20
Iesu ia toreisi lou
1 Pura ena dina ginigunana, Maria, Magadala hahinena, be daba ia diari namonamo lasi neganai, guria gabuna dekenai ia lao. Vadaeni nadi ia itaia, guria gabuna dekena amo ia kokia vadaeni.
2 Unai dainai ia heau lao, Simona Petero bona Iesu ese ia lalokau henia diba tahua tauna dekenai ia lao, ia gwau, “Idia ese Lohiabada be guria gabuna dekena amo idia kokia vadaeni, edeseni idia atoa be ai diba lasi.”
3 Unai dainai Petero bona inai diba tahua tauna ta idia toreisi, guria gabuna dekenai idia heau lao.
4 Ruaosi idia heau hebou, vadaeni inai diba tahua tauna ta ese Petero ia heau hanaia, ia ese guria gabuna dekenai ia ginidae guna.
5 Vadaeni ia ese ia itaia lalona dekenai, dabua aukana ia itaia unuseni, to guria gabuna dekenai ia raka vareai lasi.
6 Simona Petero ese iena murina dekenai ia lao, maoromaoro guria gabuna lalona dekenai ia raka vareai. Vadaeni ia ese dabua aukadia ia itaia, unuseni idia noho,
7 bona taoele danu, Iesu ena kwarana idia kumia gauna, be dabua aukadia danu idia atoa hebou lasi, to idia lokua, ma sibona ena gabu dekenai ia noho.
8 Vadaeni guria gabuna dekenai ia ginidae guna diba tahua tauna danu be ia raka vareai, ia ese ia itaia, bona ia hamomokania.
9 Badina unai neganai idia be Buka Helaga ena hereva idia do diba lasi, ia gwau Keriso be mase dekena amo do ia toreisi lou.
10 Vadaeni inai diba tahua taudia be edia ruma dekenai idia giroa lou.
Iesu be Maria dekenai ia hedinarai
11 Maria be guria gabuna ena murimuri dekenai mai tai danu ia gini noho. Ia tai noho neganai, kwarana ia atoa diho guria gabuna lalonai ia itaia.
12 Vadaeni ia ese aneru rua mai dabua kurokuro danu ia itaia, Iesu ena tauanina idia atoa gabuna dekenai. Ta be iena aena gabunai, ma ta be iena kwarana gabunai, idia helai noho.
13 Idia hereva Maria dekenai, idia gwau, “Hahine e, dahaka dainai oi tai?”
Ia haere idia dekenai, ia gwau, “Egu Lohiabada be idia abia siri vadaeni, idia atoa gabuna be lau diba lasi.”
14 Unai bamona Maria ia hereva, vadaeni iena vairana ia giroa, Iesu be ia gini noho neganai ia itaia, to ia diba lasi unai be Iesu.
15 Iesu ese ia nanadaia, ia gwau, “Hahine e, dahaka dainai oi tai? Daika oi tahua?”
Maria ia laloa ia be uma gabu naria tauna ta, vadaeni ia gwau, “Tau badana e, bema inai be oi ese idau gabu ta dekenai oi abia lao be mani gabuna oi hamaoroa lau dekenai, vadaeni do lau lao abia.”
16 Iesu ia gwau, “Maria e!”
Maria ese iena vairana ia giroa, ia gwau, “Rabouni!” Unai hereva ena anina be “Hadibaia Tauna.”
17 Iesu ese ia hamaoroa, ia gwau, “Lauegu tauanina oi dogoatao lasi, badina be Tamana dekenai lau do daekau lasi. To lauegu varavara taudia dekenai oi lao, idia do oi hamaoroa egu Tamana bona emui Tamana, egu Dirava bona emui Dirava dekenai do lau daekau.
18 Vadaeni Maria, Magadala hahinena, be ia lao, diba tahua taudia dekenai ia hamaoroa, ia gwau, “Lohiabada be lau itaia vadaeni!” Vadaeni ia dekenai Iesu ia hereva henia herevadia be ia hamaoroa idia dekenai.
Iesu be iena diba tahua taudia dekenai ia hedinarai
19 Unai pura ena dina ginigunana hanuaboi neganai, diba tahua taudia be edia ruma iduarana idia koua auka vadaeni, Iuda taudia dekenai idia gari dainai. Vadaeni Iesu be ia lao, idia edia huanai ia gini, ia gwau, “Maino umui abia.”
20 Unai bamona ia hereva, vadaeni iena imana ruaosi bona iena ohena danu ia hedinaraia idia itaia. Unai dainai diba tahua taudia idia moale, Lohiabada idia itaia dainai.
21 Iesu ma ia hereva henia lou idia dekenai, ia gwau, “Maino umui abia. Tamana ese lau ia siaia hegeregerena, lau danu umui do lau siaia.”
22 Unai bamona ia hereva, vadaeni uduna dekena amo ia hahodi henia idia dekenai, ia gwau, “Lauma Helaga umui abia.
23 Edia dika do umui gwauatao taudia edia dika be do idia gwauatao, to edia dika do umui gwauatao lasi taudia edia dika be do idia noho.”
Toma ese Iesu ia itaia
24 Toma, idia 12 tauna ta, ena ladana ta Hekapa, be idia danu ia hebou lasi, Iesu idia dekenai ia hedinarai neganai.
25 Unai dainai, diba tahua taudia haida ese ia idia hamaoroa, idia gwau, “Ai be Lohiabada ai itaia vadaeni!”
To ia gwau, “Iena imana dekenai ikoko edia bero bema lau itaia lasi, egu imana kwakikwakina be ikoko idia gwadaia gabuna dekenai bema lau atoa lasi, bona iena ohena dekenai bema egu imana lau atoa vareai lasi, lau be do lau hamomokania lasi.”
26 Dina 8 idia ore murinai Iesu ena diba tahua taudia be ruma lalonai ma idia hebou lou, Toma be idia danu. Iduara idia koua auka momokani, to Iesu be ia vareai lao, edia huana dekenai ma ia gini, ia gwau, “Maino umui abia.”
27 Vadaeni ia ese Toma dekenai ia hereva henia, ia gwau, “Oiemu imana kwakikwakina oi atoa mai, lauegu imana do oi dogoatao, bona oiemu imana danu lauegu ohena dekenai do oi atoa vareai. Vadaeni oiemu laloa daradara oi hadokoa, bona lau dekenai oi abidadama henia.”
28 Toma ese ia haere henia, ia gwau, “Egu Lohiabada! Egu Dirava!”
29 Iesu ia gwau, “Lau oi itaia dainai lau dekenai oi abidadama, ani? Lau idia itaia lasi, to idia abidadama lau dekenai taudia be namo do idia davaria!”
Inai buka Ioane ia torea ena badina
30 Toa momo herea Iesu ese ma ia karaia, iena diba tahua taudia edia vairana dekenai, to inai toa momo herea be inai buka lalonai idia torea haorea lasi.
31 To inai idia torea gaudia edia badina korikori be, umui ese do umui abia dae Iesu be Keriso, Dirava ena Natuna, vadaeni do umui abidadama henia dainai, mauri do umui abia iena ladana dekenai.