainai,
idau bese ese umui idia hadikaia,
mai emui hemarai danu.”