7
Solomona ena ruma idia haginia
1 Lagani 13 lalonai Solomona ese iena noho ruma ena kahana ibounai ia haginia ela bona ia haorea.
2 Ruma ta ena ladana be Lebanona Uda ena Ruma be Solomona ena gaukara taudia ese idia haginia. Iena lata be 44 mita, iena lababa be 22 mita, bona iena ataiai ena lata be 13 mita mai kahana. Ruma ena du be sida au dekenai idia karaia, du edia laini be toi, laini ta ta be du 15, du ibounai 45. Sida au badadia bona latadia be unai du edia kwarana laini toi edia latanai idia atoa.
3 Ruma ena guhi audia be sida reirei. Inai reirei be unai sida au latadia laini toi edia latanai idia kokoa.
4 Uindo ena laini be toi, bona ruma ena kahana kahana dekenai uindo edia laini bona edia gabu be hegeregere.
5 Iduara ibounai bona uindo ibounai edia kwarana be sikoea. Uindo ta ta edia gabu ruma kahanai, be uindo ta ta kahana dekenai edia gabu hegeregerena.
6 Ruma ma ta ena ladana Du Badadia Ruma be Solomona ese ia haginia. Ena lata be 22 mita, bona iena lababa be 13 mita mai kahana. Inai ruma ena vairana dekenai dehe ia noho, mai ena du bona mai ena guhi danu.
7 Ma ruma ta ladana Terona Ruma danu ia haginia, ena ladana ta be Kota Henia Gabuna. Unuseni Solomona ese taunimanima edia hepapahuahu ia hamaoromaoroa. Inai ruma ena haba be sida reirei dekena amo idia koua, foloa dekena amo ela bona guhi.
8 Bona, unai ruma ena murina kahana dekenai, Solomona ena noho ruma danu idia haginia. Idia haginia dalana be unai Terona Ruma idia haginia dalana bamona. Ma inai iena ruma bamona ruma ta be Solomona ena adavana totona idia haginia. Unai adavana be Aigupito king ena natuna hahine.
9 Inai ruma ibounai be davana bada nadi dekena amo idia haginia, foloa dekena amo ela bona guhi dekenai. Ruma edia magu danu be unai bamona nadi dekenai idia haginia. Nadi ta ta ibounai idia utua namonamo, bona maoromaoro, bona edia bada korikori dekenai, bona idia ibounai idia hamanadaia namonamo danu.
10 Ruma ena henunai idia noho badina nadi be nadi badadia momokani, davana bada gaudia. Haida edia lata be mita toi mai kahana, haida edia lata be 4 mita.
11 Inai nadi badadia edia latanai be nadi namodia, idia utua maoromaoro, bona edia bada korikori dekenai gaudia, bona sida au badadia danu.
12 Solomona ena ruma ibounai edia magu badana be inai bamona idia haginia: Idia utua namonamo nadi laini toi idia atoa, bona edia latanai sida au badadia ena laini tamona idia atoa. Lohiabada ena Dubu Helaga ia hagegea magu danu be unai bamona dalana dekenai idia haginia, Dubu Helaga ena raka vareai daiutu ena magu danu.
Hurama be king Solomona dekenai ia gaukara
13 Vadaeni king Solomona ese hereva ia siaia, bona Hurama be Turo dekena amo idia hakaua mai.
14 Inai Hurama be vabu ta ena natuna. Vabu be Napatali iduhu dekena amo, to Hurama ena tamana be Turo tauna, auri laboralabora gaukaralaia tauna.
Hurama be mai ena aonega, bona auri laboralabora ia gaukaralaia diba momo. King Solomona ese unai bamona gaukara ibounai ena biaguna Hurama ia halaoa.
Auri laboralabora du badadia rua
15 Hurama ese du badadia rua auri laboralabora ia havevea dekena amo ia karaia. Inai du ruaosi edia lata be 8 mita bona edia kuboro be 5 mita bona 30 sentamita. Du ruaosi be paipa bamona, edia lalona anina lasi, bona edia auri laboralabora ena udunana be tau ena kwakikwaki 4 edia udunana hegeregerena. Du ruaosi edia bada be tamona.
16 Hurama danu ese inai du edia kwarana gaudia be auri laboralabora dekena amo ia karaia. Idia be du edia latanai atoa gaudia. Inai kwarana ruaosi edia lata be 2 mita 20 sentamita.
17 Bona auri laboralabora dekena amo seini namodia, edia toana be herahera namona bamona ia karaia, bona inai seini be du edia kwarana dekenai ia atoa. Du ta ta edia kwarana be inai seini 7 idia hagegea, herahera ena toana bamona.
