10
Iesu ese iena aposetolo taudia 12 ia abia hidi
Iesu ese iena diba tahua taudia 12 ia boiridia. Vadaeni siahu ia henidia, lauma dikadia do idia lulua, bona gorere idauidau bona hisihisi idauidau ibounai do idia hanamoa.
Aposetolo taudia 12 edia ladadia be inai, ginigunana be Simona, ena ladana ta Petero, bona ena tadina Andrea, Iamesi Sebedeo bona ena tadina Ioane, Filipo bona Batolomeo, Toma bona takisi gogoa tauna Mataio, Iamesi Alepeo bona Tadeo, Simona, Roma taudia lulua totona orea tauna ta, bona Iuda Iskariote, ia be Iesu ia samania tauna.
Iesu ese aposetolo taudia dekenai edia gaukara ia henia
Inai taudia 12 be Iesu ia siaia, bona ia hamaorodia, ia gwau, “Bese idauidau taudia dekenai do umui lao lasi, bona Samaria taudia edia hanua ta dekenai do umui raka vareai lasi. To Israela besena dekenai umui lao, idia be idia boio vadaeni mamoe bamona. Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ Gorere taudia do umui hanamoa, mase taudia do umui hatorea isi, lepera taudia do umui hagoevaia, lauma dikadia do umui lulua murimuri dekenai. Gau momo umui abia vadaeni, davana lasi. Unai dainai gau momo do umui henia, davana lasi.
“Umui emui pusepuse lalonai moni badadia o maragidia do umui udaia lasi. 10 Dala dekenai laolao pusena, dabua rua, tamaka, raka au, do umui abia lao lasi. Badina be gaukara tauna dekenai iena aniani idia henia be maoro.
11 “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua. Vadaeni ia dekenai do umui noho, ela bona unai gabu umui rakatania. 12 Ruma dekenai umui raka vareai neganai be do umui hanamoa. 13 Bona bema ruma taudia idia namo, umui emui hanamoa be idia latanai do umui atoa. To bema idia dika, umui emui hanamoa do umui abia lou. 14 To bema ruma taudia o hanua taudia idia abia dae lasi umui, bona emui hereva idia kamonai lasi, unai gabu do umui rakatania, bona emui aena dekenai ia noho momoru umui negea oho unuseni. 15 Umui lau hamaoroa momokani, Dirava ena Kota henia Dinana neganai, Sodoma bona Gomora edia dika davana be maragi, to unai hanua ena dika davana be do ia bada.”
Nega dika bona metau do idia vara
16 “Lau ese lau siaia umui, mamoe, uda sisia edia huanai bamona. Unai dainai, do umui aonega, gaigai bamona, bona do umui dagedage lasi, pune manu bamona. 17 To taunimanima dekenai do umui naria namonamo. Badina be idia ese kaunsolo edia vairana dekenai do idia hakaua umui, bona idia edia dubu lalonai do idia botaia umui. 18 Lohia bona king edia vairana dekenai do idia hakaua umui, lau dainai. Inai dala dekenai umui ese lau do umui gwauraia hedinarai idia dekenai, bona bese idauidau ibounai dekenai. 19 Umui idia kota henia neganai umui emui lalona do idia hekwarahi lasi, do umui gwauraia herevadia totona. Badina be unai neganai do umui gwauraia herevadia be Dirava ese do ia henia umui dekenai. 20 Badina be gwauraia tauna be umui lasi, to umui emui Tamana ena Lauma be umui emui lalona dekenai do ia hereva.
21 “Kakana ese iena tadina do ia samania, do ia mase totona. Tamana ese iena natuna do ia samania, do ia mase totona. Memero do idia toreisi, edia tamana bona sinana do idia alaia mase. 22 Lauegu ladana dainai taunimanima ibounai ese do idia badu henia umui dekenai. To do ia haheauka lao ela bona dokona tauna be do ia mauri. 23 Hanua ta dekenai umui do idia dagedage henia neganai be idau hanua dekenai do umui heau lao. Badina be umui lau hamaoroa momokani, Israela edia hanua ibounai dekenai emui gaukara do umui haorea lasi neganai, Taunimanima ena Natuna do ia giroa mai.
