60
Nega gabeai Ierusalema ena hairai be bada herea
1 Ierusalema e, do oi toreisi,
bona dina hegeregerena do oi diari,
badina be Lohiabada ena hairaina,
be oi dekenai ia diaridiari noho!
2 Bese idauidau be dibura ese do ia koudia,
to Lohiabada ena diari ese Ierusalema do ia hadiaria,
bona Lohiabada ena hairaina,
be Ierusalema dekenai do ia hedinarai.
3 Ierusalema e, bese idauidau ese,
oiemu diari dekenai do idia mai,
bona king taudia do idia mai,
idia ese oiemu dina matamata ena daba rere do idia itaia gwauraia.
4 Oiemu matana do oi negea, do oi itaia,
oiemu bese taudia be idia haboua noho,
oi dekenai idia giroa mai noho!
Oiemu natuna memero be daudau dekena amo idia raka mai,
bona oiemu natuna kekeni be dagira dekenai idia huaia mai noho.
5 Inai kara oi itaia neganai,
oi be moale dekenai do oi honu momokani,
bona emu lalona do ia haragaharaga,
moale dainai.
Bese idauidau ese edia kohu,
be oi dekenai do idia mailaia.
Davara unai kahana dekena amo ena kohu,
davana bada gaudia, do idia mailaia.
6 Kamelo momo herea momokani ese,
oiemu tano do idia hahonua.
Midiana bona Epa dekena amo do idia mai.
Sieba dekena amo danu do idia mai,
golo bona mai bonana namo muramura do idia huaia mai.
Inai taunimanima ese,
Lohiabada ia karaia vadaeni kara badadia,
ena sivarai do idia gwauraia hedinarai.
7 Kedara bona Nebaioto edia mamoe ibounai,
be oi dekenai do idia mailaia,
boubou gaudia totona.
Boubou patana dekenai do idia atoa,
Lohiabada do ia moalelaia totona.
Lohiabada ese iena Dubu Helaga do ia hanamoa,
bona iena hairai dekena amo do ia hahonua.
8 Inai lagatoi, ori bamona idia heau noho be daika ena?
Idia be manu, edia ruma dekenai idia giroa lou bamona.
9 Idia be lagatoi badadia,
tano daudau dekena amo idia mai noho gaudia.
Idia ese Dirava ena bese taudia,
be edia gabu korikori dekenai idia mailaia lou.
Siliva bona golo be idia ese idia mailaia noho,
Lohiabada ena ladana do idia hanamoa totona.
Ia be Israela ena Dirava Helagana,
bona ia ese,
bese idauidau ibounai edia vairanai
iena bese Israela ia hanamoa vadaeni.
10 Lohiabada ese Ierusalema dekenai ia hereva, ia gwau,
“Idau bese taudia ese,
oiemu magu do idia haginia lou,
bona edia king taudia ese,
oiemu hesiai gaukara do idia karaia.
Guna lau ese badu dainai oi lau panisia,
to hari lau ese,
oi dekenai egu bogahisihisi,
bona egu laloa namo do lau henia.
11 Dina bona hanuaboi oiemu magu iduara be idia kehoa noho,
vadaeni bese idauidau edia king taudia ese,
oi dekenai edia kohu do idia abia vareai.
12 To oiemu hesiai gaukara idia karaia lasi besedia,
be lau ese do lau hadikaia ore momokani.
13 “Kasuarina audia, iunipa audia bona saipresi audia,
Lebanona ena uda ena au namodia momokani,
be Ierusalema haginia lou totona do idia huaia mai,
lauegu Dubu Helaga do idia karaia namo herea totona,
bona hairai momokani gabuna,
be lauegu hanua do idia halaoa totona.
14 Ierusalema e,
oi idia hisihisi henia taudia edia natudia be do idia mai,
bona oiemu vairana dekenai do idia tui diho.
Guna oi dekenai idia badu taudia ibounai ese,
oiemu aena dekenai do idia tomadiho.
Idia ese oi,
Ierusalema, do idia gwauraia,
‘Lohiabada ena Hanua Badana,
Siona, Israela ena Dirava Helagana ena Hanua Badana.’
15 “Oi be idia ese do idia badu henia lou lasi,
bona oi dekena amo do idia raka siri lou lasi.
Guna be oi idia rakatania,
bona oi noho kava,
to hari lau ese oiemu ladana do lau habadaia,
bona oi dekenai hairai do lau henia.
Vadaeni oi be dohore gabu mai moale bada danu,
ela bona hanaihanai.
16 Bese idauidau ese oi do idia naria noho,
sinana ese iena natuna maragina ia naria bamona.
Oi be do oi diba momokani,
lau Lohiabada ese oi lau hamauria vadaeni,
bona do oi diba Israela ena Dirava mai ena siahu badana ese,
oi ia ruhaia momokani vadaeni.
17 “Lau ese auri laboralabora do lau mailaia lasi,
to golo be oi dekenai do lau mailaia.
Lau ese auri bona au do lau mailaia lasi,
to siliva bona auri laboralabora,
be oi dekenai do lau mailaia.
Nadi do lau mailaia lasi, to auri.
Oiemu biaguna taudia ese,
oi do idia hisihisi henia lou lasi.
Lau ese idia do lau hanamoa,
vadaeni mai maoromaoro bona maino danu oi do idia biagua noho.
18 Dagedage bona heatu ena regena,
be do oi kamonai lou lasi.
Gau ta ese oiemu tano do ia hadikaia lou lasi.
Lau ese oi do lau naria bona gimaia, magu bamona,
bona lau ese oi lau hamauria vadaeni dainai,
oi ese lau do oi hanamoa bada.
19 “Dina ese oi do ia hadiaria lou lasi, dina neganai,
bona hua ese oi do ia hadiaria lou lasi, hanuaboi neganai.
Badina be lau, Lohiabada,
be oiemu noho hanaihanai diarina do lau lao,
bona egu hairaina ena diari ese,
oi dekenai diari bada do ia henia.
20 Oiemu lalohisihisi dinadia be do idia ore.
Lau Lohiabada,
be oiemu diari do lau lao,
ela bona hanaihanai.
Oiemu dina be do ia diho lou lasi,
bona oiemu hua ena diari be do ia maragi lou lasi.
21 Oiemu taunimanima ibounai,
be do idia kara maoromaoro,
bona tano be idia ese do idia biagua ela bona hanaihanai.
Lau ese idia lau hadoa,
bona lau ese idia lau havaraia,
idia ese egu siahu badana,
be taunimanima ibounai dekenai do idia hedinaraia totona.
22 Ierusalema e,
oiemu ladana maragi momokani tauna mai ena famili,
be bese badana mai goadana danu do idia lao.
Oibe, negana korikori ia ginidae neganai,
lau ese inai kara do lau havaraia haraga.
Lau inai Lohiabada!”