20
Ieremia bona Pasahuru idia hepapahuahu
Hahelagaia tauna, ena ladana Pasahuru, Imere ena natuna, be Dubu Helaga ena naria tauna badana. Ia ese Ieremia ena sisiba hereva ia kamonai. Vadaeni Pasahuru ese iena taudia ia oda henidia, bona idia ese Ieremia idia botaia, bona seini dekenai idia guia, Dubu Helaga ena iduara ena ladana Beniamina kahirakahira idia atoa. Kerukeru dabai Pasahuru ese Ieremia be seini dekena amo ia ruhaia. Unai neganai, lau Ieremia, lau gwau, “Lohiabada ese oiemu ladana ia gwauraia lasi Pasahuru. Lohiabada ese oiemu ladana ia atoa, ‘Gari Bada Gabu Ibounai.’ Lohiabada sibona ia hereva, ia gwau, ‘Lau ese Pasahuru do lau hadikaia, vadaeni sibona do ia hagaria, bona iena turana ibounai do ia hagaria danu. Bona inai oiemu turana ibounai be tuari kaia dekena amo do idia mase, oiemu vairana dekenai. Bona lau ese Iuda taudia ibounai Babulonia ena king ena siahu henunai do lau atoa, ia ese do ia guidia, Babulonia dekenai do ia abidia lao, o tuari kaia dekenai do ia aladia mase. Inai danu, inai hanua badana ena kohu ibounai, taunimanima idia ura henia bada gaudia, bona Iuda king taudia edia kohu namo herea gaudia, be Babulonia tuari taudia ese do idia abia lao Babulonia dekenai. Bona oi, Pasahuru, bona oiemu famili taudia ibounai be do idia abia mauri, bona Babulonia dekenai umui do idia abia lao. Unuseni umui be do umui mase, bona unuseni be umui do idia guria, emui turadia taudia danu, oi ese oi peroveta koikoi henidia taudia.’ ”
Ieremia ese Lohiabada dekenai ia maumau
Lohiabada e, oi be lau dekenai oi koikoi vadaeni,
oi ese lau oi koia.
Oiemu goada ese egu goada ia hanaia,
bona oi ese lau dekena amo oi kwalimu.
Taunimanima ibounai ese lau idia kirikirilaia.
Idia ibounai be lau dekenai idia hereva dika noho.
Lau ese oiemu hereva lau gwauraia negana ibounai,
be lau boiboi,
bona oi ese egu gadona oi habadaia,
lau gwau,
“Tuari ia mai noho!
Umui ese dika do umui davaria!”
Taunimanima ibounai ese,
inai hereva idia kamonai neganai,
lau idia hereva dika henia,
bona lau idia hahemaraia noho.
Bema lau gwau,
“Lau ese Lohiabada do lau laloaboio,
bona iena ladana dekenai do lau hereva lasi.”
Unai neganai oiemu hereva be lahi bamona,
lauegu lalona ia gabua noho,
ela bona lauegu turiana dekenai.
Momokani lau ese oiemu hereva lau koua toho auka herea,
to lau koua hegeregere lasi.
10 Taunimanima momo edia herevahereva,
mai regena bada lasi gaudia lau kamonai noho,
idia gwau,
“Gari bada ese taunimanima ibounai ia abia noho.
Ita toreisi harihari,
Ieremia do ita samania, do ita samania!”
Bona egu turana taudia danu idia ura lau be do lau moru.
Idia hereva noho, idia gwau,
“Sedira ita koia diba,
vadaeni ita dogoatao diba,
bona iena kerere davana do ita henia diba.”
 
11 To oi Lohiabada ese lau oi durua noho.
Oi be goada bona mai oiemu siahu,
bona unai taudia,
lau idia hahisia noho taudia,
be do idia moru.
Hemarai bada do idia abia ela bona hanaihanai,
badina be idia kwalimu diba lasi,
bona unai hemarai be taunimanima ese,
do idia laloaboio lasi ela bona hanaihanai.
12 Siahu Ibounai Lohiabada e,
oi ese mai maoromaoro danu,
taunimanima edia kara oi tohoa noho,
bona taunimanima edia laloa,
bona edia kudouna ibounai oi diba noho.
Unai dainai lau ura inai lau idia hadikaia noho taudia,
edia davana do oi henia,
badina lauegu mauri,
be oiemu imana dekenai lau atoa vadaeni.
 
13 Lohiabada dekenai ane do ita abia!
Iena ladana do ita hanamoa!
Badina be ia ese,
hisihisi idia abia noho taudia ia hamauria noho,
dagedage taudia edia imana dekena amo.
 
14 Lauegu vara dinana,
be Dirava ese ia hadikaia namo!
Lauegu sinana ese lau ia havaraia dinana,
be ta ese ia hanamoa lasi namo!
15 Tau ta ese egu tamana dekenai hereva ia gwauraia, ia gwau,
“Oiemu natuna mero ta ia vara vadaeni.”
Unai tau be Dirava ese ia hadikaia namo!
16 Unai tau be dika ese do ia abia namo.
Lau ura ia be dika,
Lohiabada ese ia hadikaia vadaeni hanua idia dika hegeregerena.
Lohiabada ese unai hanua ia bogahisihisi henidia lasi.
Lasi momokani! Daba neganai,
hanua taudia ese idia dekenai tuari henidia taudia idia itaia,
vadaeni idia taitai dikadika.
Bona dina tubua neganai,
tuari taudia be hanua lalonai idia raka vareai,
mai tuari ena boiboi bada danu!
Lau ura unai tau be dika do ia davaria,
unai hanua ese dika ia davaria bamona,
17 badina be ia ese egu sinana ena bogana lalonai lau ia alaia lasi.
Unai bamona bema ia karaia neganai,
sinagu ena bogana be lauegu guria gabuna do ia lao,
vadaeni sinagu ena bogana be ia bada noho,
ela bona hanaihanai.
18 Badina dahaka sinagu ese lau ia havaraia?
Hekwarahi bona lalohisihisi do lau abia totona lau vara, a?
Bona egu mauri dinadia be hemarai dekenai do lau haorea, a?