9
Dirava ese Iehu ia abia hidi, Israela ena king dagi do ia abia
1 Vadaeni peroveta tauna Elisaia ese peroveta taudia orea uhau tauna ta ia boiria, ia hamaoroa, ia gwau, “Oiemu dabua oi kwatua, inai olive dehoro kavabu oiemu imana dekenai oi abia, Ramoto Gileada dekenai oi lao.
2 Do oi ginidae neganai, Iehu, Iehosapata Nimisi ena natuna do oi tahua. Ruma ta ena lalona momokani daiutu ta dekenai, iena turana idia noho lasi gabuna dekenai, do oi hakaua vareai.
3 Vadaeni unuseni inai olive dehoro be Iehu ena kwarana dekenai do oi bubua, do oi gwau, ‘Lohiabada ese oi ia gwauraia hidi inai, ia gwau: Oi be Israela ena king, lau ese oi lau hasiahua inai.’ Unai kara oi haorea murinai, maoromaoro iduara do oi kehoa, oi heau, oi naria kava lasi!”
4 Vadaeni, unai uhau, peroveta tauna, be Ramoto Gileada dekenai ia lao.
5 Unuseni ia ginidae neganai, tuari biagudia be idia helai hebou noho, vadaeni ia gwau, “Lohia e, lau be mai egu hereva oi dekenai.”
Iehu ia gwau, “Ai daika oi ura hereva henia?”
Peroveta tauna ia gwau, “Lohia e, oi dekenai.”
6 Unai dainai Iehu bona peroveta tauna ruaosi ese haida idia rakatania, ruma ena lalona daiutu dekenai idia raka vareai. Vadaeni unai uhau peroveta tauna ese olive dehoro be Iehu ena kwarana dekenai ia bubua, ia hamaoroa, ia gwau, “Lohiabada, Israela ena Dirava, ese inai bamona ia hereva, ia gwau, ‘Lau Lohiabada ese, Israela ena king be oi lau hasiahua inai. Oi ese egu bese Israela do oi biagua.
7 Oiemu biaguna Ahaba ena bese taudia do oi alaia mase. Unai dekena amo egu hesiai taudia, peroveta taudia, bona egu hesiai taudia haida, Iesebele ese ia hamasea taudia, edia rara ena davana Iesebele dekena amo do lau abia.
8 Ahaba ena bese taudia ibounai do oi alaia ore, badina be Ahaba ena bese tatau bona memero ibounai, guia taudia bona guia lasi taudia, do lau alaia mase.
9 Ahaba ena bese taudia be Ieroboama Nebata ena bese bona Basa Ahaisa ena bese hegeregerena do lau hadikaia ore.
10 Bona Iesebele be tau ta ese do ia guria lasi, sisia ese Iesebele do idia ania ore, Ieserele ena tano dekenai.’ ”
Unai bamona ia hereva murinai, unai uhau peroveta tauna ese iduara ia kehoa, vadaeni ia heau.
11 Iehu be iena bamona tuari biagudia dekenai ma ia lao, vadaeni idia ese ia idia nanadaia, idia gwau, “Oi namo o lasi? Badina dahaka unai kavakava tauna be oi dekenai ia mai?”
Iehu be idia dekenai ia haere, ia gwau, “Unai tau be umui diba, bona iena hereva danu umui diba momokani!”
12 Idia haere, idia gwau, “Oi koikoi noho, unai tau ena hereva ai diba lasi! Iena hereva ai dekenai oi hamaoroa.”
Iehu ia gwau, “Iena hereva lau dekenai be inai: Lohiabada ese ia hereva, oi be Israela ena king lau hasiahua inai.”
13 Vadaeni nega tamona idia ibounai ta ta edia dabua idia kokia haraga, bona ruma ena vadavada latanai unai dabua idia atoa kau namonamo. Unai neganai kibi idia hiriria, idia boiboi, idia gwau, “Iehu be king!”
