52
Ierusalema hanua ia moru
Sedekaia ese Iuda king dagina ia abia neganai, iena mauri lagani be 21, bona unai dagi be lagani 11 ia dogoatao noho Ierusalema dekenai. Iena sinana ena ladana be Hamutala, Libina hanua tauna, Ieremia ta ena natuna. King Sedekaia ese Lohiabada ena vairanai ia kara dika, king Iehoiakimi ena kara ibounai hegeregerena ma ia karaia. Ierusalema taudia bona Iuda taudia edia dika be ia bada lao noho dainai, Lohiabada ena badu danu ia bada lao noho, ela bona Lohiabada ese iena vairana dekena amo, ia luludia ore momokani.
Sedekaia ese Babulonia ena king Nebukanesa ia kamonai henia lasi, ia ura lasi Nebukanesa ena siahu henunai ia noho. Unai dainai Sedekaia ia king ena lagani 9, hua 10, bona dina 10 dekenai, Nebukanesa, mai ena tuari taudia danu idia mai, Ierusalema idia hagegea, bona idia tuari henia. Idia ese hanua ena murimurinai, kamepa idia haginia, bona magu ena badinai tano idia haboua daekau. Babulonia taudia ese Ierusalema idia koua hagegea lagani ta mai kahana, ela bona Sedekaia ena king dagina ena lagani namba 11 lalonai.
Unai lagani ena hua 4, bona dina namba 9 dekenai hitolo be bada herea, bona Ierusalema taudia be aniani lasi momokani. Unai neganai Babulonia taudia ese hanua maguna ena kahana ta idia hamakohia. Momokani, Babulonia taudia ese hanua idia koua hagegea, to Sedekaia bona Iuda tuari taudia ibounai be hanuaboi neganai idia heau. Idia be king ena uma gabuna dalana dekena amo hanua idia rakatania. Magu ruaosi edia huanai ia noho iduara idia hanaia, bona Ioridane Koura dala dekenai idia heau lao.
To Babulonia tuari taudia ese king Sedekaia ena murinai idia heau, bona Ieriko ena tano palakana dekenai king idia dogoatao. Unai neganai Sedekaia ena tuari taudia ibounai ese ia idia rakatania, idia heau. Sedekaia idia abia, vadaeni king Nebukanesa dekenai idia abia lao. Nebukanesa be Ribila, Hamata tano dekenai ia noho. Unai gabu dekenai Nebukanesa ese Sedekaia ena mase ia gwauraia. 10 Ribila dekenai Nebukanesa ese Sedekaia ena natuna memero rua ia alaia mase, Sedekaia ena vairana dekenai. Nebukanesa ese danu Iuda ena opesa taudia ia alaia mase. 11 Unai murinai Nebukanesa ese ia oda henia, vadaeni Sedekaia ena matana ruaosi idia kokia, bona Babulonia dekenai idia abia lao. Vadaeni seini dekena amo Sedekaia idia guia, bona ia be Babulonia dekenai dibura ruma lalonai ia noho ela bona ia mase.
Dubu helaga idia hadikaia ore
12 King Nebukanesa ese king dagi ia dogoatao ena lagani namba 19, hua namba 5 bona dina namba 10 dekenai, king ena hesiai tauna ta, ma ia be tuari gima taudia edia biaguna, ena ladana Nebusaradana ese Ierusalema dekenai ia raka vareai. 13 Vadaeni ia ese Dubu Helaga, king ena ruma, bona Ierusalema ena dagi bada taudia ibounai edia ruma ia gabua ore.
14 Nebusaradana ena tuari taudia ese Ierusalema ena magu idia veria diho. 15 Unai murinai Iuda ogogami taudia, bona hanua lalonai do noho taudia, bona do noho gaukara diba momo taudia, bona Babulonia taudia dekenai idia hanaia taudia, be Nebusaradana ese ia guidia, bona Babulonia dekenai ia abidia lao. 16 To Nebusaradana ese ogogami herea taudia haida ia rakatania, idia ese vain uma do idia naria, bona tano do idia geia totona.