18 Unai du kwarana ta ta dekenai danu be edia auri laboralabora dekenai apolo laini rua ia koroa, herahera namona ena toana.
19 Inai du kwarana ruaosi edia toana be uro, o herahera ena ladana sosana bamona, bona sosana edia lata be mita ta 80 sentamita.
20 Du edia kwarana be kuboru, bona kuboru ena latanai Hurama ese reke bamona herahera ia koroa. Bona inai reke ena latanai apolo huahua laini rua dekenai ia koroa. Du ta ta edia apolo be 200.
21 Hurama ese inai du ruaosi be Dubu Helaga ena iduara badana ena vairanai ia haginia, ta be iduara ena diho kahanai, ena ladana ia atoa “Iakina,” ma ta be iduara ena mirigini kahanai, ena ladana ia atoa, “Boasa.”
22 Du edia latanai be edia kwarana idia noho, edia toana be uro, o herahera ena ladana sosana bamona.
Vadaeni du badadia karaia bona haginia gaukara be idia haorea.
Auri laboralabora ranu tanika
23 Hurama ese tanika badana auri laboralabora dekena amo ia karaia. Inai tanika be kuboru, iena ataiai ena lata be mita rua 20 sentamita, bona iena lababa be 4 mita 40 sentamita, bona iena kuboru be 13 mita 20 sentamita.
24 Tanika ena isena ena murimurina dekenai, be kiukamba edia laulau laini rua idia koroa, 500 sentamita ibounai lalonai be kiukamba 10 idia koroa. To unai laulau be gabu ta dekenai idia gaukaralaia, bona gabeai idia kwatua kau lasi. Lasi. To tanika idia karaia neganai, unai kiukamba laulaudia be nega tamona idia koroa.
25 Hurama ese danu boromakau tau 12 auri laboralabora dekena amo ia karaia, bona inai tanika be boromakau edia doruna dekenai ia atoa. Boromakau laulau edia kununa be tanika ena henunai idia noho, bona edia kwarana be kahana ibounai dekenai idia lao, toi ese mirigini kahana dekenai edia matana idia negea, ma toi be dina diho kahanai, ma toi be diho kahanai, ma toi be dina daekau kahanai.
26 Tanika ena auri laboralabora ena udunana be 8 sentamita hegeregerena. Tanika ena isena be kapusi ena isena hegeregerena, sosana herahera ena toana bamona. Inai tanika ese ranu ibounai 40,000 lita ia dogoatao diba.
Hurama ese auri laboralabora dekena amo treila ia karaia
27 Hurama ese auri laboralabora dekena amo treila ibounai 10 ia karaia, ranu tanika maragidia dogoatao gaudia. Inai treila ta ta edia lata be mita ta, 80 sentamita, edia lababa danu be mita ta 80 sentamita, bona edia ataiai lata be mita ta 30 sentamita.
28 Treila ia karaia dalana be inai: Guna be auri laboralabora dekena amo treila ena turia ia karaia, bona unai turia dekenai treila ena haba 4, auri laboralabora palaka gaudia idia kwatua kau.
29 Unai haba ta ta dekenai, turia edia huanai, be laiona, boromakau tau, bona aneru edia laulau idia koroa. Turia dekenai danu unai bamona herahera idia koroa. Unai laiona bona boromakau edia ataiai bona henunai danu be herahera edia toana kuboru laulaudia hama maragidia dekena amo idia karaia namonamo.
30 Treila ta ta be mai edia uili, auri laboralabora gaudia, bona auri laboralabora akiseli rua ese unai uili idia dogoatao. Treila edia kona 4 dekenai auri laboralabora du kwadogidia idia noho, tanika maragidia do idia dogoatao totona. Inai du kwadogidia be mai edia herahera toana kuboru gaudia danu.
31 Tanika maragidia be treila ena latanai do idia helai namonamo totona, gau kuboruna ta, rini hegeregerena be auri laboralabora dekena amo idia karaia. Inai rini be treila ena haba 4 edia lalona kahadia dekenai, bona unai du kwadogidia edia latanai ia helai. Rini ena ataiai be 45 sentamita dekenai treila ena ataiai ia hanaia, bona rini ena henunai be 18 sentamita dekenai treila ena lalonai ia diho, bona unuseni du maragidia latanai ia helai. Rini ena latanai be herahera danu idia koroa hagegea.
32 Treila ena uili edia ataiai, tano dekena amo be 66 sentamita. Inai uili 4 be treila ena haba 4 bona ena foloa edia henunai. Uili ena akiseli be treila danu auri laboralabora tamona dekena amo, nega tamona idia karaia.
