47
Dirava ese Babulonia do ia panisia
1 Lohiabada ia gwau,
“Babulonia e, oiemu terona dekena amo do oi diho.
Tano ena kahu dekenai do oi helai.
Guna oi be rami hebou kekeni bamona.
Tau ta ese oi dekena amo ia kwalimu lasi.
To oi be tauanina manadamanada,
bona mai hairaina do oi noho lou lasi.
Hari oi be hesiai mai guia danu hahine sibona!
2 Nadi metaudia do oi abia,
uiti do oi moia patapata.
Oiemu vairana koua muko do oi kokia.
Oiemu dabua namodia do oi kokia!
Oiemu rami do oi abia isi,
sinavai do oi raka hanaia.
3 Oi be rami lasi neganai,
taunimanima ese oi do idia itaia,
oiemu hemarai do ia hedinaraia.
Emu dika ena davana do lau henia.
Emu taunimanima ta do lau bogahisihisi henia lasi.”
4 Israela ena Dirava Helagana ese ita ia hamauria noho.
Iena ladana be Siahu Ibounai Lohiabada.
5 Lohiabada ese Babulonia ia hamaoroa, ia gwau,
“Regena lasi do oi helai, dibura gabuna lalonai,
badina be basileia edia lohia hahine,
be oi do idia gwauraia lou lasi.
6 Egu bese taudia lau badu henidia.
Egu bese korikori taudia lau panisidia.
Oiemu siahu ena henunai lau atodia.
Oi ese oi bogahisihisi henidia lasi.
Buruka taudia danu oi ese oi hadikaia.
7 Oi gwau, ‘Lau be lohia hahine hanaihanai.’
Oiemu kara egu bese taudia dekenai oi laloa lasi,
bona inai kara dainai,
dahaka do ia vara danu oi laloa lasi.
8 “Unai dainai,
moale oi ura henia hahine e,
inai hereva do oi kamonai:
Oi helai namonamo noho, bona oi gwau,
‘Lau be bada, Dirava bamona,
ta be lau hegeregerena lasi.
Lau be do lau vabu lasi,
bona egu natuna ta do ia mase lasi.’
9 To inai gaudia rua be oi dekenai do idia ginidae,
nega tamona dekenai,
dina tamona dekenai.
Momokani oiemu meamea karadia be momo,
oiemu puripuri karadia danu be mai siahu danu,
to oiemu adavana bona oiemu natuna danu do idia mase.
10 “Oiemu kara dika lalonai oi noho namonamo,
gari ta lasi, ma oi gwau,
‘Ta ese lau ia itaia lasi.’
Oiemu aonega bona oiemu laloa kehoa ese oi idia hakaua kerere,
bona oiemu lalona dekenai oi gwau,
‘Lau be bada, Dirava bamona,
ta be lau hegeregerena lasi.’
11 To dika be oiemu latanai do ia ginidae,
bona oiemu meamea ta ese,
unai dika do ia koua diba lasi.
Ala-ala be oi dekenai do ia diho haraga,
ena davana do oi henia diba lasi gauna,
bona oi diba lasi dikana ta ese,
karaharaga oi do ia hadikaia ore.
12 Oiemu puripuri bona oiemu meamea karadia do oi karaia noho,
oiemu kekeni dinadia dekena amo oi karaia goada gaudia.
Bona sedira edia anina do idia vara,
sedira taunimanima haida do oi hagaria.
13 Oiemu sisiba henia taudia be momo,
to oi dekenai goada idia henia lasi.
Oiemu hisiu tahua taudia,
hisiu edia dala idia itaia noho taudia,
namona be idia ese oi do idia durua, bona oi do idia hamauria.
Idia ese hua matamata negadia ibounai,
oi dekenai idia hamaoroa,
dahaka gaudia be oi dekenai do idia vara.
14 “To inai hisiu tahua taudia,
be rei kaukau hegeregerena do idia lao.
Lahi ese idia do ia gabua ore.
Lahi ena hururuhururu dekena amo,
be idia sibodia do idia roho mauri diba lasi.
Badina be inai lahi be idau,
gida namona gauna lasi,
o iena badibadinai oi helai namonamo gauna lasi.
Lasi, inai lahi ese ibounai do ia gabua ore momokani.
15 Inai tau ibounai be,
oiemu kekeni negana dekena amo oi danu idia gaukara hebou taudia,
to idia edia durua be anina lasi momokani oi dekenai.
Idia ese oi do idia rakatania,
ta ta edia dala, edia dala dekenai do idia lao,
bona oi hamauria totona tauna ta do ia noho lasi.”