☰ 1 KING TAUDIA 1
KING TAUDIA EDIA BUKA GINIGUNANA
1
King Davida ia buruka lao
1 King Davida ia buruka vadaeni, iena mauri lagani be momo. Dabua momo ia karaia, to unai dabua ese iena tauanina idia hasiahua lasi. 2 Unai dainai iena hesiai taudia idia hamaoroa, idia gwau, “Lohia e, mani emu kara, kekeni namona ta do ai tahua, ia ese oi dekenai do ia noho, bona oi do ia naria totona. Ia ese oiemu kemena dekenai do ia hekure, bona oi do ia hasiahua.”
3 Vadaeni Israela tano ibounai dekenai kekeni namona ta idia tahua. Bona Abisaga, Suneme kekeni, idia davaria, bona king Davida dekenai idia hakaua lao. 4 Ia be kekeni mai ena hairaina momokani. Ia ese king ia naria namonamo, to king ese ia sihari henia lasi.
Adonaisa ese terona ia abia kava
5 Adonaisa, iena tamana be Davida, iena sinana be Hagiti, be sibona ia hekokoroku, ia gwau, “Lau be king dagi do lau abia.” Vadaeni ia ese kariota, bona hosi, bona tatau 50 danu ia abia, iena vairana dekenai idia heau totona. 6 Iena tamana Davida ese nega ta ia gwau henia lasi, ia gwau lasi, “Badina dahaka unai bamona oi karaia?” Adonaisa be toana namo tauna, bona ia be Abesaloma murinai ia vara tauna.
7 Adonaisa ese Ioaba Seruia bona hahelagaia tauna Abiatara danu idia hereva hebou, vadaeni idia ese Adonaisa idia durua, bona iena murinai idia raka. 8 To hahelagaia tauna Sadoka, bona Benaia Iehoiada, bona peroveta tauna Natana, bona Simei, bona Rei, bona Davida ena tuari taudia goadadia, be Adonaisa danu idia haboua lasi.
9 Vadaeni Adonaisa be gabu ta ladana Gaigai Nadina dekenai ia lao, Ene Rogele ranu guri kahana dekenai. Unuseni ia ese mamoe bona boromakau namodia, bona ubua gaudia, be boubou totona ia alaia, bona henia. Bona ia ese unuseni king Davida ena natuna haida ia boiria, king ena hesiai taudia Iuda tanona dekena amo danu ia boiria. 10 To iena tadina Solomona ia boiria lasi, peroveta tauna Natana bona Benaia bona Davida ena goada taudia danu ia boiria lasi.
Solomona be king idia halaoa
11 Vadaeni peroveta tauna Natana ese Solomona ena sinana, Bataseba ia hamaoroa, ia gwau, “Sedira oi kamonai Adonaisa, Hagiti ena natuna ese king dagi ia abia vadaeni, bona iseda lohia Davida be ia diba lasi, a? 12 Mani oi kamonai! Oiemu mauri, bona oiemu natuna Solomona ena mauri do oi hamauria! 13 King Davida dekenai do oi lao haraga, do oi hamaoroa, oi gwau, ‘Lauegu lohia bona king e, oi ese lau dekenai oi gwauhamata, oi gwau lauegu natuna Solomona ese oiemu terona bona king dagi do ia abia, ani? To hari be edena bamona Adonaisa ese king dagi ia abia vadaeni?’ 14 Vadaeni king dekenai oi hereva noho neganai, lau danu be oiemu murinai do lau raka vareai, oiemu hereva do lau hamomokania.”
15 Unai dainai Bataseba be king dekenai ia lao, king ena daiutu lalonai. King ia buruka momokani, bona Abisaga, Suneme kekeni, ese iena hesiai gaukara ia karaia noho. 16 Bataseba be ia tui diho, king Davida dekenai ia tomadiho. Vadaeni king ese ia nanadaia, ia gwau, “Oiemu ura be dahaka?”
