29
King Hesekaia, Iuda ena king
1 Hesekaia ese king dagi ia hamatamaia neganai, iena mauri lagani be 25, bona ia be lagani 29 lalonai Ierusalema dekenai ia king. Iena sinana ena ladana be Abaisa, Sekaraia ena natuna hahine.
2 Hesekaia ese Lohiabada ena vairana dekenai ia kara maoromaoro, iena sene tauna Davida ena kara ibounai hegeregerena ia karaia.
Hesekaia ese Dubu Helaga ia kehoa lou
3 Iena king lagani ginigunana ena hua ginigunana lalonai, Hesekaia ese Lohiabada ena Dubu Helaga ena iduaradia ia kehoa lou, bona ia hanamodia lou.
4 Ia ese hahelagaia taudia bona Levi taudia ia boiridia, Dubu Helaga dekenai do idia mai, vadaeni magu idia hagegea ariara dekenai idia ia haboua, Dubu ena dina ia daekau kahanai.
5 Vadaeni Hesekaia ese idia dekenai ia hamaoroa, ia gwau, “Levi taudia e, lau dekenai umui kamonai! Umui ese sibona do umui hahelagaia, bona Lohiabada, emui sene taudia edia Dirava ena Dubu Helaga do umui hahelagaia. Gabu helagana idia hamiroa gaudia ibounai do umui abia lao murimurina dekenai.
6 Badina be iseda tamadia ese Lohiabada kamonai henia kara idia negea. Idia ese Lohiabada, iseda Dirava, ena vairanai idia kara dika, idia ese Lohiabada idia rakatania, bona edia vairadia be Lohiabada ena noho gabuna dekena amo idia giroa siri, Dubu Helaga matauraia kara idia rakatania unai.
7 “Dubu ena dehe iduaradia danu idia koua, bona lamepa ibounai idia habodoa, muramura mai bonana idia gabua lasi, bona gabua bouboudia idia henia lasi, Israela ena Dirava ena Dubu Helaga lalonai.
8 Unai dainai, Lohiabada ena badu be Iuda bona Ierusalema edia latanai ia ginidae. Bona Lohiabada ese idia ia hadikaia dainai, Iuda bona Ierusalema be taunimanima edia vairanai gari bona hoa bona hemarai gauna idia halaoa vadaeni, umui sibona emui matana dekenai umui itaia noho inai.
9 Iseda tamadia be tuari dekenai idia mase vadaeni. Iseda adavadia bona natudia be mai guia danu tuari taudia ese idia abidia lao vadaeni.
10 “Harihari lau ura ita ese Lohiabada, Israela ena Dirava danu do ita maino karaia, iena badu mai siahu bada danu, ita dekena amo do ia kokia totona.
11 Egu natuna e, do umui noho kava lasi, badina be Lohiabada ese umui ia abia hidi, iena hesiai gaukara do umui karaia, ia dekenai do umui tomadiho, bona ia dekenai muramura mai bonana namo do umui gabua totona.”
Dubu Helaga dekenai tomadiho gaukara idia haginia lou
12 Vadaeni Levi taudia ese gaukara totona idia toreisi, edia ladadia be inai:
Kohata iduhu dekena amo:
Mahata Amasai, bona Ioela Asaraia.
Merari iduhu dekena amo:
Kisa Abidi, bona Asaraia Iehalelele.
Geresone iduhu dekena amo:
Ioa Sima, bona Edena Ioa.
13 Elisapana iduhu dekena amo:
Simiri bona Ieule.
Asapa iduhu dekena amo:
Sekaraia bona Matanaia.
14 Hemana iduhu dekena amo:
Iehuele bona Simei.
Iedutunu iduhu dekena amo:
Semaia bona Usiele.
15 Idia ese edia tadikakadia idia haboua, bona idia sibona idia hahelagaia. Vadaeni king ese ia hamaorodia hegeregerena, Dubu Helaga idia hagoevaia hamatamaia, Lohiabada ena hereva hegeregerena.
16 Hahelagaia taudia be Lohiabada ena Dubu Helaga ena lalonai momokani idia raka vareai, do idia hagoevaia totona, bona miro ibounai Lohiabada ena gabu helagana lalonai idia davaria be idia abia lao, Lohiabada ena Dubu ena magu ia hagegea ariara gabuna lalonai idia atoa. Vadaeni Levi taudia ese inai miro gaudia ibounai idia abia, hanua ena murimurinai idia abidia lao, Kiderona Sinavai dekenai idia atoa.
17 Inai Dubu Helaga hahelagaia gaukara be hua ginigunana ena dina ginigunana dekenai idia hamatamaia, bona unai hua ena dina namba 8 dekenai idia be Lohiabada ena Dubu ena dehe dekenai idia ginidae. Vadaeni dina ma 8 idia gaukara noho, ela bona Lohiabada ena Dubu ena kahana ibounai be ia goeva bona helaga.
18 Levi taudia be king Hesekaia dekenai idia raka vareai, idia gwau, “Ai ese Lohiabada ena Dubu Helaga ai hagoevaia vadaeni, bona gabua bouboudia ena patana, mai ena kohu ibounai danu, bona paraoa helagana ena patana, mai ena kohu ibounai danu.
19 Kohu ibounai, King Ahasa ese ia king neganai, bona ia kara dika neganai ia negea gaudia, be ai ese ai abidia hegaegae, bona ai hahelagaia vadaeni. Idia ibounai be edia gabudia dekenai idia noho, Lohiabada ena boubou patana ena vairanai.”
