114
Pasova ena ane
1 Israela taudia be Aigupito idia rakatania.
Iakobo ena besena,
be gado idau taudia edia tano idia rakatania.
2 Unai neganai Iuda be Lohiabada ena helaga taudia,
bona Israela danu be Lohiabada ena basileia korikori.
3 Davara Kakakaka ese gau ta ia itaia, vadaeni ia heau!
Ioridane Sinavai ese iena ranu ena heau ia hadokoa,
ena ranu ia gini noho!
4 Ororo badadia be nanigosi bamona idia roho lao, roho lao noho!
Bona ororo maragidia,
be mamoe natudia bamona idia roho lao, roho lao noho!
5 Davara e,
dahaka ia vara, vadaeni oi heau?
Bona Ioridane Sinavai e,
badina dahaka oiemu ranu ena heau oi hadokoa?
6 Ororo badadia e,
badina dahaka nanigosi bamona umui roho lao?
Ororo maragidia e,
badina dahaka mamoe natudia bamona umui roho lao?
7 Tanobada e,
Lohiabada ena vairanai do oi heudeheude,
Iakobo ena Dirava ena vairanai.
8 Ia ese nadi badana be ranu gabuna ia halaoa,
bona ia ese ororo ena nadi be ranu ia lohilohi gabuna ia halaoa.