Iehu ese Israela ena king Iorama ia alaia mase
14 Vadaeni Iehu, Iehosapata Nimisi ena natuna, ese Iorama hadikaia dalana ia tahua.
King Iorama be Israela tuari taudia ibounai danu Ramoto Gileada dekenai idia noho, Hasaele, Suria ena king do idia koua totona.
15 To tuari lalonai Suria taudia ese Iorama idia haberoa. Unai dainai Iorama be Ieserele dekenai ia giroa lou, iena bero be do idia namo lou totona.
Unai dainai Iehu ese iena opesa taudia ia hamaoroa, ia gwau, “Bema umui ese lau umui abia dae momokani emui king, do umui itaia namonamo, tau ta ese Ramoto dekena amo Ieserele dekenai do ia heau henia lasi, Iorama ena taudia hadibaia totona.”
16 Vadaeni Iehu be iena kariota dekenai ia guia, Ieserele dekenai ia lao, badina Iorama be unuseni. Ahasaia, Iuda ena king, danu Iorama do ia vadivadi henia totona unuseni ia noho.
17 Ieserele hanua ena magu ena ataiai ia gini gimaia tauna ta ese Iehu ena orea taudia ia itaia, idia mai noho. Vadaeni ia boiboi, ia gwau, “Orea ta ia mai noho, lau itaia inai.”
Iorama ia haere, ia gwau, “Hosi guia tauna ta do oi siaia, unai orea danu do ia hedavari, bona do ia kamonai idia be maino dekenai idia mai, o lasi.”
18 Vadaeni hosi guia tauna ia lao Iehu dekenai, ia gwau, “King Iorama ia ura diba oi be maino dekenai oi mai, o lasi?”
Iehu ia haere, ia gwau, “Oi dekenai maino be dahaka? Lauegu murinai do oi raka mai.”
Kohoro ena ataiai dekenai ia gini gima tauna ma ia hereva, ia gwau, “Iseda hosi guia tauna be orea dekenai ia ginidae, to ia giroa mai lasi.”
19 Vadaeni king ese hosi guia tauna iharuana ia siaia lao. Ia ese Iehu ma ia nanadaia, ia gwau, “King Iorama ia ura diba oi be maino dekenai oi mai, o lasi?”
Iehu ia haere, ia gwau, “Oi dekenai maino be dahaka? Lauegu murinai do oi raka mai.”
20 Ma kohoro ena ataiai dekenai ia gini gima tauna ma ia hereva, ia gwau, “Iseda hosi guia tauna be orea dekenai ia ginidae, to ia giroa mai lasi. Orea gunalaia tauna ese kava tauna bamona iena kariota ia haheaua haragaharaga noho. Unai be Iehu Nimisi lau laloa, badina iena kara be unai bamona.”
21 Iorama ia gwau, “Egu kariota do umui abia hegaegae.” Vadaeni kariota idia abia hegaegae, bona Iorama, Israela ena king, bona Ahasaia, Iuda ena king, be idia toreisi, ta ta ena kariota ena kariota dekenai idia guia, Iehu danu do idia hedavari totona idia lao. Vadaeni Naboto, Ieserele tauna, ena tano dekenai idia hedavari.
22 Iorama ese Iehu ia itaia, vadaeni ia gwau, “Maino dekenai oi mai noho, a?”
Iehu ia haere, ia gwau, “Maino be edena bamona ia vara diba, badina be oiemu sinana ena lebulebu karadia bona iena meamea karadia be iseda huanai do idia karaia momo noho?”
23 Iorama ese iena kariota ia veria hagiroa, ia heau, ia ese Ahasaia dekenai ia boiboi, ia gwau, “Ahasaia e, king hadikaia kara inai!”
24 Vadaeni Iehu ese iena peva ia veria, mai ena goada ibounai danu, bona ena diba dekenai Iorama ena doruna ia pidia, diba ese Iorama ena kudouna ia gwadaia. Iorama be iena kariota lalonai ia moru diho, ia mase.