20 Vadaeni king Hesekaia ese daba maragi neganai ia toreisi, hanua ena tau badadia ibounai ia haboua, bona Lohiabada ena Dubu Helaga dekenai idia daekau lao.
21 Idia ese boromakau tau 7, bona mamoe tau 7, bona mamoe natudia 7, bona nanigosi tau 7 idia abia vareai, boubou gaudia do idia lao, kara dika dainai, basileia totona, Dubu Helaga totona, bona Iuda taudia totona. Hesekaia ese hahelagaia taudia, Arona ena bese taudia ia oda henia, idia ese unai boubou gaudia be Lohiabada ena boubou patana ena latanai do idia henia.
22 Vadaeni idia ese boromakau tau idia alaia mase, bona hahelagaia taudia ese boromakau edia rarana haida idia abia, boubou patana ena latanai idia negea. Bona mamoe tau idia alaia mase, bona mamoe edia rarana haida be boubou patana ena latanai idia negea. Mamoe natudia danu idia alaia mase bona edia rarana haida be boubou patana ena latanai idia negea.
23 Unai neganai nanigosi tau, kara dika boubou totona gaudia, be king bona hebou taudia dekenai idia mailaia, bona idia ese edia imadia be nanigosi edia latanai idia atoa.
24 Vadaeni hahelagaia taudia ese nanigosi idia alaia mase, bona edia rarana be taunimanima edia kara dika davana karaia totona boubou gauna idia halaoa, boubou patana latanai. Badina be king ese ia oda vadaeni, unai gabua bouboudia, bona kara dika totona bouboudia, be Israela taudia ibounai dainai.
25 Vadaeni Hesekaia ese Levi taudia be Lohiabada ena Dubu dekenai ia atodia, mai edia botaia auridia, bona gita badadia bona maragidia danu, Davida, bona king ena peroveta tauna Gadi, bona peroveta tauna Natana edia oda hegeregerena. Badina guna unai oda hereva be Lohiabada dekena amo ia mai, iena peroveta taudia ese idia gwauraia.
26 Levi taudia be idia gini, edia imadia dekenai be Davida ena botaia auridia, bona gita danu. Hahelagaia taudia ese danu idia gini, mai edia kibi danu.
27 Vadaeni Hesekaia ese idia ia oda henia, gabua bouboudia be boubou patana dekenai do idia henia. Boubou henia kara idia hamatamaia neganai, Lohiabada hanamoa ane idia abia, bona kibi idia hiriria, bona Davida, Israela ena king, ena gaudia idia botaia bona gadaralaia.
28 Hebou taudia ibounai idia tomadiho, ane abia taudia ese ane idia abia, bona kibi hiriria taudia ese edia kibi idia hiriria. Unai bamona sibona idia karaia noho, ela bona gabua boubou gaudia idia gabua ore momokani vadaeni.
29 Boubou karadia idia ore, vadaeni king Hesekaia bona hebou taudia ibounai idia tui diho, bona idia tomadiho.
30 Unai neganai king Hesekaia, bona lohia taudia ese Levi taudia idia oda henia, Davida bona peroveta tauna Asapa ena Lohiabada hanamoa ane do idia abia. Vadaeni idia ibounai ese mai moale bada danu Lohiabada hanamoa ane idia abia, bona idia tui diho, Dirava idia tomadiho henia.
Taunimanima ese edia boubou gaudia Lohiabada dekenai idia henia
31 Hesekaia ese hebou taudia ia hamaoroa, ia gwau, “Umui sibona umui hahelagaia vadaeni, Lohiabada ena taudia korikori do umui lao totona. Vadaeni do umui mai, emui boubou gaudia, Lohiabada do umui tanikiu henia totona do umui mailaia.” Idia ese Hesekaia ena hereva idia kamonai henia, boubou gaudia, bona tanikiu henia harihari gaudia idia mailaia. Bona lalona namo taudia ese danu gabua ore bouboudia idia mailaia.
32 Gabua ore boubou gaudia, hebou taudia ese idia mailaia, be boromakau tau 70, mamoe tau 100, bona mamoe natudia 200, unai ibounai idia gabua ore, Lohiabada ena.
33 Tanikiu henia harihari gaudia, idia hahelagaia gaudia be boromakau tau ibounai 600 bona mamoe 3000.
34 To hahelagaia taudia be momo lasi unai gabua ore boubou gaudia edia kopina do idia kokia, vadaeni Levi taudia ese idia durua, bona unai gaukara idia haorea. Gabeai hahelagaia taudia haida ma ese sibodia idia hahelagaia unai gaukara totona. Levi taudia edia laloa maoromaoro ese hahelagaia taudia edia laloa maoromaoro ia hereaia, unai sibodia idia hahelagaia kara dekenai.
35 Hahelagaia taudia ese gabua ore bouboudia idia karaia sibona lasi, to maino karaia boubou gaudia, taunimanima idia ania gaudia edia digara danu idia gabua ore. Bona gabua ore bouboudia edia atoa kau uaina bouboudia danu idia bubua ore lao, boubou patana dekenai.
Lohiabada ena Dubu Helaga ena tomadiho gaukara be unai bamona idia hamatamaia lou.
36 Hesekaia bona taunimanima ibounai be idia moale, badina Dirava ese iena bese taudia ia durudia dainai, idia ese unai kara ibounai idia karaia haorea haraga.