11
Goeva bona goeva lasi vamudia
1 Lohiabada ese Mose bona Arona ia oda henia, ia gwau,
2 “Israela taudia do umui hamaoroa inai bamona: Mauri gaudia tanobada dekenai idia noho, be ibounai do umui ania lasi, to inai sibona do umui ania:
3 Edia imana bona aena palapala idia auka bona parara, bona aniani idia ania murinai, uduna dekenai ma idia mumuta lou, vadaeni ma idia ania lou, unai bamona mauri gaudia umui ania diba.
4 “To unai bamona haida be do umui ania lasi. Kamelo do umui ania lasi, badina be iena aniani ia ania lou, to iena imana bona aena idia parara lasi. Ia be taravatu umui dekenai.
5 “Nadi dekenai ia noho rabito bona mada danu do umui ania lasi, badina be ena aniani ia ania lou, to iena imana bona aena palapala idia parara lasi. Ia be taravatu umui dekenai.
6 “Hea danu do umui ania lasi, badina be iena aniani ia ania lou, to iena imana bona aena palapala idia parara lasi. Ia be taravatu umui dekenai.
7 “Ma boroma danu do umui ania lasi. Iena imana bona aena idia parara vadaeni, to iena aniani ia ania lou lasi. Ia be miro umui dekenai.
8 “Inai mauri gaudia do umui ania lasi. Edia mase tauanina do umui dogoatao lasi, idia be miro umui dekenai.
9 “Ranu dekenai idia noho gaudia, do umui ania diba gaudia be inai: Davara o sinavai dekenai gwarume gaudia mai edia taiana bona mai edia unana.
10 To ranu dekenai idia noho mauri gaudia, mai edia taiana lasi, bona unana lasi, be do umui ania lasi momokani.
11 Unai bamona mauri gaudia be miro umui dekenai. Idia be do umui ania lasi, bona edia mase tauanina do umui dogoatao lasi.
12 Ranu dekenai idia noho gaudia mai edia taiana lasi bona unana lasi do umui ania lasi, umui dekenai idia taravatu.
13 “Inai bamona manu be do umui ania lasi. Idia be miro umui dekenai: Ugava badana, davara ugava bona ugava maragina.
14 Bona bogibada kakakakana bona bogibada koremana.
15 Bona galo, bona ia bamona manu ibounai danu.
16 Bona kokokoko, bona hanuaboi bogibada bona davara bogibada, bona bogibada idauidau ibounai.
17 Baimumu maragina, davara galo, bona baimumu badana.
18 Bona kanage, baimumu kurokurona, bona taunimanima noho lasi tano ena baimumu.
19 Bona noko, bona noko bamona manudia, bona mariboi, bona mariboi bamona manudia.
20 “Manumanu ibounai, idia roho gaudia, edia imana bona aena dekena amo tano dekenai raka gaudia do umui ania lasi, idia be miro umui dekenai.
21 To mai edia hanina bona imana bona aena gaudia haida, edia aena be lata, bona aena dekena amo idia roho lao noho,
22 unai gaudia be umui ania diba. Unai dainai kwadi idauidau umui ania diba.
23 To mai edia hanina bona imana bona aena gaudia orena ibounai do umui negea.
24 “Inai bamona gaudia ese umui do idia hamiroa. Daika ese edia mase tauanina ia dogoatao, be do ia miro noho ela bona dina do ia diho.
25 Bona edia tauanina do ia abia loaloa tauna be iena dabua do ia huria, bona ia sibona do ia miro ela bona dina do ia diho.
26 “Mauri gaudia, bema edia aena be auka, to idia parara lasi, o bema edia aniani idia ania lou lasi, be umui dekenai idia miro. Edia mase tauanina ia dogoatao tauna be do ia miro ela bona dina do ia diho.
27 Bona edia imana bona aena palapala idia manoka, to imana bona aena dekena amo idia raka gaudia danu be umui dekenai idia miro. Edia mase tauanina ia dogoatao tauna be do ia miro ela bona dina do ia diho.
