92
Dirava hanamoa totona ane ta
1 Lohiabada e,
oi be Ataiai Momokani Diravana,
ai tanikiu henia be namo.
Ane dekena amo oiemu ladana do ai abia isi be namo.
2 Daba ibounai neganai,
oiemu noho hanaihanai lalokauna do ai gwauraia.
Hanuaboi ibounai neganai danu,
oiemu kara momokanidia do ai gwauraia.
3 Gita badadia bona miusiki gaudia haida dekena amo,
oiemu ladana do ai hanamoa.
4 Badina be, Lohiabada e,
oi ese oi karaia kara badadia ese lau idia hamoalea.
Oiemu gaukara badadia dainai,
mai moale bada danu ane lau abia noho.
5 Lohiabada e,
oi ese oi karaia gaukara be bada herea momokani,
bona oiemu laloa be dobu herea momokani.
6 Mai ena lalona lasi tauna be do ia diba lasi,
kavakava tauna danu ese,
inai gau ena anina ia davaria diba lasi:
7 Kara dika taudia be do idia tubu daekau,
ava idia tubu daekau bamona.
Bona kerere idia karaia taudia,
be kohu momo bona noho namo idia abia diba,
to oi ese idia do oi hadikaia ore.
8 Badina oi, Lohiabada,
be King Badana do oi noho ela bona hanaihanai.
9 Lohiabada e, ai diba oi dekenai idia tuari henia taudia,
be do idia mase,
bona kara dika taudia ibounai be oi ese do oi halusia.
10 Oi ese lau dekenai goada oi henia vadaeni,
uda boromakau tau ena goada hegeregerena.
Oi ese lau oi hanamoa,
vadaeni moale lau davaria.
11 Lau itaia vadaeni, lau idia hadikaia gwauraia taudia,
be oi ese oi halusia vadaeni,
bona lau kamonai vadaeni danu,
lau dekenai idia kara dika taudia, edia taitai.
12 Kara maoromaoro taudia,
be do idia tubu daekau namo herea momokani,
huahua namodia ia atoa au namona bamona.
Do idia tubu daekau,
Lebanona sida auna ia tubu hegeregerena.
13 Kara maoromaoro taudia,
be Lohiabada ena Ruma dekenai idia hadoa audia bamona.
Iseda Dirava ena Ruma lalonai,
be do idia tubu daekau namo herea momokani.
14 Idia buruka momokani neganai,
idia ese huahua do idia atoa noho.
Idia be nega ibounai idia goada noho,
au raurau matamata idia atoa,
bona idia be do idia kakoro diba lasi.
15 Inai edia kara ese ia hedinaraia noho, Lohiabada be ia maoromaoro.
Lohiabada be egu Nadi Badana,
bona iena lalonai be kara dika ta ia noho lasi.