10
Iesu ese hahine negea kara ia herevalaia
1 Iesu ia toreisi, ia lao Iudea kahanai, bona Ioridane Sinavai unai kahanai, taunimanima momo idia haboua lou ia dekenai, ia hadibaia lou, nega ibounai ia karaia bamona.
2 Farisea taudia idia mai ia dekenai, idia ura koia, idia nanadaia, “Tau ta ena adavana ia negea kara be ia maoro o maoro lasi?”
3 Iesu ia haere henia, ia gwau, “Dahaka taravatu Mose ia henia umui dekenai?”
4 Idia gwau, “Mose ena taravatu be, headava hadokoa pepana tau ta ese ia torea, iena hahine dekenai ia henia, vadaeni ia negea.”
5 To Iesu ia hereva idia dekenai, ia gwau, “Umui emui lalona auka dainai Mose ese inai taravatu ia henia umui dekenai.
6 To gunaguna Dirava ese tanobada ia karaia neganai, ia ese taunimanima ia karaia, tau bona hahine.
7 Unai dainai tau ta ese iena tamana bona sinana ia rakatania, ia lao, adavana danu idia noho hebou.
8 Hari idia ruaosi tauanina be tamona. Unai dainai idia be rua lasi, to tamona sibona.
9 Dirava ese idia ia haboua vadaeni. Unai dainai taunimanima ese idia hamakohia, be mai taravatu.”
10 Idia mai lou ruma lalonai neganai, Iesu ena diba tahua taudia ese unai hereva ena anina idia tahua.
11 Iesu ese idia ia hamaoroa, “Tau ta ese iena adavana ia negea, bona hahine ta ia adavaia, unai be ia heudahanai karaia.
12 Hahine danu ese bema iena adavana ia negea, bona tau ta ia adavaia, unai be ia heudahanai karaia.”
Iesu ese maragidia ia hanamoa
13 Natudia maragi idia mailaia Iesu dekenai, idia ura iena imana idia edia latanai ia atoa, to diba tahua taudia ese idia lulua gwauraia.
14 To Iesu ia itaia, ia badu, ia gwau henia, ia gwau, “Lau ura maragi idia mai lau dekenai, umui lulua lasi, badina idia bamona be Dirava ena Basileia taudia.
15 Momokani lau hamaoroa umui, daika ese Dirava ena Basileia be natuna maragina bamona ia abia dae lasi, ia be do ia vareai lasi unuseni.”
16 Vadaeni maragidia ia rosia, bona iena imana ia atoa edia latanai, ia hanamoa.
Mauri hanaihanai hereva
17 Dala dekenai Iesu ia raka neganai, tau ta ia heau mai, ia tui diho Iesu vairanai, ia nanadaia, “Hadibaia tauna namona e, dahaka lau karaia, lau mauri hanaihanai abia totona?”
18 Iesu ia haere henia, ia gwau, “Badina dahaka oi hereva lau be namo? Tau ta ia namo lasi, Dirava sibona mo.
19 Taravatu oi diba, ‘Oi tau ta alaia lasi. Oi heudahanai lasi. Oi henaoa lasi. Oi samania koikoi lasi. Oi koikoi lasi. Oiemu tamana bona sinana oi hanamoa.’ ”
20 Inai tau ia haere henia, “Hadibaia tauna e, lau mero neganai ia mai bona harihari, inai taravatu ibounai lau makohia lasi.”
21 Iesu ia itaia mai moale danu, ia ura henia, ia gwau, “Gau tamona dekenai oi hegeregere lasi, oi lao, oiemu kohu oi hoia, ogogami taudia dekenai oi henia, gabeai kohu namona do oi davaria guba dekenai, bona oi mai, lauegu murinai oi raka.”
22 Unai hereva ia kamonai neganai, unai tau ena vairana ia metau, bona ia raka siri, mai lalohisihisi danu, badina ia be kohu momo tauna.
23 Iesu ia giroa, iena diba tahua taudia dekenai ia hereva, ia gwau, “Kohu momo taudia Dirava ena Basileia idia vareai dala be mai hekwarahi bada!”
24 Unai hereva dekenai diba tahua taudia idia hoa. Iesu ia hereva lou, “Lauegu natudia e, Dirava ena Basileia vareai dala be auka!
25 Kamelo ese nila matuna dekenai ia vareai lao be haraga, to kohu momo tauna ese Dirava ena Basileia dekenai ia vareai dala be auka.”
26 Idia hoa bada inai hereva dekenai. Bona idia sibona dekenai idia herevahereva, “Be! Daika ese mauri ia davaria diba?”
27 Iesu ia itadia lou, ia gwau, “Taunimanima idia karaia diba lasi, to Dirava be ia diba, badina be Dirava ese gau ibounai ia karaia diba.”
28 Petero ia laloa namonamo, ia gwau, “Aiemai gau ibounai ai rakatania vadaeni, bona oiemu murinai ai raka.”
29 Iesu ia gwau, “Momokani lau hamaoroa umui, bema tau ta ese iena ruma ia rakatania, o iena tadikakana, o taihuna, o sinana, o tamana, o natuna, o tano, bema lau dainai bona Sivarai Namona dainai inai gaudia ia rakatania,
30 hari inai mauri neganai, iena gau do ia habadaia nega 100 bamona, ruma, tadikakana, taihuna, sinana, natuna, bona tano. Momokani taunimanima ese unai tau do idia hisihisi henia, to gabeai, vaira neganai, mauri hanaihanai do ia abia.
