6
Lohiabada ese Israela ia samania
1 Lohiabada ena kota hereva Israela dekenai do umui kamonai. Lohiabada e, do oi toreisi, oiemu samania hereva do oi gwauraia. Namona be ororo ese oiemu kota hereva do idia kamonai.
2 Ororo e, bona umui goada herea nadi badadia, nega hanaihanai tano henunai umui noho, tanobada hagoadaia totona! Lohiabada ena samania hereva do umui kamonai. Lohiabada be mai ena samania hereva iena bese taudia dekenai. Ia ese Israela do ia gwau henia.
3 Vadaeni Lohiabada ia hereva, ia gwau, “Lauegu bese taudia e, edena kerere umui dekenai lau karaia? Dahaka metau umui emui latanai lau atoa, a? Lau dekenai do umui haere.
4 Lau sibona ese Aigupito dekena amo umui lau hakaua mai. Lau ese emui guia dekena amo umui lau hamauria. Lau ese Mose, bona Arona, bona Miriama lau siaia, idia ese umui do idia gunalaia totona.
5 “Lauegu bese taudia e, Moaba ena king Balaki ia ura karaia umui dekenai kara, do umui laloa lou. Bona Balama Beoro ese Balaki ia haere henia hereva danu do umui laloa. Umui durua totona lau karaia gaudia danu do umui laloa, Sitima kamepa bona Gilegala dekenai umui raka lao neganai. Unai kara badadia be lau ese lau karaia umui do lau hamauria totona. Unai kara do umui laloa, vadaeni egu kara maoromaoro do umui diba.”
Dahaka kara Lohiabada ia ura taunimanima do idia karaia?
6 Lau ese Lohiabada, guba ena Dirava lau tomadiho henia neganai, dahaka do lau mailaia? Sedira boromakau ena natudia namo herea momokani do lau mailaia, gabua bouboudia Lohiabada dekenai do lau henia, a?
7 Bema mamoe momo herea, duahia diba lasi, bona olive dehoro ena sinavai momo herea, danu lau mailaia neganai, do ia moale? Lauegu natuna vara guna Lohiabada dekenai do lau mailaia, egu kara dika davana karaia totona, a?
8 Lasi momokani! Lohiabada ese kara namo dalana ita ia hamaoroa vadaeni. Lohiabada ia ura ita karaia gauna be inai: Kara maoromaoro do ita karaia, taunimanima ibounai do ita lalokau henia nega ibounai, bona mai manau danu Dirava danu do ita raka hebou.
9 Bema ita be Lohiabada dekenai ita gari noho, inai be aonega ena kara ita karaia noho.
Lohiabada ese Ierusalema hanua badana dekenai ia boiboi noho, ia gwau, “Hanua badana taudia e, do umui kamonai!
10 Kara dika taudia edia ruma lalonai be gau namodia momo herea idia noho, idia ese koikoi dekena amo idia abia gaudia. Idia ese sikele koikoi idia gaukaralaia noho, bona inai kara lau ura lasi momokani.
11 Sikele koikoi idia gaukaralaia taudia be edena bamona edia dika do lau gwauatao diba?
12 “Hanua ena kohu momo taudia ese ogogami taudia edia gau idia abia kava, koikoi bona dagedage dekena amo. Bona umui ibounai be umui hereva koikoi noho.
13 Momokani, emui kara dika lau laloa noho dainai, lau ese umui do lau hadikaia kara lau hamatamaia noho inai.
14 “Umui be do umui aniani, to emui bogana do idia kunu lasi, umui be do hitolo noho. Umui ese emui ruma dekenai kohu umui haboua, to unai kohu be do idia boio. Badina be umui haboua namonamo gaudia be tuari dekenai do lau hadikaia ore!
15 “Umui ese koni umui hadoa, to ena anina do umui abia lasi. Umui ese olive huahua umui gigia, to olive dehoro dekena amo emui kopina do umui dahua lasi. Bona umui ese uaina umui karaia, to do umui inua diba lasi.
16 “Inai bamona kara be do idia vara, badina umui ese king Omeri bona iena natuna king Ahaba edia kara dikadia umui badinaia vadaeni. Idia edia kara ibounai be umui ese danu umui karaia noho. Unai dainai lau ese umui do lau hadikaia. Vadaeni idau bese taudia ese umui do idia kirikirilaia. Bona taunimanima ibounai, gabu ibounai noho taudia ese umui do idia ura henia lasi momokani.”