44
Lohiabada ese Aigupito dekenai noho Israela taudia ia hereva henidia Ieremia dekena amo
1 Lohiabada ese lau Ieremia dekenai ia hereva, Iuda taudia ibounai Aigupito tano dekenai idia noho, totona. Idia be inai hanua dekenai idia noho: Migidola, Tapanese, Memepisi, bona Aigupito ena diho kahana danu.
2 Siahu Ibounai Lohiabada, Israela ena Dirava ia gwau, “Umui ese dika ibounai Ierusalema bona Iuda ena hanua ibounai edia latanai lau atoa be umui itaia vadaeni. Hari inai dina dekenai inai hanua be anina lasi, tau ta be idia lalonai ia noho lasi.
3 Unai be edia kara dikadia dainai. Edia kara dekena amo lau idia habadua, badina be idia lao, dirava idaudia, idia diba lasi, umui diba lasi, bona emui sene taudia idia diba lasi diravadia dekenai muramura mai bonana bouboudia idia henia, bona idia tomadiho henidia.
4 Lau ese egu hesiai taudia, peroveta taudia, lau siaidia lou, siaidia lou, umui dekenai, bona idia dekena amo lau gwau, inai lau badu henia momokani kara dikana be do umui karaia lasi.
5 To umui ese umui kamonai lasi, bona umui laloa lasi danu. Umui emui dika bada gauna, dirava idaudia dekenai, mai bonana muramura umui gabua, bona idia dekenai umui tomadiho karadia umui hadokoa lasi.
6 Unai dainai egu badu bona egu laloa siahu be Iuda hanuadia edia latanai, bona Ierusalema ena ariara edia latanai lau bubua diho, bona lahi dekenai lau gabudia. Bona idia be anina lasi, bona dika gabudia idia lao, hari dina idia noho hegeregerena.
7 “Harihari, lau, Siahu Ibounai Lohiabada, Israela ena Dirava, be inai bamona lau hereva noho: Badina dahaka inai dika badana, umui sibona hadikaia gauna, umui karaia noho? Umui ura emui tau bona hahine, emui natudia, bona emui natudia maragidia dekenai dika bada do umui havaraia, a? Bona unai murinai emui Iuda bese tauna ta be do ia mauri noho lasi, a?
8 Badina dahaka kaivakuku umui tomadiho henia noho, bona unai dekena amo lau umui habadua noho? Badina dahaka mai bonana muramura umui gabua, inai umui noho Aigupito tano ena dirava idaudia tomadiho henia totona? Umui ese inai bamona umui karaia, umui sibona do umui hadikaia ore totona, a? Unai neganai tanobada besedia ibounai ese umui do idia kirikirilaia, bona emui ladana be edia hereva dika gauna ta do idia halaoa.
9 Emui sene taudia edia kara dika, Iuda king taudia mai edia adavadia danu edia kara dika, bona umui, mai emui adavadia danu emui kara dika, Iuda tano dekenai, bona Ierusalema ena ariaradia dekenai umui karaia gaudia, be umui laloaboio, a?
10 Ia mai bona inai dina umui be umui manau lasi egu vairana dekenai, bona lau umui matauraia lasi, bona umui ese egu taravatu bona egu oda hereva, umui bona emui sene taudia edia vairanai lau atoa gaudia, be umui badinaia lasi.
Idau dirava dekenai idia tomadiho dainai Dirava ia badu
11 “Unai dainai, lau, Siahu Ibounai Lohiabada, Israela ena Dirava, be inai bamona lau hereva noho: Kamonai, egu vairana do lau ha-aukaia umui dekenai, umui do lau hadikaia totona, bona Iuda ibounai do lau hadikaia ore.
12 Inai do noho Iuda taudia, edia lalodia idia ha-aukaia, bona Aigupito tano dekenai idia mai, unuseni do idia noho totona, be lau ese idia ibounai do lau hadikaia ore. Idia ibounai, dagi lasi taudia, bona mai dagi bada taudia danu, be tuari bona hitolo dekena amo Aigupito dekenai do idia mase. Taunimanima ese idia do idia itaia, mai gari bona mai badu danu. Unai taunimanima ese idia do idia kirikirilaia, bona edia ladana be edia hereva dika gauna ta do idia halaoa.
13 Momokani inai Aigupito tano dekenai idia noho taudia edia dika davana do lau henia, Ierusalema taudia edia dika davana lau henia hegeregerena, tuari, hitolo, bona hanaia gorere dikana dekena amo.
14 Unai dainai Iuda taudia, do mauri noho Iuda taudia, Aigupito tano noho totona idia mai taudia, be ta do ia heau mauri lasi, ta do ia mauri lasi. Idia ta ese Iuda dekenai, idia ura lao tano, dekenai do idia giroa lou lasi, heau mauri taudia ta ta sibona.”
15 Vadaeni Aigupito ena diho kahana idia noho Iuda taudia ibounai, idia diba edia adavadia ese bonana namo muramura be dirava idaudia dekenai idia gabua taudia ibounai, bona edia badibadinai idia gini noho hahine ibounai, hebou bada herea, ese lau Ieremia dekenai idia haere, idia gwau,
16 “Hereva ta ai dekenai oi hamaoroa, Lohiabada ena ladana dekenai, to ai ese oi do ai kamonai henia lasi.
