7
Ieremia ese Dubu Helaga lalonai ia haroro
1 Lohiabada ese Ieremia ia hereva henia, ia gwau,
2 “Oi lao, Dubu Helaga ena iduara dekenai do oi gini, bona Iuda taudia be lau dekenai tomadiho totona idia raka vareai lao neganai, oi haroro henia idia dekenai. Idia dekenai do oi hamaoroa, lau Lohiabada, egu hereva do idia kamonai henia namonamo. Lauegu hereva be inai bamona:
3 Lau, Israela ena Dirava, Siahu Ibounai Lohiabada, ese umui lau hamaoroa inai, umui ese emui mauri dalana do umui hamaoromaoroa, vadaeni dala do lau karaia, inai gabu dekenai do umui noho.
4 Haida ese umui dekenai idia hereva koikoi noho, idia gwau, ‘Inai be Lohiabada ena Dubu Helaga ena gabu, iniseni ita mase diba lasi, inai be Lohiabada ena Dubu, inai be Lohiabada ena Dubu!’ Inai hereva koikoi umui kamonai lasi.
5 “Emui mauri dalana do umui hamaoromaoroa, bona emui kerere do umui hadokoa. Umui ta ta dekenai kara maoromaoro do umui karaia.
6 Idau tauna, o ogogami tauna, o vabu, umui emui huanai idia noho, be do umui hisihisi henia lasi. Bona mai edia kerere lasi taudia do umui alaia lasi inai emui gabu dekenai. Bona idau dirava do umui tomadiho henia lasi, badina inai kara ese umui do ia hamasea.
7 Bema emui lalona umui giroa neganai, lau ese emui dala do lau karaia, umui ese inai gabu do umui noho. Badina umui emui sene taudia dekenai inai tano lau henia guna, idia ese do idia noholaia ela bona hanaihanai totona.
8 Oibe, umui ese hereva koikoi umui abidadama henia noho, to inai bamona hereva ese umui ia durua diba lasi.
9 “Bona umui ese gau umui henaoa, taunimanima umui alaia mase, umui heudahanai, umui gwauhamata koikoi, bona Bala dirava dekenai boubou umui henia. Idau dirava, umui diba lasi guna diravadia danu umui tomadiho henia noho.
10 Inai lau ura lasi kara umui karaia noho, vadaeni lauegu vairanai, egu Dubu Helaga lalonai umui gini, umui gwau, ‘Ai be do ai mauri!’ Inai dika umui karaia noho ena davana be mauri, a?
11 Umui laloa lauegu Dubu Helaga be henaoa taudia edia hunia gabuna, a? Lau ese umui karaia noho karadia lau itaia vadaeni.
12 “Silo dekenai do umui lao, bona unai gabu dekenai dahaka lau karaia do umui itaia. Guna lau ese Silo lau abia hidi, umui ese lau do umui tomadiho henia gabuna, to gabeai Israela edia kara dika lau itaia neganai, unai gabu lau hadikaia ore.
13 Umui ese unai bamona kara dika ibounai umui karaia vadaeni. Lau Lohiabada ese nega momo umui lau sisiba henia unai emui kara dika dainai, to umui kamonai lasi. Bona lau be umui dekenai lau boiboi neganai, umui haere lasi lau dekenai.
14 Unai dainai, inai lauegu Dubu Helaga, umui ese umui abidadama henia gabuna, be do lau hadikaia ore, Silo lau hadikaia ore hegeregerena.
15 Bona egu vairana dekena amo umui do lau lulua ore, emui varavara, Israela taudia lau lulua ore hegeregerena. Lau inai Lohiabada, lau hereva vadaeni.”
Iuda taudia ese Lohiabada ena hereva idia kamonai henia lasi
16 Lohiabada ese ma ia hereva, ia gwau, “Ieremia e, inai bese taudia totona do oi guriguri lasi, idia dainai lau dekenai do oi noinoi lasi. Badina lau be oi dekenai do lau kamonai lasi.
17 Iuda hanua ta ta dekenai bona Ierusalema ena ariara dekenai taunimanima edia kara oi itaia lasi, a?
18 Memero bona kekeni ese lahi audia idia haboua noho, edia tamadia ese lahi idia gabua, bona hahine taudia ese paraoa idia mikisi, keke idia gabua, hahine dirava, ena ladana be, ‘Guba ena kwini,’ dekenai do idia henia totona. Ma idau dirava haida dekenai uaina bouboudia idia bubua noho. Inai karadia idia karaia noho, lau do idia hadikaia totona, ani?