24 “Diba tahua tauna ese iena hadibaia tauna do ia hereaia diba lasi. Hesiai tauna ese iena biaguna be do ia hereaia diba lasi. 25 Diba tahua tauna be iena hadibaia tauna danu do idia hegeregere, o hesiai tauna be iena biaguna danu do idia hegeregere, unai be namo. Vadaeni umui laloa, taunimanima haida ese lau idia hadikaia, idia gwau lau be Belesebulo, lau be orea ta ena biaguna. Idia ese biaguna inai bamona idia hadikaia dainai, umui danu, egu orea taudia, be do idia hadikaia, ani?
Taunimanima ese Dirava sibona do idia gari henia be namo
26 “Unai dainai, taunimanima dekenai do umui gari lasi. Badina be koua gaudia ibounai be do idia hedinarai, bona hunia gaudia be ibounai do idia diba. 27 Dibura lalonai umui lau hamaoroa herevadia be diari dekenai do umui gwauraia. Bona emui taiana dekenai umui kamonai herevadia be ruma ena ataiai dekena amo do umui harorolaia diho. 28 Tauanina be do idia alaia diba, to lauma be do idia alaia diba lasi taudia dekenai do umui gari lasi. To lauma bona tauanina ruaosi lahi ia araia gabuna dekenai do ia alaia mase diba Diravana dekenai be do umui gari, be namo.
29 “Manu maragidia rua be moni maragimaragi tamona dekenai do idia hoia, ani? To idia ta be tano dekenai do ia moru lasi, emui Tamana bema ia ura lasi neganai. 30 To umui emui kwarana huina ibounai be Dirava ese ia duahia haorea momokani. 31 Do umui gari lasi, badina umui ese manu maragi momo umui hereaia.
Iesu ena ladana do ita hunia lasi
32 “Unai dainai, taunimanima edia vairana dekenai lau do ia gwauraia hedinarai tauna be lau ese egu Tamana, guba dekenai ia noho, ena vairana dekenai, ia do lau gwauraia hedinarai. 33 To taunimanima edia vairana dekenai lau do ia gwauraia hedinarai lasi tauna be lauegu Tamana, guba dekenai ia noho, ena vairana dekenai, ia do lau gwauraia hedinarai lasi.
Iesu ia mai, be heai havaraia totona
34 “Umui emui lalona dekenai umui gwau lasi, maino lau mailaia tanobada dekenai totona lau mai. Maino lau mailaia lasi, to tuari kaia sibona. 35 Badina lau mai, be heai do lau havaraia totona. Tau ta ese iena tamana do ia badu henia, bona kekeni ta ese iena sinana do ia badu henia, bona hahine matamata ese iena ravana hahine do ia badu henia. 36 Bona ruma taudia ese ruma ena biaguna do idia badu henia.
37 “Bema tau ta ese iena tamana o iena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi. O bema tau ta ese iena natuna mero o iena natuna kekeni ia ura henia bada, to lau be ia ura henia maragi, ia be lau dekenai do ia hegeregere lasi. 38 Bona bema tau ta ese iena satauro do ia abia isi lasi, lauegu murina dekenai do ia raka lasi, ia be lau dekenai do ia hegeregere lasi. 39 Iena mauri ia dogoatao tauna ese iena mauri do ia halusia, to lau dainai iena mauri ia halusia tauna ese iena mauri do ia davaria.
Davana namona idia abia taudia
40 “Umui ia abia dae tauna ese lau danu ia abia dae, bona lau ia abia dae tauna ese lau ia siaia Diravana danu ia abia dae. 41 Bema peroveta tauna umui abia dae badina be ia be Dirava ena tauna ta dainai, umui be peroveta tauna ena davana do umui abia. Bema tau namona umui abia dae badina be ia be tau namona momokani dainai, umui be tau namona ena davana danu do umui abia. 42 Bema tau ta ese ranu keruma kapusi tamona sibona ia henia egu murinai ia raka tau maragina ta dekenai, umui lau hamaoroa momokani, ia be davana do ia abia momokani.”