28 Edia tauanina do ia abia loaloa tauna be iena dabua do ia huria, bona ia sibona do ia miro ela bona dina do ia diho.
29 “Inai bamona mauri gaudia, tano dekenai idia rau gaudia, be umui dekenai idia miro, gaudia be inai: Uda ena pusi, bita badana, bita maragina, ariha,
30 vaboha, siha, haba dekenai noho ariha.
31 Inai gaudia mai mauri danu, bona mase gaudia danu ia dogoatao tauna be do ia miro ela bona dina ia diho.
32 Bona bema inai rau gaudia idia mase neganai, edia tauanina be gau ta dekenai idia moru neganai, unai gau be ia miro. Sedira unai gau be au, o dabua, o mauri gauna ta ena kopina, o puse dabua, o gaukara totona gauna ta, to unai gau be ranu dekenai do umui udaia, bona ia be miro noho, ela bona dina ia diho.
33 “Bona bema inai mauri gaudia mirona ta ena mase tauanina be uro ta o hodu ta dekenai ia moru, unai uro o hodu ena anina gaudia danu be do idia miro. Bona umui ese unai uro o hodu do umui hamakohia.
34 “Unai uro ena aniani o hodu ena ranu, o unai uro ena ranu dekena amo idia nadua aniani be do idia miro.
35 Unai idia mase vadaeni gaudia edia tauanina dekenai idia moru gaudia ibounai be idia miro vadaeni. Bema amu o uro dekenai idia kamokau neganai, unai amu o uro do umui hamakohia.
36 “To bema ranu ia lohilohi gabuna o ranu guri dekenai idia kamokau neganai, unai ranu lohilohi gabuna o ranu guri be ia goeva noho. To tau ta o gau ma ta be unai gaudia edia mase tauanina dekenai idia kamokau neganai idia be miro.
37 “Bema unai mase gauna ta be do umui hadoa uhena ena latanai ia moru, unai uhe be ia goeva noho.
38 To bema unai uhe be ranu dekenai umui hapariparia murinai unai mase gauna ta be ia dekenai ia kamokau neganai, unai uhe be ia miro.
39 “Sedira mauri gauna ta, umui ania diba gauna ta ia mase, vadaeni bema tau ta ia dogoatao neganai, unai tau be ia miro noho ela bona dina ia diho.
40 Bona bema tau ta ese unai mase gauna ena kahana ta ia ania neganai, ia ese iena dabua do ia huria, bona ia be do ia miro noho ela bona dina ia diho. Unai mase gauna ena tauanina ia huaia tauna danu ese iena dabua be do ia huria, bona ia be do ia miro noho ela bona dina ia diho.
41 “Tano dekenai idia rau noho mauri gaudia maragidia do umui negea, do umui ania lasi.
42 Bogana dekenai idia rau, bona imana rua, aena rua dekena amo idia rau gaudia, bona aena momo gaudia, inai bamona tano dekenai idia rau noho gaudia ibounai do umui ania lasi, idia be dika.
43 Tano dekenai idia rau noho gaudia edia dika dekena amo do umui dika lasi, bona edia miro dekena amo do umui miro lasi.
44 “Badina lau be Lohiabada, umui emui Dirava, unai dainai do umui helaga, badina lau be helaga. Tano dekenai idia rau gaudia edia miro dekenai do umui miro lasi.
45 Lau be Lohiabada, Aigupito tano dekena amo umui lau hakaua mai, emui Dirava do lau lao totona. Unai dainai do umui helaga, badina lau be helaga.
46 “Mauri gaudia edia taravatu be unai, tanobada dekenai idia raka loaloa gaudia, bona ataiai idia roho manu, bona davara dekenai idia noho gaudia, bona tano dekenai idia rau gaudia danu.
47 “Miro gaudia be idau, goeva gaudia danu be idau. Edia idau do umui laloa namonamo. Do umui ania diba gaudia bona do umui ania diba lasi gaudia ena taravatu do umui kamonai henia namonamo.”