17 Auri laboralabora du ruaosi Dubu Helaga lalonai, bona treila, bona auri laboralabora tanika, bona auri laboralabora ibounai, be Babulonia taudia ese idia makohia, bona Babulonia dekenai idia abia lao. 18 Bona uro bona sipeidi, bona lamepa hagoevaia gaudia, bona muramura mai bonana namo urodia, bona auri laboralabora disi bona kapusi, boubou helaga totona idia gaukaralaia gaudia ibounai, be Babulonia dekenai idia abia lao. 19 Nebusaradana ese danu siliva bona golo gaudia ibounai ia abia lao. Mereki gaudia, gida huaia gaudia, boubou ena rara idia abia disi, uaina boubou kapusi, inai gau ibounai ia abia lao Babulonia dekenai.
20 Unai auri laboralabora du ruaosi, bona treila, bona tanika be Solomona ese Dubu Helaga totona ia karaia. Idia be metau herea, edia metau be sikele dekenai idia abia diba lasi. 21 Unai du ruaosi edia bada be hegeregere. Idia edia lata be 8 mita, edia kuboru be 5.3 mita, idia be paipa badadia bamona, bona edia auri ena udunana be 75 milimita. 22 Edia kwarana danu be auri laboralabora, edia lata be 1.3 mita. Auri laboralabora reke bamona gauna ese unai kwarana ta ta ia hagegea. Auri laboralabora apolo au huahua edia laulau, be unai reke edia latanai idia koroa. 23 Unai du edia kwarana ta ta edia reke bamona gaudia latanai, be apolo au huahua edia laulau ibounai 100 idia noho, bona taunimanima ese 96 sibona idia itaia diba tano dekena amo.
Babulonia taudia ese Iuda taudia idia abia lao Babulonia dekenai
24 Vadaeni inai Nebusaradana, tuari gima taudia edia biaguna ese Hahelagaia Tauna Badana, Seraia, bona hahelagaia tauna iharuana Sepanaia, bona Dubu Helaga iduara naria taudia toi danu ia abia lao. 25 Ierusalema dekena amo danu tuari orea biaguna ta, bona king ena kaunsolo taudia 7, bona tuari biaguna ena toretore tauna, iena gaukara be tano dekenai tuari taudia ia abia hidi, bona iena tatau 60, be Nebusaradana ese idia ibounai ia abia. 26 Ribila hanua dekenai idia ia abia lao, king Nebukanesa dekenai. Ribila be Hamata tano dekenai. 27 Unuseni Babulonia ena king ese idia ia botaia, bona ia aladia mase.
Unai bamona dala dekenai Iuda taudia be mai guia danu, edia tano dekena amo Babulonia taudia ese idia abia lao, gabu daudau dekenai idia noho.
28 Nebukanesa ese mai guia danu, iena tano dekenai ia abia lao taudia edia namba be inai: Ia be king dagi ia abia ena lagani namba 7 lalonai, Iuda taudia ibounai 3023 ia abia lao. 29 Bona king dagi ia abia ena lagani namba 18 lalonai Nebukanesa ese Ierusalema dekena amo Iuda taudia 832 ia abia lao. 30 Bona Nebukanesa ena king dagi ena lagani namba 23 lalonai, Nebusaradana, tuari gima taudia edia biaguna ese Iuda taudia 745 ia abia lao.
Vadaeni Babulonia dekenai idia abia lao Iuda taudia be ibounai 4600.
Iehoiakini be dibura ruma dekena amo idia ruhaia
31 Iehoiakini, Iuda ena king, be Babulonia dekenai lagani 36, hua namba 12, ena dina namba 25 neganai, Evila Merodaka ese Babulonia ena king dagi ia abia hamatamaia. Vadaeni ia king ena lagani ginigunana lalonai, ia ese Iehoiakini, Iuda ena king dekenai ia bogahisihisi, bona dibura ruma dekena amo ia ruhaia.
32 Evila Merodaka ese Iehoiakini dekenai ia hereva namo, bona helai gabuna namo herea ia henia, Babulonia dekenai idia noho king taudia edia helai gabudia be iena ese ia hereaia. 33 Unai dainai Iehoiakini ese iena dibura dabua ia kokia. Unai murinai iena mauri dinadia ibounai lalonai ia be king ena pata dekenai ia aniani. 34 Bona Babulonia ena king ese dina ta ta, Iehoiakini ena mauri dinadia ibounai lalonai, moni ia henia, iena ura gaudia do idia hegeregere totona.