17 Bataseba ese ia haere, ia gwau, “Lauegu lohia e, oi ese lau dekenai oi gwauhamata, Lohiabada oiemu Dirava ena ladana dekenai, oi gwau, ‘Oiemu natuna Solomona be lauegu murinai do ia king, bona lauegu terona dekenai do ia helai.’ 18 To hari Adonaisa ese king dagi ia abia vadaeni, bona oi, lauegu lohia bona king, oi diba lasi. 19 Adonaisa ese boromakau bona ubua gaudia bona mamoe momo herea boubou patana ena latanai ia henia vadaeni, boubou totona. Adonaisa ese oiemu natuna, hahelagaia tauna Abiatara, bona Ioaba, oiemu tuari biaguna unai boubou aria totona ia boiria vadaeni. To ia ese oiemu natuna Solomona ia boiria lasi. 20 Lauegu lohia bona king e, harihari Israela taudia ibounai ese oiemu hereva idia naria noho. Mani oi hamaorodia daika be oiemu murinai king dagi do ia abia. 21 Bema oi hereva lasi neganai, lau bona lauegu natuna Solomona be kerere taudia edia davana ai dekenai do idia henia.”
22 Bataseba do ia hereva noho neganai, peroveta tauna Natana be ia raka vareai. 23 Haida ese king idia hamaoroa, idia gwau, “Peroveta tauna Natana be iniseni ia noho.” Natana be king dekenai ia raka vareai, bona king ena vairanai ia tui diho, iena kwarana be tano dekenai ia atoa.
24 Vadaeni Natana ia gwau, “Lauegu lohia bona lauegu king e, oi ese oi hereva, oi gwau, ‘Adonaisa be lauegu murinai king dagi do ia abia, bona terona dekenai do ia helai, a?’ 25 Badina ia be hari dina dekenai ia lao, boromakau bona ubua gaudia, bona mamoe momo herea boubou patana dekenai ia henia. Bona king ena natuna ibounai, bona tuari biaguna Ioaba, bona hahelagaia tauna Abiatara be ia boiria vadaeni. Bona harihari idia be Adonaisa ena vairanai idia aniani bona inuinu noho, idia gwau, ‘King Adonaisa ena mauri do ia daudau!’ 26 To lau be ia ese ia boiria lasi, hahelagaia tauna Sadoka, bona Benaia Iehoiada bona Solomona danu ia boiridia lasi. 27 Lauegu lohia bona king e, inai kara be oi ese oi karaia, to oi ese oiemu hesiai taudia oi hamaoroa lasi, a? Oi hamaorodia lasi daika ese oiemu murinai oiemu terona dekenai do ia helai, a?”
28 Vadaeni king Davida be ia haere, ia gwau, “Bataseba do oi boiria, lau dekenai do ia mai.” Vadaeni Bataseba be king dekenai ia raka vareai, iena vairanai ia gini.
29 Unai neganai king Davida ese gwauhamata metauna ia gwauraia, ia gwau, “Mauri Lohiabada, kerere ibounai dekena amo lau ia hamauria Dirava, ena ladana dekenai oi dekenai lau gwauhamata inai: 30 Guna oi dekenai lau gwauhamata, oiemu natuna Solomona be lauegu murinai king dagi do ia abia, be hari dina lau hamomokania inai, bona ia be lauegu terona dekenai do ia helai.”
31 Vadaeni Bataseba ia tui diho, iena vairana be tano dekenai ia atoa, king ena vairana dekenai, bona ia gwau, “Lauegu lohia, king Davida e, do oi mauri ela bona hanaihanai.”
32 King Davida ia gwau, “Hahelagaia tauna Sadoka bona peroveta tauna Natana bona Benaia Iehoiada do umui boiria.” Vadaeni idia raka vareai, king Davida ena vairana dekenai. 33 Davida ese idia ia hamaoroa, ia gwau, “Lauegu hesiai taudia do oi abia lao, bona lauegu natuna Solomona be lauegu doniki dekenai do oi atoa, ia guia. Vadaeni do umui hakaua lao Gihona dekenai. 34 Gihona dekenai hahelagaia tauna Sadoka bona peroveta tauna Natana ese Solomona dekenai olive dehoro do idia bubua, bona Israela ena king do idia halaoa. Vadaeni, kibi do umui hiriria, umui gwau, ‘King Solomona ena mauri do ia daudau!’ 35 Bona umui be Solomona ena murinai do umui mai, ia be do ia mai, lauegu terona dekenai do ia helai, badina ia be king, lauegu gabu dekenai. Lau ese Solomona lau abia hidi vadaeni, ia ese Israela bona Iuda do ia gunalaia.”
