129
Israela dekenai idia tuari henia taudia be Dirava ese do ia hadikaia
Israela e, ai dekenai oiemu sivarai do oi hadibaia,
oi dekenai idia tuari henia taudia ese,
nega daudau oi idia hadikaia vadaeni.
Oi be mero neganai ia mai bona harihari,
unai bamona idia karaia.
Israela ese ia haere, ia gwau,
“Io, lau be mero neganai ia mai bona hari,
lau idia hadikaia gwauraia taudia ese,
lau idia dagedage henia dikadika,
to idia ese lau idia halusia lasi.
Idia ese lau idia kwadia,
kwadi gauna ese egu doruna ena kopina ia utua dobu.
Egu doruna ena berona toana,
be uma gabuna ena dadaira latadia momo bamona.
To Lohiabada ena kara be maoromaoro.
Ia ese hesiai mai guia danu edia seini,
dekena amo lau ia kokia ruhaia vadaeni.”
 
Lau ura Siona idia badu henia taudia ibounai,
be tuari dekenai do idia lusi,
bona mai hemarai danu do idia heau lou.
Namona idia be ruma ena guhi dekenai idia tubu rei bamona,
do idia huahua lasi neganai do idia kaukau.
Rei utua tauna ese,
unai rei be iena imana dekenai do ia abia lasi,
bona rei guia tauna,
be iena kemena dekenai do ia haboua lasi.
Vadaeni raka hanaia taudia ese,
inai taudia do idia herevalaia lasi, do idia gwau lasi,
“Lohiabada ese umui do ia hanamoa!
Lohiabada ena ladana dainai ai ese umui ai hanamoa noho!”