20
Gaukara taudia vain uma gabuna dekenai
1 “Badina be Guba Basileia be ruma biaguna ta bamona, dabai ia raka lao, gaukara taudia ia tahua, iena vain uma gabu dekenai idia gaukara totona.
2 Vadaeni biaguna be idia danu idia hereva hebou, vadaeni ia ese idia dekenai ia gwauhamata, edia davana be dina ta kina tamona do ia henidia ia gwau. Vadaeni iena vain uma gabu dekenai idia ia siaia lao.
3 Dabai 9 okaloka bamona ma ia raka murimuri dekenai, vadaeni tau ma haida be hoihoi gabu dekenai idia gini kava ia itadia.
4 Vadaeni idia dekenai ia hereva, ia gwau, ‘Umui danu egu vain uma gabu dekenai umui lao, umui gaukara, vadaeni emui davana hegeregere do lau karaia.’ Vadaeni idia danu idia lao.
5 Dina tubua kahana bona adorahi kahana ma ia raka murimuri dekenai, haida ma ia davaria, ia siaidia.
6 Adorahi kahana ma 5 okaloka bamona ia raka murimuri dekenai, ma haida idia gini kava neganai, ia itadia. Vadaeni ia nanadaia idia dekenai, ia gwau, ‘Badina be dahaka iniseni umui gini kava ia mai bona dina be kahirakahira ia diho?’
7 Idia haere, idia gwau, ‘Badina be tau ta ese ia boiria lasi ai dekenai.’ Vadaeni ia hamaorodia, ia gwau, ‘Umui danu lauegu vain uma gabu dekenai umui lao.’
8 “Dina ia diho, vadaeni uma gabu ena biaguna ese iena gaukara naria tauna dekenai ia hamaoroa, ia gwau, ‘Gaukara taudia dekenai oi boiboi, gabeai taudia edia davana oi henia guna, to guna taudia be gabeai.’
9 “Vadaeni adorahi 5 okaloka ia siaidia taudia idia daekau guna, kina ta ta idia abia.
10 Vadaeni gaukara idia hamatamaia guna taudia idia daekau, idia laloa be idia edia davana do ia habadaia, to idia danu kina ta ta idia abia.
11 Edia davana idia abia neganai, idia ese uma gabu ena biaguna dekenai idia badu,
12 idia gwau, ‘Gabeai taudia be inai, hora tamona sibona idia gaukara, to ai be dina ena siahu lalonai ai hekwarahi bada. Edena bamona idia edia davana bona aiemai davana be tamona?’
13 “To ia ese idia ta dekenai ia haere, ia gwau, ‘Turagu e, lau be lau hadikaia lasi oi. Ita ruaosi ita hereva oiemu davana be kina ta do oi abia, ani?
14 Oiemu davana oi abia, vadaeni oi lao. Lau ura be inai gabeai tauna do lau henia, oi dekenai lau henia hegeregerena.
15 Be, lauegu gau, vadaeni lauegu ura hegeregere do lau karaia lasi, a? Lau be mai hariharibada tauna, inai dainai oi badu, a?’ ”
16 Ma Iesu ia gwau, “Inai dainai, gabeai taudia be do idia guna, to guna taudia be do idia gabeai.”
Iesu ese nega ihatoina iena mase ia herevalaia
17 Iesu be Ierusalema dala dekenai ia lao neganai, ia ese iena diba tahua taudia 12 ia hakaudia siri, ia hamaorodia, ia gwau,
18 “Ita be Ierusalema ita daekau inai. Taunimanima ena Natuna be do idia samania, dubu biagudia bona taravatu hadibaia taudia dekenai do idia henia. Vadaeni do idia kota henia, do idia gwau ia mase.
19 Idau bese taudia dekenai do idia henia, do idia kirikirilaia, do idia botaia, do idia hasatauroa, to dina toi murinai do ia toreisi lou.”
Sinana ta ena noinoi
20 Vadaeni Sebedeo ena natuna edia sinana mai ena natuna danu, Iesu dekenai idia lao. Hahine ese ia tomadiho ia dekenai, gau ta ia noia.
21 Vadaeni Iesu ese ia nanadaia, ia gwau, “Dahaka oi ura?” Hahine ia gwau, “Mani oi hereva, lauegu natuna ruaosi inai, ta oiemu idiba kahanai, ta oiemu lauri kahanai do idia helai oiemu Basileia lalonai.”
22 To Iesu ia haere, ia gwau, “Umui noinoi gauna be umui diba lasi. Do lau inua kapusi be do umui inua diba, a?”
Idia ruaosi idia gwau, “Do ai inua diba.”
23 Iesu ma ia gwau, “Lauegu kapusi be do umui inua. To lauegu idiba kahanai bona lauegu lauri kahanai do idia helai taudia be lau ese do lau abia hidi lasi. Egu Tamana ese ia diba taudia dekenai do ia henidia.”
24 Diba tahua taudia haida idia kamonai, vadaeni tadikaka ruaosi dekenai idia badu.
25 To unai tau rua Iesu ia boiria mai ia dekenai, ia gwau, “Umui diba lohia taudia be mai siahu danu edia taunimanima idia biagua karaia, bona gunalaia taudia be do idia lohia edia taunimanima dekenai.
26 To umui be unai bamona do umui laloa lasi. Bema ta ia ura be do ia lohia gwauraia, ia be umui emui hesiai gaukara do ia karaia.
27 Bona bema ta ia ura be guna tauna, ia be umui emui hesiai tauna do umui halaoa.
28 Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia atoa diho, taunimanima momo edia dika davana karaia totona.”
Matakepulu taudia rua Iesu ia hamauridia
29 Idia be Ieriko idia rakatania neganai, taunimanima momo be Iesu ena murina dekenai idia lao.
30 Matakepulu taudia rua be dala badinai idia helai, vadaeni Iesu ia raka hanaia ena sivarai idia kamonaia. Vadaeni idia boiboi, idia gwau, “Lohiabada e, Davida ena natuna e, oi bogahisihisi ai dekenai!”
31 Taunimanima momo ese idia gwau henia idia dekenai, do idia hereva lasi idia gwau. To idia be idia boiboi lou, idia gwau, “Lohiabada e, Davida ena natuna e, oi bogahisihisi ai dekenai!”
32 Iesu ia gini, vadaeni ia boiboi idia dekenai, ia gwau, “Dahaka umui ura lau karaia umui dekenai?”
33 Idia gwau, “Lohiabada e, ai ura aiemai matana oi kehoa.”
34 Vadaeni Iesu ese idia dekenai ia bogahisihisi, edia matana dekenai iena imana ia atoa, vadaeni nega tamona gau idia itaia diba. Vadaeni Iesu ena murina dekenai idia raka.