33 Inai uili be kariota uili edia toana bamona, edia akiseli, edia isena kuboruna, edia sipoka, bona edia akiseli toia vareai gaudia ibounai be auri laboralabora dekena amo idia karaia.
34 Treila ena kona 4 dekenai idia noho du kwadogidia be treila danu nega tamona idia karaia.
35 Auri laboralabora isena kuboruna be treila ena ataiai idia karaia. Iena ataiai latana be 22 sentamita, bona unai isena idia dogoatao auri laboralabora gaudia be treila danu nega tamona idia karaia.
36 Unai isena idia dogoatao auri laboralabora gaudia bona treila ena haba 4 dekenai be aneru, laiona bona pama audia idia koroa, gabu ia noho hegeregerena. Bona herahera haida danu idia koroa hagegea.
37 Treila 10 be unai dala dekenai Hurama ese ia karaia. Idia ibounai edia toana be tamona. Edia bada bona edia toana be hegeregere.
38 Hurama ese danu ranu tanika maragidia 10 ia karaia, ta ta be treila ta ta dekenai do idia atoa totona. Inai tanika maragidia edia bada be mita ta 80 sentamita, bona tanika maragina ta ese ranu ena bada 800 lita ia dogoatao diba.
39 Hurama ese treila 5 be Dubu Helaga ena diho kahanai ia atoa, ma treila 5 be Dubu Helaga ena mirigini kahanai ia atoa. Bona Hurama ese tanika badana be Dubu Helaga ena laurabada kona kahirakahira ia atoa.
Dubu Helaga totona Hurama ese ia karaia gaudia edia lisi
40 Hurama ese danu uro, bona sipeidi, bona disi ibounai ia karaia. Ia ese King Solomona ia henia gaukara ibounai ia haorea, Lohiabada ena Dubu Helaga lalonai.
Hurama ese ia karaia gaudia be inai:
41 Du badadia ruaosi. Du edia kwarana gaudia, edia toana be uro bamona. Du edia kwarana dekenai reke bamona seini herahera gaudia.
42 Apolo huahua herahera ibounai 400, unai du kwarana ruaosi dekenai kwarana ta ta dekenai be laini rua, laini ta ta be apolo huahua 100.
43 Treila ibounai 10, mai edia ranu tanika maragidia 10.
44 Ranu tanika badana, bona iena henunai idia gini boromakau tau 12.
45 Uro, sipeidi bona disi.
Hurama ese Solomona ena hereva dainai inai gaudia ibounai Lohiabada ena Dubu Helaga totona ia karaia. Idia ibounai be auri laboralabora dekena amo ia karaia, bona idia ia hadiaria namo herea.
46 Guna king Solomona ese Hurama ia hamaoroa, inai gaudia ibounai be Ioridane Sinavai ena Koura dekenai do ia karaia, gabu ta, Sukoto hanua bona Saretana hanua edia huana dekenai. Unai gabu dekenai be raro tano namona ia noho.
47 Solomona ese unai gau ibounai edia metau ia abia lasi, badina idia be momo herea. Idia ibounai be Hurama ese auri laboralabora dekena amo ia karaia. To tau ta ese edia metau ia diba lasi.
Golo dekenai karaia gaudia danu be Dubu Helaga lalonai idia atoa
48 Ma Solomona ese gaukara taudia ia hamaoroa, gau haida ma, golo dekena amo do idia karaia. Vadaeni Solomona ena hereva dainai inai gaudia idia karaia:
Pata helagana, golo gauna.
Paraoa helagana patana, golo gauna.
49 Lamepa dogoatao gaudia ibounai 10, golo gaudia, idia be Helaga Herea Gabuna ena vairanai idia gini, 5 be lauri kahanai, bona 5 be idiba kahanai.
Golo palauapalaua edia herahera, bona lamepa, bona gida dogoatao pakosi, idia ibounai be golo gaudia.
50 Golo namona disi, lamepa hagoevaia gaudia, rara bubua totona urodia, lahi huaia kapusi, bona bonana namo muramura idia lalonai atoa totona kapusi gaudia. Idia ibounai be golo gaudia.
Iduara edia hinisi, be golo dekena amo idia karaia. Helaga Herea Gabuna ena iduara, bona Dubu Helaga ena iduara badadia ibounai totona hinisi gaudia.
51 Vadaeni king Solomona ese Lohiabada ena Dubu Helaga ena gaukara ibounai ia karaia, ela bona idia ore. Unai neganai iena tamana Davida ese Lohiabada dekenai ia hahelagaia gaudia ibounai be Solomona ese Dubu Helaga ena kohu haboua sitoa gabuna dekenai ia udaia. Gaudia be inai: Siliva bona golo gaudia, uro bamona gaudia, pata bona helai gaudia.