81
Dirava ese Israela ia sisiba henia
1 Dirava, iseda goada ena badina,
ia hanamoa totona ane do ita abia,
mai moale bona mai boiboi danu.
Iakobo ena Dirava hanamoa totona ane do ita abia!
2 Ane ena tiuni do umui hamatamaia,
bona tareko do umui botaia.
Miusiki namona gita badadia bona gita maragidia dekenai,
do umui gadaralaia.
3 Hua matamata bona hua ia bada ena aria totona,
kibi do umui hiriria.
4 Inai be Israela taudia edia taravatu,
Iakobo ena Dirava ese ita dekenai ia henia.
5 Gunaguna Dirava ese Aigupito ia tuari henia neganai,
ia ese inai taravatu Israela taudia dekenai ia henia.
6 Lau ese gadona ta lau kamonai,
to lau diba lasi daika ena.
Ia ese inai bamona ia hereva, ia gwau,
“Lau ese maduna metauna emui pagana dekena amo lau kokia,
biriki nadi bosea umui huaia gaukara dekena amo,
lau ese emui imana lau ruhaia,
vadaeni bosea be tano dekenai umui atodia.
7 Hisihisi umui abia neganai lau dekenai umui boiboi,
bona lau ese umui lau hamauria.
Lau be guba ia boiboi ena hunia gabuna dekena amo,
umui emui noinoi lau kamonai henia.
Ma unai neganai danu Meriba ena ranu gabudia dekenai,
umui emui abidadama lau tohoa.
8 “Egu bese taudia e, umui kamonai:
Lau ura umui do lau sisiba henia.
Israela taudia e, lau ura bada egu hereva do umui kamonai.
9 Umui ese idau bese taudia edia dirava koikoidia,
do umui tomadiho henia lasi.
Umui ese dirava idauna ta do umui badinaia lasi.
10 Lau sibona be Lohiabada, emui Dirava.
Aigupito dekena amo umui lau hakaua mai.
Umui ese emui uduna do umui kehoa,
bona lau ese umui do lau ubua.
11 “To egu bese taudia ese lau dekenai idia kamonai lasi.
Israela taudia ese lau idia kamonai henia lasi.
12 Unai dainai lau ese idia lau negea,
idia sibona edia hekokoroku daladia do idia raka noho,
bona idia sibona edia ura karadia do idia karaia.
13 “Egu ura bada be,
egu bese taudia ese lau dekenai do idia kamonai,
bona Israela taudia ese lau idia kamonai henia neganai,
14 lau ese idia dekenai idia tuari henia taudia,
do lau halusia haraga.
Idia ese idia tuari henia taudia,
be lau danu ese do lau tuari henia,
15 bona lau dekenai idia badu taudia,
be egu vairana dekenai do idia tomadiho.
Ma edia matakani be do ia noho ela bona hanaihanai.
16 To uiti namo herea dekena amo umui do lau ubua,
bona hani namona,
nadi badana dekena amo gauna,
umui dekenai do lau henia,
do umui boga kunu.”