14
1 Vadaeni Abaisa ia mase, bona Davida ena Hanua lalonai idia guria, iena tubuna bona tamana edia guria gabuna dekenai. Abaisa ena gabu dekenai iena natuna Asa ese king dagi ia abia. Asa iena lohia nega lalonai tano be ia maino noho, lagani 10 lalonai.
King Asa, Iuda ena king
2 Asa ese kara namodia bona kara maoromaoro, Lohiabada, iena Dirava, ena vairana dekenai ia karaia.
3 Ia ese idau dirava edia boubou patadia bona ataiai idia noho tomadiho gabudia ia kokia ore, bona nadi dekenai idia karaia du helagadia ia hamakohia, bona kaivakuku ia utua bona hadikaia.
4 Asa ese danu Iuda taudia ia oda henia, Lohiabada, edia sene taudia edia Dirava do idia tahua, bona iena Taravatu bona oda do idia badinaia.
5 Iuda hanua ibounai edia lalonai Asa ese ataiai idia noho tomadiho gabudia, bona bonana namo muramura patadia ia kokia ore dainai, iena basileia be mai maino danu ia noho.
6 Asa ese danu hanua mai edia magu danu Iuda tano dekenai ia haginidia, badina tano be mai maino danu. Lagani momo lalonai tuari ia vara lasi, badina be Lohiabada ese Asa dekenai maino ia henia.
7 Asa ese Iuda taudia ia hamaoroa, ia gwau, “Iseda hanua badadia do ita hagoadaia namo, magu bona kohoro bona magu iduara, auri ba bona auri loka dekenai ita koua diba gaudia do ita haginia. Tano be ita dekenai ia do noho, badina be Lohiabada, iseda Dirava ita tahua vadaeni. Iena ura ita tahua dainai ia ese tano kahana ibounai dekenai maino ita dekenai ia henia.” Unai dainai, idia ese hanua idia haginidia goada, bona edia noho be namo.
8 Asa ena tuari orea be inai: Iuda taudia ibounai 300,000, mai edia kesi badadia bona io, bona Beniamina taudia ibounai 280,000, mai edia kesi maragidia bona peva. Inai ibounai be goada momokani taudia.
Asa ese Etiopia taudia ia halusia
9 Sera, Etiopia tauna, be tuari henia totona ia mai. Iena tuari taudia be 1,000,000, bona iena kariota be 300. Idia raka mai ela bona Maresa dekenai idia ginidae.
10 Asa be idia do ia tuari henia totona ia raka lao, vadaeni tuari orea ruaosi be Maresa kahirakahira, Sepata Koura dekenai, tuari totona idia gini hegaegae.
11 Vadaeni Asa ese Lohiabada, iena Dirava, dekenai ia noinoi, ia gwau, “Lohiabada e, oi tamona sibona ese manoka taudia oi durua noho, vadaeni idia ese goada taudia idia halusia diba. Lohiabada, aiemai Dirava e, mani ai do oi durua, badina oi dekenai ai abidadama henia noho inai, bona oiemu ladana dekenai inai tuari orea badana do ai tuari henia. Lohiabada e, oi be aiemai Dirava, inai orea do oi halusia, badina taunimanima be idia gini diba lasi oiemu vairana dekenai.”
12 Vadaeni, Asa bona Iuda taudia idia tuari henidia, bona Lohiabada ese Etiopia taudia ia halusia. Etiopia taudia be idia heau.
13 Asa bona iena tuari taudia ese idia luludia lao ela bona Gerara. Idia ese Etiopia taudia momo herea idia alaia mase dainai, tuari totona idia gini lou diba lasi. Lohiabada bona iena tuari taudia ese idia kwalimu momokani, bona Iuda taudia ese kohu momo herea idia abia.
14 Unai neganai Iuda taudia ese Gerara kahana hanua ibounai idia hadikaia ore, badina be unai gabudia noho taudia ese Lohiabada dekenai idia gari bada herea. Iuda taudia ese hanua ibounai dekena amo kohu idia abia, davana bada kohudia.
15 Idia ese danu boromakau bona mamoe idia naria noho taudia edia palai rumadia idia hadikaia ore, bona mamoe bona kamelo momo idia abia lao. Unai neganai Iuda taudia be Ierusalema dekenai idia giroa lou.