12
Iobu ese Sopara ena hereva ia negea
1 Vadaeni Iobu ia haere, ia gwau,
2 “Momokani, emui diba be bada herea, a,
bona do umui mase neganai,
lau laloa, aonega ibounai do ia ore!
3 Lasi momokani! Lau danu be mai egu aonega.
Umui ese aonega dekenai lau umui hereaia lasi.
Hari umui gwauraia gaudia be daika idia diba lasi?
4 “Guna, Dirava ese egu noinoi ia kamonai,
bona egu guriguri ia haere henia,
badina lau be kara maoromaoro bona kerere lasi tauna.
To harihari egu turana ese,
lau dekenai idia kirikiri noho.
5 Umui be mai emui hekwarahi ta lasi,
to umui ese lau umui kirikirilaia noho.
Umui ese kahirakahira ia moru tauna umui botaia noho.
6 To henaoa taudia,
be edia ruma dekenai idia noho mai maino danu,
bona Dirava idia habadua noho taudia,
be idia noho namonamo noho.
Unai taudia ese sibodia edia diba bona goada idia laloa,
bona idia ese unai, edia goada,
be edia dirava tamona, idia halaoa.
7 “To uda boromadia bona ataiai manudia ese,
umui dekenai idia hadibaia diba.
8 Tanobada ena avadia bona davara gwarume ese,
umui dekenai do idia hamaoroa.
9 Idia ibounai idia diba,
Lohiabada ena imana ese idia ia karaia vadaeni.
10 Dirava ena imana ese,
mauri gaudia ibounai ia hakaua noho.
Bona taunimanima ibounai edia mauri,
be Dirava ena siahu henunai.
11 Emui uduna ese,
aniani edia mamina idia tohoa noho bamona,
emui taiana danu ese,
hereva edia mamina idia tohoa noho.
12 Aonega be taunimanima burukadia dekenai ia noho,
bona edia lagani be momo taudia ese,
diba bada idia davaria noho.
13 “Aonega bona siahu be Dirava dekenai ia noho.
Sisiba namona bona lalona kehoa momokani danu,
be Dirava dekenai ia noho momokani.
14 Bema Dirava ese ruma ta ia veria diho neganai,
daika ese ia haginia lou diba?
Bona bema Dirava ese,
tau ta dibura dekenai ia koua neganai,
daika ese unai tau do ia ruhaia diba?
15 Bema Dirava ese medu ia siaia lasi neganai,
hitolo ia vara noho.
Bema Dirava ese medu bada ia siaia neganai,
tanobada dekenai abata bada ia vara noho.
16 Momokani Dirava be mai ena goada bona aonega danu.
Koikoi tauna, bona ia idia koia taudia danu,
be Dirava ena siahu henunai idia noho.
17 Gunalaia taudia edia aonega,
be Dirava ese ia haorea noho,
bona kota biagudia,
be Dirava ese ia hakavakavadia noho.
18 King taudia edia dagi,
be Dirava ese ia kokia noho,
bona dibura taudia mai guia danu ia halaodia.
19 Dirava ese hahelagaia taudia ia hamanaua,
bona siahu taudia ia hamorua noho.
20 Taunimanima ese idia abidadama henia noho taudia,
edia ududia be Dirava ese ia koua noho,
bona tau badadia edia aonega,
be Dirava ese ia kokia noho.
21 Lohia taudia be Dirava ese ia hahemaraia noho,
bona goada taudia edia goada ia haorea noho.
22 Dirava ese dobu gabudia edia hunia gaudia ia kehoa hedinaraia,
bona dibura masemase gabudia ia hadiaria noho.
23 Ia ese tanobada besedia ia habadaia noho,
bona ia hadikadia ore noho.
Edia taunimanima ia hanamoa,
idia be momo herea idia lao,
bona unai murinai ia halusidia noho.
24 Dirava ese tanobada besedia edia lohia taudia,
edia aonega ia kokia.
Vadaeni ia siaidia lao,
dala idia noho lasi tano dekenai idia loaloa kava noho.
25 Dibura lalonai idia hekwarahi kava,
ma idia daradara,
edia diari be lasi dainai.
Idia raka kerere noho, kekero taudia bamona.”