8
Isaia dekenai natuna ta ia vara
1 Lohiabada ese lau dekenai ia hereva, ia gwau, “Torea pepa, lokua gauna, badana ta do oi abia, bona ia latanai peni dekenai do oi torea namonamo inai bamona: ‘Tuari Uini, Ena Kohu Abia Haraga.’
2 Bona kara momokani taudia rua do oi abia, Uria, hahelagaia tauna, bona Sekaraia, Ieberekaia ena natuna. Idia ese lauegu kara do idia hamomokania.”
3 Unai murinai lau ese egu adavana lau harogorogoa, bona natuna mero ia havaraia. Unai neganai Lohiabada ese lau ia hamaoroa, ia gwau, “Mero ena ladana do oi atoa, ‘Tuari Uini, Ena Kohu Abia Haraga.’
4 Badina unai mero be ‘Sinagu’ o ‘Tamagu’ ia do gwauraia diba lasi neganai, Damaseko ena davana bada kohu namona ibounai bona Samaria ena kohu, tuari dekenai idia lusi gaudia, be Asuria ena king ese do ia abia lao.”
Asuria ena king ia mai noho
5 Lohiabada ese lau dekenai ma ia hereva, ia gwau,
6 “Inai bese ese Siloa ranu namona, ia heau metairametaira gauna idia ura lasi, bona idia ese king Resini bona king Peka Remalaia dekenai idia gari bada noho.
7 Unai dainai lau Lohiabada ese Asuria ena king, mai ena tuari taudia danu do lau mailaia, idia ese Iuda tano do idia tuari henia. Idia be do idia raka mai haraga, Euperate Sinavai ia abata neganai ia heau lao haraga bamona, bona sinavai ena ranu ia bada dainai, ia ese iena hetoa gabuna do ia hanaia lao bamona.
8 Io, inai Asuria tuari oreana be Iuda tano do idia vareai mai, abata bamona. Inai abata ese Iuda tano ibounai do ia koua, bona iena dobu be do ia daekau lao, ela bona taunimanima edia aiona dekenai bamona.”
Dirava be ita dekenai ia noho! Iena hanina ia atodia maoromaoro noho, bona iseda tano idia naria noho.
9 Bese idauidau e,
gari bada dainai do umui haboua tamona!
Gabu daudau taudia e, do umui kamonai!
Tuari totona do umui gini hegaegae noho,
bona do umui gari.
10 Do umui tuari dalana do umui laloa,
to emui laloa gauna ena anina do ia vara lasi.
Emui palani do umui herevalaia momo,
to do umui kwalimu diba lasi,
badina Dirava be ai dekenai ia noho.
Lohiabada ese peroveta tauna Isaia ia sisiba henia
11 Mai ena siahu bada danu Lohiabada ese lau ia sisiba henia, lau ese Iuda taudia edia kara bamona do lau karaia lasi. Lohiabada ia gwau,
12 “Unai bese edia palani gaudia do oi abia dae lasi, bona idia ese idia gari henia gaudia be do oi gari henidia lasi.
13 Oi laloaboio lasi, lau be Siahu Ibounai Lohiabada, lau be helaga, bona oi ese lau sibona do oi gari henia noho.
14 “Lau be lau helaga bada, bona mai garina dainai, lau be nadi bamona, bona taunimanima ese inai nadi dekenai idia bamepa neganai do idia moru. Lau be tarapu bamona, bona Iuda, Israela, bona Ierusalema noho taudia be inai tarapu dekenai do idia moru.
15 “Inai taudia momo be inai nadi bona tarapu dekenai do idia bamepa bona moru. Tarapu ese idia do ia abia.”
Isaia ese ia sisiba henidia, idia mase vadaeni taudia dekenai do idia hereva henia lasi
16 Lauegu diba tahua taudia e, umui ese lauegu hadibaia hereva, Dirava ese lau dekenai ia henia gaudia do umui naria bona hunia.
17 Lohiabada ese sibona ena vairana be iena bese dekena amo ia hunia vadaeni. To lau ese egu abidadama bona egu kamonai Lohiabada dekenai lau atoa noho.
18 Lau Isaia inai, lau bona egu natuna, Lohiabada ese lau dekenai ia henia memero danu inai. Siahu Ibounai Lohiabada, iena terona be Siona Ororo dekenai Diravana, ese ai ia siaia, Israela taudia dekenai toa do ai lao totona.
19 To, taunimanima haida ese umui do idia hamaoroa, lauma tahua taudia bona meamea taudia, idia hereva maragi, bona hereva hunia taudia do umui nanadaia. Do idia gwau, “Namona be taunimanima ese mase taudia edia lauma do idia nanadaia, idia ese mauri taudia do idia durua totona.”
20 To umui ese idia do umui haere henia, umui gwau, “Lohiabada ena hadibaia hereva umui dekenai do umui kamonai! Meamea bona lauma tahua taudia do umui kamonai henia lasi. Badina be umui dekenai idia hamaoroa gaudia ese umui do idia hanamoa diba lasi.”
Nega dikana do ia ginidae
21 Unai taunimanima be tano do idia raka hanaia, mai hisihisi bona mai hitolo danu. Bona edia hitolo dainai do idia badu, vadaeni edia king bona edia Dirava danu do idia hereva dika henia. Edia matana guba dekenai do idia negea,
22 bona tanobada danu do idia itaia noho, to hisihisi bona gari ena dibura sibona do idia davaria. Bona idia be dibura masemase gabuna dekenai haida ese do idia doridia vareai.