17 Ai ese ai gwauhamata do ai karaia karadia ibounai, be do ai karaia, bonana namo muramura be guba ena kwini dekenai do ai gabua, bona ia hanamoa totona danu uaina bouboudia do ai bubua, ai karaia guna hegeregerena, ai bona aiemai sene taudia, bona aiemai king bona lohia taudia, Iuda hanua ibounai dekenai, bona Ierusalema ena ariara gabudia dekenai. Badina be unai neganai, aiemai aniani be momo, bona aiemai noho be namo, dika ta do ai itaia lasi.
18 To guba ena kwini ena bonana namo muramura gabua kara, bona ena uaina bouboudia bubua kara ai hadokoa murinai, ai be gau namona ta ai davaria lasi. Aiemai bese be tuari bona hitolo ese ia haorea lao noho.”
19 Hahine ma idia gwau, “Ai ese bonana namo muramura be guba ena kwini totona ai gabua, bona uaina bouboudia be ia totona ai bubua neganai, aiemai adavadia idia diba lasi, a? Bona ai ese guba ena kwini ena laulauna bamona keke ai gabua neganai, aiemai adavadia idia diba lasi, a? Lasi, to idia ese gwaumaoro idia henia.”
20 Vadaeni lau Ieremia ese taunimanima ibounai, tau bona hahine, unai bamona lau idia hereva henia taudia ibounai lau hamaoroa, lau gwau,
21 “Inai bonana namo muramura, Iuda hanua edia lalonai, bona Ierusalema ena ariara gabudia dekenai umui gabua gaudia, be Lohiabada ese ia diba lasi, a? Ia ese unai karadia do ia laloaboio, a?
22 Hari inai dina dekenai emui tano be ia dika vadaeni, bona tau ta unuseni ia noho lasi. Unai gabu be taunimanima idia itaia neganai, idia gari bada noho, bona idia ese unai tano ena ladana be edia hereva dika gauna ta idia halaoa vadaeni, badina be Lohiabada ena haheauka be ia ore, emui kara dikadia dainai.
23 Io, inai dika be umui dekenai ia ginidae, badina be dirava idaudia hanamoa totona bonana namo muramura umui gabua, bona Lohiabada dekenai umui kara dika, bona iena taravatu bona iena oda hereva bona iena hadibaia hereva umui badinaia lasi.”
24 Lau Ieremia ese ma taunimanima ibounai, bona hahine ibounai danu lau hamaoroa, lau gwau, “Iuda taudia, Aigupito dekenai umui noho taudia ibounai e, Lohiabada ena hereva do umui kamonai.
25 Siahu Ibounai Lohiabada, Israela ena Dirava be inai bamona ia gwau: Umui bona emui adavadia ese guba ena kwini dekenai gwauhamata metaudia umui henia vadaeni. Umui gwau, ‘Bonana namo muramura be ia totona do umui gabua noho, bona iena uaina bouboudia do umui bubua noho.’ Bona inai gwauhamata umui badinaia momokani vadaeni.
“Vadaeni, do umui karaia noho! Inai gwauhamata do umui badinaia noho!
26 To Lohiabada ena hereva do umui kamonai, umui Iuda taudia Aigupito dekenai umui noho. Lohiabada be ia gwau: Lau ese egu ladana bada dainai lau gwauhamata inai, Iuda tauna ta, Aigupito dekenai ia noho tauna ta, ese nega ta egu ladana dekenai inai bamona do ia gwauhamata lou lasi, ia be nega ta do ia gwau lasi, ‘Siahu Ibounai Lohiabada, mauri Diravana ena ladana dainai.’
27 Lau Lohiabada ese umui lau naria noho, umui do lau hadikaia totona, umui hanamoa totona lasi, bona Iuda taudia ibounai Aigupito dekenai, be tuari dekenai, o hitolo dekenai do idia mase ore lao, ela bona idia ta do ia mauri noho lasi.
28 To umui ta ta sibona be tuari dekena amo do umui heau mauri, bona Aigupito dekena amo umui haida sibona do umui heau lao, Iuda dekenai do umui ginidae lou. Unai neganai do mauri noho Iuda taudia Aigupito dekenai idia mai, be do idia diba edena hereva be maoro, idia edia hereva, o lauegu hereva.
29 “Lau Lohiabada ese ma lau hereva inai: Toana ta umui dekenai do lau hedinaraia, bona ia dekena amo do umui diba lau ese inai gabu dekenai emui dika davana do lau henia. Bona inai toa dekena amo do umui diba, egu sisiba hereva, umui do lau hadikaia hereva, be momokani do ia vara.
30 Lau Lohiabada ese Aigupito ena king, Hopera, be ia idia alaia mase dalana idia tahua noho taudia edia imadia dekenai do lau atoa, Sedekaia, Iuda ena king, be Nebukanesa, Babulonia ena king ena imana dekenai lau atoa hegeregerena. Badina be Nebukanesa ese guna Sedekaia ena mase dalana ia tahua noho.”