16
Iobu ia haere: Ia gwau ia ese Dirava do ia noia, do ia durua
1 Vadaeni Iobu ia haere, ia gwau,
2 “Hereva unai bamona momo lau kamonai guna vadaeni.
Umui ibounai be hagoadaia taudia dikadia.
3 Emui hereva kavakavadia be do idia doko diba, a?
Dahaka ese umui ia habadua,
bona umui hereva noho doko lasi?
4 Bema umui be lauegu gabu dekenai umui noho neganai,
lau ese umui dekenai do lau hereva diba,
umui ese lau dekenai umui hereva henia hegeregerena.
Lau ese danu haroro umui emui latanai do lau gwauraia diba,
bona egu kwarana mai aonega danu,
umui dekenai do lau abia isi diba.
5 Egu uduna dekena amo,
lau ese umui do lau hagoadaia diba,
Bona egu hereva ese emui hisihisi idia hamaragia diba.
6 To egu hereva ese egu hisihisi ia hamaragia lasi,
bona lau hereva lasi neganai danu,
egu hisihisi be ia ore lasi.
7 “Dirava e,
momokani oi ese lauegu goada oi haorea vadaeni.
Oi ese egu bese taudia ibounai oi kokia ore vadaeni.
8 Dirava e, oi ese lau oi dogoatao,
bona egu tauanina oi hamaragia momokani vadaeni.
Taunimanima ese egu tauanina idia itaia neganai,
idia gwau, momokani lau be kerere vadaeni.
9 Dirava ese mai badu danu egu tauanina ia darea noho.
Ia ese lau dekenai iena isena ia koria auka masemase,
bona ia ese lau do ia hadikaia ore dalana,
be ia laloa noho.
10 Taunimanima ese lau dekenai idia hereva dika noho.
Idia ese mai badu danu egu vairana idia botaia noho.
Lau idia hadikaia totona idia haboua noho.
11 Dirava ese,
tau dikadia edia imadia dekenai lau ia atoa vadaeni,
dagedage taudia edia huanai lau ia negea vadaeni.
12 Egu noho be namo neganai,
Dirava ese lau ia botaia.
Ia ese egu aiona ia dogoatao,
bona ia hamakohia momokani.
Ia ese egu tauanina,
be iena diba pidia gabuna ia halaoa vadaeni.
13 Iena peva taudia ese lau idia hagegea noho.
Mai bogahisihisi lasi danu,
ia ese egu tauanina ia gwadaia bona heberoa.
Egu digara be tano dekenai ia bubua noho.
14 Ia ese lau ia haberoa lou, haberoa lou.
Ia ese lau ia tuari henia noho,
tuari tauna dagedagena bamona.
15 “Puse dabua lau turia vadaeni,
egu kopina koua totona.
Egu vairana,
be tano ena kahu dekenai lau atoa diho vadaeni.
16 Taitai dainai egu vairana be ia kakakaka vadaeni,
bona egu matana ena kopidia be idia korema momokani.
17 To lau ese dagedage karana ta lau karaia lasi,
bona egu guriguri be ia goevagoeva.
18 “Tano e, egu rarana do oi koua lasi.
Egu taitai kota maoromaorona totona,
be do oi koua lasi.
19 Harihari danu egu uitnesi,
egu hereva hamomokania tauna be guba dekenai ia noho.
Egu hereva durua tauna be ataiai ia noho.
20 Egu turana taudia ese,
lau idia hereva dika henia noho.
Bona egu matana ranu,
be Dirava ena vairana dekenai idia diho noho.
21 “Lau ura tau ta ese,
egu maoromaoro Dirava dekenai do ia gwauraia,
tau ta ese iena turana dainai ia noinoi bamona.
22 Badina lagani momo lasi do idia ore neganai,
lau be giroa mai lasi dalana dekenai do lau raka lao.