31 Taunimanima momo be tau badadia, to gabeai idia be tau maragidia, bona taunimanima momo be hari idia tau maragidia, gabeai be do idia tau badadia.”
Nega ihatoina Iesu ia gwau do ia mase, bona toreisi lou
32 Ierusalema ia lao dala dekenai idia raka. Iesu ia raka lao guna, unai dainai iena taudia idia hoa, bona iena murinai idia raka, mai edia gari bada. Ia ese iena taudia 12 ia hakaua siri, gabeai ia dekenai do idia vara gaudia ibounai ia hamaorodia lou.
33 Ia gwau, “Ita lao Ierusalema, unuseni tau ta ese Taunimanima ena Natuna do ia henia dubu biagudia bona taravatu hadibaia taudia dekenai. Do idia gwau ia be do ia mase, bona do idia henia idau bese taudia dekenai, alaia mase gwauraia.
34 Do idia hevaseha ia dekenai, do idia dadabaia, do idia kanudi henia, bona do idia alaia mase. Dina toi murinai do ia toreisi lou.”
Iamesi bona Ioane idia ura dagi bada
35 Sebedeo ena natudia, Iamesi mai Ioane danu idia lao, Iesu dekenai idia hereva henia, idia gwau, “Hadibaia tauna e, ai ura aiemai noinoi gauna oi henia ai dekenai.”
36 Ia gwau, “Umui ura dahaka lau karaia umui dekenai?”
37 Idia gwau, “Oiemu Basileia oi abia neganai, ai ura oiemu badibadinai do ai helai, ta idiba kahanai, ta lauri kahanai.”
38 Iesu ia hereva idia dekenai, ia gwau, “Umui diba lasi dahaka umui noinoi. Lau inua gauna umui danu inua diba, a? Idia henia lau dekenai bapatiso, umui danu abia hegeregere?”
39 Idia gwau, “Ai abia diba.”
Iesu ia hereva idia dekenai, “Dahaka lau inua be umui danu do umui inua, bapatiso idia henia lau dekenai, be do idia henia umui dekenai danu.
40 To lauegu idiba kahanai bona lauri kahanai helai gabudia be lau sibona lau atoa lasi. Unai helai gabudia Dirava ese ia atoa hegaegae, bona ia sibona ia diba daika dekenai dohore ia henia.”
41 Taudia 10 idia kamonai, vadaeni idia badu Iamesi bona Ioane dekenai.
42 Iesu ese ibounai ia boiria, idia mai ia dekenai, ia hereva henia, ia gwau, “Umui diba, idau bese taudia edia lohia taudia ese hesiai gaukara idia karaia lasi, to idia hereva sibona, bona edia hereva gauna be edia hesiai taudia idia kamonai, bona karaia.
43 To umui be unai kara bamona do umui karaia lasi, umui ta ia ura be tau bada herea gwauraia, be hesiai gaukara do ia karaia umui dekenai.
44 Umui ta, ia ura be lohia tauna gwauraia, ia be umui ibounai dekenai hesiai gaukara do ia karaia.
45 Badina Taunimanima ena Natuna ia mai lasi, hesiai taudia ese iena gaukara idia karaia totona, to ia mai be hesiai gaukara ia karaia totona, bona iena mauri do ia atoa diho, taunimanima momo edia dika davana karaia totona.”
Ieriko hanua dekenai: Matakepulu tauna
46 Idia ginidae Ieriko hanua dekenai. Iesu, mai ena diba tahua taudia, bona taunimanima momo Ieriko hanua idia rakatania neganai, matakepulu tauna ladana Batimeo, Timeo ena natuna, noinoi tauna, ia helai dala badinai.
47 Ia kamonai Iesu, Nasareta tauna, be ia raka kahira, vadaeni ia boiboi goada, ia gwau, “Iesu e, Davida ena natuna, mani oi bogahisihisi lau dekenai.”
48 Taunimanima idia badu ia boiboi dainai. Idia hamaoroa ia hereva lasi, to ia boiboi goada, ia gwau, “Davida ena natuna e, oi bogahisihisi lau dekenai.”
49 Iesu ia gini noho, ia gwau, “Umui boiria, ia mai.”
Idia ese matakepulu tauna idia boiria, idia hamaoroa, “Oi gari lasi, oi toreisi, ia boiboi oi dekenai.”
50 Ia ese iena dabua ia negea oho, ia toreisi haraga, ia lao Iesu dekenai.
51 Iesu ese ia nanadaia, “Oi ura dahaka lau karaia oi dekenai?”
Matakepulu tauna ia gwau, “Hadibaia tauna e, lau ura lauegu matana oi kehoa.”
52 Iesu ese ia hereva henia, ia gwau, “Oi lao, oiemu abidadama dainai mauri oi davaria vadaeni.” Nega tamona iena matana idia kehoa vadaeni, bona Iesu ena murinai ia raka lao.