36 Benaia Iehoiada ese king dekenai ia haere, ia gwau, “Amen! Lohiabada, lauegu lohia bona king ena Dirava ese do ia hamomokania. 37 Lohiabada ese lauegu lohia bona lauegu king ia bamoa hegeregerena, ia ese Solomona danu do ia bamoa, bona Lohiabada ese iena terona do ia habadaia, vadaeni lauegu king Davida ena terona do ia hereaia momokani.”
38 Vadaeni Sadoka, hahelagaia tauna, bona Natana, peroveta tauna, Benaia Iehoiada, bona Kerete taudia bona Pelete taudia, be idia diho lao, Solomona be king Davida ena doniki dekenai idia atoa, ia helai. Bona idia hakaua lao ela bona Gihona. 39 Sadoka ese doa ta mai olive dehoro danu Palai Dubu dekena amo ia abia, Solomona dekenai unai dehoro ia bubua. Unai murinai kibi idia hiriria, bona taunimanima ibounai idia gwau, “King Solomona ena mauri do ia daudau!” 40 Vadaeni taunimanima ibounai be Solomona ena murina dekenai idia raka lao, mai moale danu idia boiboi, ivilikou idia gadaralaia, bona edia regerege ese tano danu ia hamarerea.
41 Adonaisa bona iena vadivadi taudia ibounai be edia aria ena dokona neganai unai regerege idia kamonai. Ioaba be kibi ena regerege ia kamonai neganai ia henanadai, ia gwau, “Unai regerege hanua dekenai ena anina be dahaka?”
42 Ia be do hereva noho neganai, Ionatana, hahelagaia tauna Abiatara ena natuna ia mai. Adonaisa ese ia nanadaia, ia gwau, “Mani oi raka vareai, badina oi be tau namona, sivarai namona oi mailaia noho, ani?”
43 Ionatana ese Adonaisa dekenai ia haere, ia gwau, “Lasi, badina be iseda lohia king Davida ese Solomona be king ia halaoa vadaeni. 44 King Davida ese hahelagaia tauna Sadoka bona peroveta tauna Natana bona Benaia Iehoiada bona Kerete taudia bona Pelete taudia be ia siaidia, Solomona idia abia, bona king ena doniki latanai idia atoa vadaeni. 45 Sadoka bona Natana ese Solomona dekenai olive dehoro idia bubua, Gihona ranu gabuna dekenai. Unai murinai hanua dekenai idia daekau lao mai moale bada danu, bona hanua dekenai regerege bada ia vara. Umui kamonai vadaeni regena be unai. 46 Ma danu, Solomona ese king ena terona latanai ia helai noho. 47 Bona inai danu, king ena hesiai taudia badadia be king Davida hanamoa totona idia lao, idia gwau, ‘Oiemu Dirava ese Solomona ena ladana ena sivarai do ia habadaia, oiemu ladana do ia hereaia, bona Solomona ena basileia sivaraina do ia bada, oiemu basileia ena sivarai do ia hereaia danu.’ Unai murinai king Davida ese iena mahuta patana latanai iena kwarana ia atoa diho, ia tomadiho, 48 ia gwau, ‘Lohiabada, Israela ena Dirava do ita hanamoa, badina ia ese hari dina lauegu natuna ta dekenai king dagi ia henia vadaeni, bona lau mauri noho lalonai lauegu matana ese idia itaia vadaeni.’ ”
49 Adonaisa ena vadivadi taudia ibounai idia gari bada, vadaeni idia toreisi, ta ta edia dala dekenai idia lao. 50 Adonaisa danu be Solomona dekenai ia gari, vadaeni ia toreisi, ia lao, Palai Dubu ena boubou patana doana ia dogoatao. 51 Haida ese Solomona idia hamaoroa, idia gwau, “Adonaisa be oi dekenai ia gari noho, vadaeni boubou patana ena doana ia dogoatao noho, ia gwau, “Lauegu noinoi ginigunana be, Solomona ese lau dekenai do ia gwauhamata, lau do ia alaia lasi.”
52 Solomona ia haere, ia gwau, “Do lau diba guna, bema lau dekenai ia kara namo, iena huina ta do lau hadikaia lasi, to bema dika ta ia dekenai lau davaria, ia be do ia mase.” 53 Vadaeni king Solomona ese haida ia siaia, idia ese Adonaisa boubou patana dekena amo idia hakaua. Vadaeni Adonaisa ia mai, king Solomona dekenai ia tomadiho. Bona Solomona ese ia hamaoroa, ia gwau, “Oiemu ruma dekenai oi lao.”
☰