38
Hisihisi ia abia noho tauna ena guriguri
1 Lohiabada e, oiemu badu dekenai,
lau do oi matakani henia lasi.
Oiemu badu mai siahu danu dekenai,
lau do oi hisihisi henia lasi.
2 Badina oi ese oiemu peva ena diba,
dekena amo lau oi haberoa vadaeni.
Oi ese lau oi botaia,
lau moru vadaeni.
3 Oiemu badu dainai,
lau hisihisi bada noho.
Egu kara dika dainai egu tauanina ibounai ia gorere noho.
4 Egu kerere bada ese,
egu kwarana idia koua vadaeni,
abata ese taunimanima ia koua bamona.
Egu kerere ena metau be bada herea,
lau huaia diba lasi.
5 Egu kara dika bona egu kavakava dainai,
egu bero edia bonana ia daekau,
idia bodaga dainai.
6 Egu kwarana lau atoa diho,
bona lau moru diho noho.
Dina ena hora ibounai lalonai lau tai noho, tai noho.
7 Egu kopina be ia siahu noho,
bona egu tauanina be ia goada lasi.
8 Lau be lau manoka vadaeni,
badina haida ese lau idia botaia patapata.
Egu kudouna ia hisihisi noho,
bona hisihisi dainai lau tai noho.
9 Lohiabada e, egu ura ibounai oi diba.
Egu taitai, be oi dekena amo ia hunia lasi.
10 Egu kudouna be ia gaukara haragaharaga noho,
egu goada ia ore,
bona egu matana ena diari ese,
lau ia rakatania vadaeni.
11 Egu toto dainai, egu turana bona egu bamona taudia,
ese lau idia vadivadi henia lasi.
Egu bese taudia danu be lau dekena amo idia noho siri.
12 Lau idia alaia gwauraia taudia ese,
lau abia totona tarapu idia atoa vadaeni,
bona lau idia hadikaia gwauraia taudia ese,
hadikaia hereva dekena amo lau idia hagaria noho.
Dina ibounai doko lasi, idia ese lau hadikaia totona,
dala idia tahua noho.
13 Lau be taia kudima tauna bamona, lau kamonai diba lasi.
Lau be hereva diba lasi tauna bamona,
egu uduna lau kehoa diba lasi.
14 Io, lau be kamonai diba lasi tauna bamona.
Lau be lau haere lasi,
badina lau be hereva lau kamonai lasi tauna bamona.
15 To Lohiabada e, lau ese oi lau abidadama henia noho,
bona oi be Lohiabada,
lauegu Dirava dainai,
oi ese lau do oi haere henia.
16 Mani emu kara,
lau idia hadikaia gwauraia taudia do oi koua,
vadaeni idia ese egu hisihisi do idia kirikirilaia lasi.
Egu moru dekenai, mani emu kara do idia hevaseha lasi.
17 Badina lau be kahirakahira lau moru diho noho inai,
bona egu hisihisi, be nega ibounai ena mamina lau abia noho.
18 Egu kara dika be lau gwauraia hedinarai noho inai,
bona egu kerere dekena amo,
egu lalona lau giroa inai.
19 Lau idia hadikaia gwauraia taudia,
be mai edia goada danu.
Idia momo ese lau idia badu henia noho,
to mai badina ta lasi.
20 Lau ese idia dekenai kara namo lau karaia,
ena davana be kara dika lau dekenai idia karaia noho.
Idia ese lau idia badu henia noho,
badina kara maoromaoro lau karaia noho.
21 Lohiabada e,
lau do oi rakatania lasi.
Egu Dirava e, lau dekena amo do oi siri lasi.
22 Lohiabada e,
oi be egu hamauria Tauna.
Mani do oi mai haraga,
lau do oi durua totona.