19 To idia ese lau do idia hadikaia momokani diba, a? Lasi. Idia be idia sibona idia hadikaia noho, bona idia sibona edia latanai hemarai idia atoa noho.
20 Unai dainai lau Lohiabada Dirava ese lauegu badu bada herea inai Dubu Helaga ena latanai do lau atoa. Ma egu badu be taunimanima bona ubua gaudia, bona uma audia, bona uma ena anina danu edia latanai do lau bubua diho. Lauegu badu be siahu momokani, idia habodoa diba lasi lahi bamona.
21 “Lau, Israela ena Dirava, Siahu Ibounai Lohiabada, ese emui boubou karadia lau itaia, be haida umui gabua ore momokani, to haida umui ania diba. To umui dika dainai, lau ese umui lau hamaoroa inai: Boubou vamuna ibounai do umui ania namo!
22 Umui emui sene taudia Aigupito dekena amo lau hakaudia neganai, lau ese oda ta lau henidia lasi boubou totona o boubou gabua totona.
23 To lau ese lau oda henidia gauna korikori be inai: Idia ese lauegu hereva do idia kamonai henia, unai neganai lau be idia edia Dirava do lau lao, bona idia be lauegu bese do idia lao. Bona lau hamaorodia, lauegu oda hegeregerena do idia noho, vadaeni edia noho be do ia namo.
24 To lau dekenai idia kamonai henia lasi, lauegu hereva idia laloa lasi. Idia ese sibodia edia laloa dikadia bona laloa kerere hegeregerena idia karaia noho. Bona idia edia kara ese edia mauri ia hanamodia lasi, to ia hadikadia.
25 Umui emui sene taudia be Aigupito dekena amo idia raka hamatamaia dinana ia mai bona hari, lau ese egu hesiai taudia peroveta taudia umui dekenai lau siaia. Lauegu hereva umui dekenai idia hadibaia.
26 To umui ese egu hereva umui kamonai lasi, bona umui laloa lasi. Lasi momokani. Umui ese emui laloa dikadia bona emui laloa kerere hegeregere umui karaia, bona emui kara ena dika ese emui sene taudia edia dika ia hanaia.
27 “Unai dainai, Ieremia, oi ese inai lauegu hereva egu bese taudia do oi hamaoroa, to idia ese oi dekenai do idia kamonai lasi. Oi ese idia dekenai do oi boiboi, to idia ese oi dekenai do idia haere lasi.
28 Bona oi ese idia do oi hamaoroa, oi gwau, ‘Inai umui emui bese taudia ese, Lohiabada, emui Dirava idia kamonai henia lasi. Bona matakani umui dekenai Lohiabada ese ia henia, to umui abia dae lasi. Umui emui abidadama be ia ore vadaeni, bona abidadama umui herevalaia lou lasi momokani.’ ”
Hinoma Koura dekenai taunimanima ese kara dika bada idia karaia
29 Ierusalema taudia e, do umui taitai.
Emui huina do umui utua,
do umui negea ore.
Ororo ataiai dekenai emui mase ane do umui abia.
Badina umui ese Lohiabada umui habadua vadaeni,
bona ia ese iena bese ia negea vadaeni.
30 Lohiabada ia hereva, ia gwau, “Iuda taudia ese kara dika bada idia karaia vadaeni. Idia ese edia kaivakuku, lau ura lasi momokani gaudia, egu Dubu Helaga lalonai idia atoa, bona Dubu idia hamiroa vadaeni.
31 Hinoma Koura dekenai boubou patana ta ena ladana be Topete idia haginia vadaeni. Bona unai Topete dekenai, edia natuna memero bona natuna kekeni be lahi dekenai idia gabua ore, boubou totona. Lau ese unai bamona kara lau oda henidia lasi, bona unai kara lau laloa lasi momokani.
32 Unai dainai lau Lohiabada ma lau gwau, negana be do ia mai, ‘Topete’ bona ‘Hinoma ena Koura’ do idia gwauraia lou lasi, to ‘Taunimanima Alaia ena Koura.’ Unai gabu dekenai taunimanima do idia guria, badina idau gabudia dekenai be gabu ta lasi.
33 Vadaeni inai bese taudia edia tauanina be ataiai manudia bona uda boromadia ese do idia ania, tau ta ese do ia luludia diba lasi.
34 Vadaeni Iuda hanua ta ta bona Ierusalema ena ariara dekenai, kiri bona moale ena regena be do lau hadokoa, bona headava matamata tauna bona hahine edia gadona danu. Badina be unai tano be tano kaukau, anina lasi gabuna, do ia lao.”