36
Headava herevadia
Gileada Makiri, Manase Iosepa ena tubuna, ena iduhu dekena amo, bese gunalaia taudia be Mose bona Israela lohia taudia dekenai idia lao. Idia gwau, “Lohiabada ese oi, aiemai lohia, ia oda henia, oi ese tano be laki dekena amo do oi haria, Israela taudia edia huanai. Lohiabada ese danu oi ia oda henia, aiemai varavara tauna Selopehada ena tano be iena natuna hahine taudia dekenai do oi henia.
“To bema idia be idau iduhu taudia dekenai do idia headava, unai tano be aiemai sene taudia edia iduhu dekena amo do idia kokia, unai iduhu idauna ese tano do ia abia, vadaeni aiemai tano ena kahana do ia boio. Iubili Lagani do ia ginidae neganai, unai tano be unai hahine edia tau edia iduhu ese do ia abia momokani, bona aiemai sene taudia edia iduhu tanona be do ia boio momokani.”
Vadaeni Mose ese Israela taudia dekenai Lohiabada ena hereva ia hadibaia, ia gwau, “Manase Iosepa ena iduhu taudia edia hereva be maoro. Unai dainai Selopehada ena natuna hahine ese idia ura henia taudia idia adavaia diba, to edia tamana ena iduhu taudia sibona.
“Unai dala dekenai Israela ena iduhu ta ese iduhu ma ta ena tano do ia abia lao lasi, to Israela taudia ta ta ese edia tamadia edia tano do idia dogoatao noho. Bona kekeni ta bema tano ta Israela ena iduhu ta lalonai ia biagua, ia ese iena tamana ena iduhu tauna ta do ia adavaia. Unai dala dekenai Israela taudia ta ta ese tamadia edia tano do idia abia bona dogoatao. Unai dainai iduhu ta ese iduhu ma ta ena tano do ia abia lao lasi, to Israela iduhu ta ta ese edia tano do idia dogoatao noho.”
10 Unai dainai Selopehada ena natuna kekeni ese Lohiabada ena taravatu idia kamonai henia. 11 Selopehada ena natuna kekeni, Mahala bona Tirisa bona Hogila bona Milika bona Noa ese edia tamana ena varavara taudia idia adavaia. 12 Manase Iosepa ena iduhu lalonai idia headava, vadaeni edia tano be edia tamana ena iduhu dekenai ia noho.
13 Oda bona taravatu be unai, Lohiabada ese Mose dekenai ia henia, vadaeni Mose ese Israela taudia dekenai ia henia, Moaba tano palaka dekenai, Ioridane Sinavai ena isena dekenai, Ieriko hanua kahirakahira.