3
1 Siahu Ibounai Lohiabada ese ia haere, ia gwau, “Kamonai. Lau ese egu hereva gwauraia tauna do lau siaia, ia ese egu dala do ia karaia hegaegae. Unai neganai Lohiabada, umui tahua noho Diravana be nega tamona iena Dubu Helaga dekenai do ia mai. Lauegu hereva do ia gwauraia Tauna, umui ese umui naria noho, bona umui ura henia noho Tauna, be do ia ginidae. Bona ia ese egu gwauhamata taravatuna ena hereva do ia gwauraia.”
2 To ia be do ia ginidae neganai daika be do ia goada noho? Bona do ia hedinarai neganai, daika do ia gini diba? Badina ia be sopu goadana bamona, dabua mirona huria gauna. Bona ia be golo ia hagoevaia ena lahi bamona.
3 Ia be do ia mai, taunimanima do ia kota henidia, tau ta ese lahi dekenai siliva ia hamanadaia bona hagoevaia bamona. Io, Lohiabada ena hereva gwauraia Tauna ese hahelagaia taudia do ia hagoevaia, tau ta ese golo bona siliva ia hagoevaia bamona. Unai neganai, idia ese boubou gaudia maorodia Lohiabada ena vairana dekenai do idia mailaia.
4 Vadaeni Iuda taudia bona Ierusalema noho taudia edia boubou gaudia be Lohiabada ese do ia moalelaia, gunaguna idia mailaia gaudia dekenai ia moale bamona.
5 Siahu Ibounai Lohiabada ia gwau, “Unai dainai lau be umui dekenai do lau mai, umui do lau kota henia. Lau ese karaharaga inai bamona kara dika taudia do lau samania: Vada idia karaia taudia, heudahanai taudia, kota dekenai idia hereva koikoi taudia, edia gaukara taudia edia davana koikoi dekena amo idia hamaragia taudia, vabu bona ogogami taudia idia hisihisi henidia taudia, bona idau bese taudia idia hadikaia noho taudia. Inai bamona idia karaia noho taudia ese lau idia gari henia lasi, unai dainai lau ese idia do lau kota henia.
Taunimanima ese edia kohu o moni kahana Dirava dekenai henia kara
6 “Lau be Lohiabada, bona lauegu kara lau haidaua lasi. Unai dainai umui Iakobo ena tubuna taudia be do umui mase ore lasi.
7 To umui ese emui sene taudia edia kara bamona umui karaia noho. Umui ese egu taravatu dekena amo umui raka siri, egu oda hereva umui badinaia lasi. To bema emui dika umui rakatania, bona lau dekenai umui giroa mai neganai, lau ese egu badu do lau rakatania, umui dekenai do lau giroa lou. Lau, Siahu Ibounai Lohiabada lau hereva inai.
“To umui henanadai, umui gwau, ‘Edena bamona oi dekenai do ai giroa mai?’
8 “Vadaeni umui dekenai danu lau henanadai inai: Bema tau ta ese Dirava dekena amo do ia henaoa, inai be maoro, a? Lasi momokani! To umui ese inai bamona umui karaia noho. Ma lau dekenai umui henanadai lou, umui gwau, ‘Edena bamona ai ese oiemu gau ai henaoa?’
“Lau haere inai: Taravatu ia gwau, umui ese emui kohu ena kahana ta lau dekenai do umui henia, to lau dekenai umui henia lasi.
9 “Dika momokani umui emui latanai do ia kamokau, badina be umui bona emui bese ibounai ese lauegu gau umui henaoa noho.
10 “Umui ese emui kohu bona moni ibounai do umui haria kahana 10, bona unai kahana 10 dekena amo kahana ta do umui mailaia, egu Dubu Helaga dekenai do umui atoa. Unai neganai egu gaukara taudia be mai edia aniani. Lau do umui tohoa karaia. Unai kahana ta lau dekenai do umui henia, vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.
11 Lau ese dimairi bona biluga do lau koua, vadaeni emui tano ena anina do idia vara namonamo, bona emui vain audia be huahua momo herea do idia atoa.
12 Unai neganai bese idauidau taudia ibounai ese umui do idia hanamoa, do idia gwau, ‘Idia edia noho be namo herea,’ badina umui emui tano be noho gabuna namona lau ese do lau halaoa.”
Dirava ia gwauhamata, iena bese do ia bogahisihisi henia
13 Lohiabada ma ia hereva, ia gwau, “Mai hereva dika danu lau umui herevalaia vadaeni. To umui gwau, ‘Ai be dahaka hereva dikana oi dekenai ai gwauraia?’
14 “Ma inai danu umui gwau, ‘Dirava ena hesiai gaukara ita karaia be anina lasi. Iena hereva do ita badinaia ena anina be dahaka? Ita be Siahu Ibounai Lohiabada ena vairanai iseda kara dika dainai ita lalohisihisi ena toana ita hedinaraia, to ita be ita lalohisihisi kava, gau namona ta ita davaria lasi.
15 Ita ese hekokoroku taudia ita itaia, edia noho be namo bona mai moale danu. Kara dika taudia ese kohu momo idia abia noho, bona idia ese Dirava idia tohoa karaia, ia ese idia do ia panisia o lasi. To Dirava ese idia ia hadikaia lasi. Lasi momokani!’ ”
16 Gabeai Lohiabada dekenai idia gari henia taudia ese idia ta ta dekenai idia herevahereva, bona Lohiabada ese edia hereva ia kamonai. Vadaeni Lohiabada ese guba dekenai oda ia gwauraia, bona buka ta lalonai be Lohiabada idia gari henia taudia, bona Lohiabada idia matauraia noho taudia edia ladana idia torea.
17 Bona Siahu Ibounai Lohiabada ia gwau, “Inai taudia be lauegu taunimanima momokani. Bona unai Dina, lau ese kara ta do lau karaia dinana dekenai, idia be lau sibona egu. Bona lau ese idia do lau hamauria, tau ta ese iena natuna, iena ura ia karaia merona, ia hamauria bamona.
18 Unai neganai lauegu kara ena idau do umui itaia lou, kara maoromaoro taudia dekenai edena bamona do lau karaia, bona kara dika taudia dekenai edena bamona do lau karaia. Oibe, do umui itaia Dirava ena gaukara idia karaia, bona iena gaukara idia karaia lasi taudia dekenai, dahaka do ia vara.”