57
Isaia ese kaivakuku tomadiho henia kara ia gwau henia
1 Kara maoromaoro tauna ia mase neganai,
tau ta ese ia laloa noho lasi.
Dirava idia matauraia noho taudia idia mase noho,
to inai kara ena anina be tau ta ia diba lasi.
Inai kara maoromaoro taudia,
be hisihisi gaudia dekena amo,
Dirava ese ia abidia siri noho,
2 bona idia be maino dekenai idia vareai noho.
Inai kara maoromaoro taudia,
be edia mahuta patadia latanai laga-ani idia abia noho.
3 To umui,
meamea hahine ena natudia tau,
heudahanai tauna bona ariara hahine ese idia havaraia taudia e,
umui do lau kota henia totona do umui raka mai!
4 Umui be daika umui hevaseha henia noho?
Umui be daika umui hereva dika henia noho?
Daika dekenai umui kirikirilaia,
bona emui malana umui toia henia?
Umui be dagedage bona koikoi taudia edia natudia lasi, a?
5 Umui ese ouki audia edia henunai,
mai matabodaga danu emui dirava koikoi umui tomadiho henia noho.
Umui ese,
emui natudia be koura lalonai,
boubou totona umui alaia mase noho,
nadi kohua lalonai danu, ani?
6 Koura dekenai nadi manadamanada umui abia,
bona idia be emui dirava dainai,
inai nadi umui tomadiho henidia noho.
Idia dekenai uaina bouboudia danu umui bubua diho noho.
Paraoa bouboudia danu idia dekenai umui henia noho.
Inai dika umui karaia neganai,
egu lalona ia keru noho, a?
7 Ororo badana bona latana ena ataiai,
emui mahuta patana umui atoa vadaeni.
Unuseni umui daekau lao,
dirava koikoi dekenai emui boubou gaudia do umui henia totona.
8 Iduara bona iduara edia dogoatao audia edia murinai,
be kaivakuku edia laulaudia umui atodia vadaeni,
badina be umui ese lau umui rakatania vadaeni.
Umui ese emui dabua umui kokia,
bona mahuta patana badana ena latanai,
umui ura henidia hahine danu umui hekure.
Idia danu umui laloa tamona,
bona umui heudahanai.
9 Dehoro umui abia lao,
Moleka dirava do umui tomadiho henia totona.
Emui bonana namo muramura momo danu,
Moleka totona umui haboua vadaeni.
Ma dirava haida do umui abia,
do umui tomadiho henidia totona,
umui ese emui hesiai taudia daudau dekenai umui siaidia lao.
Momokani umui siaidia lao,
ela bona mase taudia edia gabu dekenai.
10 Dirava haida umui tahua dainai umui hesiku noho,
to umui tahua noho.
Bona tahua kara umui hadokoa lasi,
badina umui laloa inai kaivakuku ese umui idia hagoadaia noho,
bona unai laloa dainai umui manoka lao lasi.
11 To Lohiabada ia gwau,
“Inai dirava be daika,
vadaeni idia dekenai umui gari?
Idia be daika,
vadaeni umui ese lau umui koia,
bona lau dekenai umui laloa lasi?
Nega daudau lau be lau hereva lasi,
unai dainai lau dekenai umui gari lasi, a?
12 Umui laloa kara maoromaoro umui karaia noho.
To lau ese emui kara do lau hedinaraia,
bona emui kaivakuku ese,
umui do idia durua diba lasi.
13 Durua totona do umui boiboi neganai,
namona be emui kaivakuku ibounai ese umui do idia hamauria!
Badina egu lai maragina ese idia do ia hodaia lao ore.
To lau dekenai idia abidadama henia taudia,
be tano dekenai do idia noho,
bona egu ororo helaga ena Dubu Helaga lalonai,
lau do idia tomadiho henia.”
Dirava ese ia gwauhamata iena bese do ia durua bona hanamoa
14 Lohiabada ia gwau,
“Egu bese taudia ese,
lau dekenai do idia giroa mai.
Edia dala idia koua gaudia ibounai do umui kokia ore!
Edia dala do umui karaia,
edia dala do umui abia hegaegae!
15 Lau be ataiai, bona lau be Helaga Diravana.
Lau be noho hanaihanai Diravana,
egu ladana be helaga.
Bona egu noho gabuna be ataiai bona helaga.
To lau be, edia lalona idia giroa,
bona edia lalodia idia manau taudia danu lau noho.
Lau Dirava ese,
iena lalona ia manau tauna ena lauma do lau hagoadaia lou.
Bona iena lalona ia giroa tauna,
be lau ese iena kudouna do lau hamatamataia lou.
16 Badina lau be do lau heai hanaihanai lasi,
bona do lau badu hanaihanai lasi.
Badina bema unai bamona neganai,
taunimanima edia lauma be egu vairana dekenai do idia mase,
bona lau ura lasi,
inai lau ese lau havaraia taudia do idia mase ore.
17 Edia kara dika bona edia ura dika dainai,
lau ese idia lau panisia,
bona idia lau rakatania.
To idia ese edia lalodia idia ha-aukaia,
bona sibodia edia ura daladia hegeregerena idia raka noho.
18 “Lau ese unai edia kara lau itaia vadaeni,
to lau ese idia do lau hanamoa lou.
Lau ese idia do lau hakaua,
bona idia do lau hagoadaia lou momokani.”
19 Lohiabada ma ia gwau,
“Israela lalonai idia taitai noho taudia do lau durua,
vadaeni idia ese edia ududia dekena amo lau do idia hanamoa.
Idia ibounai dekenai maino do lau henia,
daudau idia noho,
bona kahirakahira idia noho taudia danu.
Bona lau ese idia do lau hanamoa lou.
20 To kara dika taudia be davara ena hurehure bamona,
idia laga-ani diba lasi.
Unai hurehure ese miro bona kopukopu idia doria mai noho.”
21 Egu Dirava ia gwau,
“Kara dika taudia dekenai,
maino ia noho lasi.”