25 Bona Iehu ese ia durua tauna Bidikara ia hamaoroa, ia gwau, “Iorama ena tauanina do oi abia, Naboto, Ieserele tauna ena tano dekenai do oi negea. Badina oi laloa, ita ruaosi be Iorama ena tamana Ahaba ena murinai kariota ita haheaua neganai, Lohiabada ese inai hadikaia hereva Ahaba totona ia gwauraia, ia gwau:
26 ‘Lau Lohiabada lau gwau, varani lau ese Naboto bona iena natuna tau edia rarana lau itaia, bona Ahaba dekena amo edia mase ena davana do lau abia, inai Naboto ena tano dekenai.’ Unai dainai Iorama ena tauanina do oi abia isi, Naboto ena tano dekenai do oi negea, Lohiabada ena hereva hegeregerena.”
Iehu ese Ahasaia ia alaia mase
27 Ahasaia, Iuda ena king, ese unai kara ia itaia, vadaeni ia be Bete Hagana ia lao dalana dekenai ia heau lao. Iehu ese ia lulua lao, bona iena tuari taudia ia oda henia, ia gwau, “Ahasaia danu do umui alaia mase!” Vadaeni idia haberoa. Idia haberoa gabuna be Guru hanua ia lao dalana dekenai, Ibileama hanua kakirakahira. To ia heau lao noho, ela bona Megido hanua dekenai ia ginidae, bona unuseni ia mase.
28 Iena opesa ese Ahasaia ena tauanina, kariota dekena amo Ierusalema dekenai idia abia lou. Unuseni Davida ena Hanua lalonai idia guria, iena tubuna bona tamana edia guria gabuna dekenai.
29 Iorama, Ahaba ena natuna, ena lohia lagani namba 11 lalonai, Ahasaia ese Iuda ia lohia hamatamaia.
Iesebele ia mase
30 Iehu be Ieserele dekenai ia ginidae neganai, Iesebele ia kamonai, vadaeni ia ese iena matana ia penia, bona iena huina dekenai herahera namodia ia atoa, vadaeni king ena ruma ena uindo dekena amo ariara ia itaia noho.
31 Iehu be magu ena iduara dekena amo ia heau vareai neganai, Iesebele ese ia boiboi henia, ia gwau, “Oi be Simiri ena kara tauna, oiemu king oi alaia mase! Maino dekenai oi mai, a?”
32 Iehu be magu iduara dekena amo Iesebele ia itaia, bona ia boiboi, ia gwau, “Daika idia ura lauegu orea dekenai idia vareai?”
Vadaeni hesiai taudia rua o toi be uindo dekenai idia hedinaraia.
33 Iehu ese idia ia boiboi henia, ia gwau, “Iesebele do umui negea diho!”
Vadaeni idia negea diho. Bona iena rarana be magu dekenai bona hosi dekenai ia pisi daekau. Iehu ese iena hosi bona kariota be Iesebele ena tauanina ena latanai ia haheaua, ia moia momokani.
34 Iehu ese king ena ruma dekenai ia raka vareai, ia aniani, ia inuinu, vadaeni ia gwau, “Unai hahine dikana do umui abia, do umui guria, badina ia be king ta ena natuna.”
35 To idia be Iesebele guria totona idia lao neganai, gau ta idia davaria lasi, kwarana ena koukouna, bona ena aena bona ena imana palapala sibona.
36 Vadaeni, idia lao, Iehu idia hamaoroa.
Iehu ia gwau, “Lohiabada ena hereva, iena hesiai tauna Elia, Tisebe tauna, ena uduna dekena amo ia gwauraia be inai: Ieserele ena tano dekenai, sisia ese Iesebele ena hidiona do idia ania,
37 bona Iesebele ena tauanina be Ieserele tano ena kopina do ia noho, hosi ena kukuri bamona. Unai dainai tau ta be do ia hereva lasi, ‘Iesebele ena tauanina be iniseni.’ ”