32
Asuria taudia ese Iuda idia tuari henia
1 Unai kara murinai, bona unai king Hesekaia ena kara namodia, Lohiabada ia badinaia mai abidadama danu karadia edia murinai, Senakeriba, Asuria ena king ese Iuda ia tuari henia. Ia ese hanua mai edia magudia ia koua hagegea, bona iena tuari taudia ia oda henidia unai hanuadia do idia hadikaia ore.
2 Hesekaia ia diba Senakeriba ese Ierusalema danu do ia tuari henia gwauraia.
3 Vadaeni Hesekaia be iena lohia taudia bona iena tuari biagudia danu idia hereva hebou, Ierusalema ena murimurinai ranu guridia be do idia koua gwauraia, bona idia ese Hesekaia ena laloa idia abia dae.
4 Taunimanima momo herea idia haboua, bona ranu gabudia ibounai, bona sinavai maragina, unai tano ia heau hanaia gaudia, be idia koua. Idia gwau, “Asuria ena king taudia be iniseni idia mai neganai, anina be dahaka ranu momo do idia davaria?”
5 Hesekaia ese mai goada danu Ierusalema ena magu, idia makohia gabudia, ia haginia lou, bona kohoro haida be magu ena latanai ia haginia. Magu ena murimurinai danu be Hesekaia ese magu ta ma ia haginia, bona Milo ena kohoro ia ha-aukaia, Davida ena Hanua lalonai. Hesekaia ese danu tuari gaudia bona kesi momo herea ia karaia.
6 Hesekaia ese tuari biagudia ia abia hidi, idia ese taunimanima do idia biagua. Bona Hesekaia ese hanua ena magu iduara badana ena ariara dekenai taunimanima ia haboua. Ia hereva goada idia dekenai ia gwau,
7 “Do umui goada, do umui boga auka. Asuria king bona iena tuari taudia totona do umui gari lasi, bona idia dainai emui kudoudia do idia manoka lasi. Badina ita dekenai ia noho siahu ese idia edia siahu ia hereaia noho momokani.
8 Asuria taudia edia siahu be taunimanima edia siahu sibona, to iseda siahu be Lohiabada iseda Dirava. Ia ese iseda tuari lalonai ita ia durua noho.” Vadaeni taunimanima edia lalodia idia goada, Hesekaia ena hereva dainai.
Senakeriba ese ia oda henia, Iuda taudia be iena siahu henunai do idia lao
9 Senakeriba, Asuria ena king, mai ena tuari taudia ibounai danu, ese Lakisi hanua idia koua hagegea neganai, ia ese iena hereva gwauraia taudia Ierusalema dekenai ia siaia lao, Hesekaia, Iuda ena king, bona ia danu idia noho Iuda taudia ibounai dekenai, idia gwau,
10 “Senakeriba, Asuria ena king, be inai bamona ia hereva: ‘Dahaka dekenai umui abidadama henia noho, vadaeni umui ese Ierusalema umui ha-aukaia noho?
11 Hesekaia ese umui ia hamaoroa Lohiabada emui Dirava ese aiemai siahu dekena amo umui do ia hamauria, to Hesekaia ese umui ia koia noho. Umui be hitolo bona ranu mase dekena amo do umui mase ore.
12 Inai Hesekaia ese Lohiabada ena ataiai idia noho tomadiho gabudia bona ena boubou patadia ia hadikaia ore, bona ia ese Iuda bona Ierusalema taudia ibounai ia oda henia, boubou patana tamona sibona ena vairana dekenai do idia tomadiho, bona iena latanai sibona, edia boubou do idia gabua ore.
13 “ ‘Umui diba lasi, a, lau bona egu sene taudia ese idau tanodia edia taudia ibounai edena bamona ai hadikadia ore momokani?
14 Unai edia dirava ta ese Asuria ena king dekena amo ia hamauridia diba, a? Vadaeni, umui emui Dirava ese egu siahu dekena amo umui do ia hamauria diba, a?
15 Unai dainai, harihari Hesekaia ese umui dekenai ia gwauraia gaudia do umui abia dae lasi. Iena hereva do umui hamomokania lasi, badina be bese ta o basileia ta edia dirava ta ese edia taudia be egu siahu, o egu sene taudia edia siahu dekena amo idia hamauria diba lasi. Unai dainai, emui Dirava ese egu siahu dekena amo umui do ia hamauria diba, a? Lasi momokani!’ ”
16 Unai Asuria hereva gwauraia taudia ese Lohiabada Dirava hadikaia hereva haida ma idia gwauraia. Idia ese Hesekaia, Lohiabada ena hesiai tauna danu, ma idia hereva dika henia.
17 King Senakeriba ia torea revareva haida danu ese Lohiabada, Israela ena Dirava idia hereva dika henia, idia gwau, “Tano haida edia dirava ese edia basileia taudia be egu siahu dekena amo idia hamauria diba lasi, unai dainai Hesekaia ena Dirava ese iena taudia be egu siahu dekena amo ia hamauria diba lasi.”
18 Unai hereva be Senakeriba ena hereva gwauraia taudia ese mai boiboi bada danu Heberu gado dekenai idia gwauraia, Ierusalema taudia, magu dekenai idia gini taudia, do idia kamonai diba totona. Idia ura do idia hagaridia, bona edia lalodia do idia hamanokaia, hanua do idia abia haraga totona.
19 Idia ese Ierusalema ena Dirava idia herevalaia, tanobada besedia edia dirava, taunimanima edia imadia ese idia karaia gaudia, idia herevalaia hegeregerena.
Lohiabada ese Hesekaia mai ena basileia danu ia hamauria
20 Unai neganai king Hesekaia bona peroveta tauna Isaia, Amoso ena natuna, ese Dirava dekenai idia guriguri, bona durua totona guba dekenai idia tai henia.
21 Unai dainai Lohiabada ese aneru ta ia siaia, vadaeni ia ese Asuria tuari taudia bona edia tuari biagudia danu edia kamepa lalonai ia alaia ore. Unai murinai Asuria ena king be mai hemarai bada danu, Asuria dekenai ia giroa lou. Dina ta Senakeriba ese iena dirava ena dubu lalonai ia tomadiho neganai, iena natuna haida ese unuseni tuari kaia dekena amo idia alaia mase.
22 Unai dala dekenai Lohiabada ese Hesekaia bona Ierusalema dekenai noho taudia be Senakeriba, Asuria ena king, ena siahu dekena amo, bona tuari taudia orea haida dekena amo, ia hamauridia. Lohiabada ese Ierusalema taudia dekenai maino ia henia, edia kahana ibounai dekenai.
23 Vadaeni taunimanima momo ese Ierusalema dekenai idia mai, Lohiabada dekenai bona Hesekaia dekenai harihari gaudia idia mailaia. Bona unai neganai ia lao, bese ibounai taudia ese Hesekaia idia matauraia.
Hesekaia ese gorere ia davaria
24 Unai dinadia lalonai Hesekaia be ia gorere, bona kahirakahira ia mase. Vadaeni ia ese Lohiabada dekenai ia guriguri henia, bona Lohiabada ese ia haere henia, bona toa ta ia henia, do ia namo lou totona.
25 To Hesekaia be mai ena hekokoroku dainai, ia ese Lohiabada ena bogahisihisi totona ia tanikiu henia lasi. Unai dainai Lohiabada ena badu be Hesekaia ena latanai, Iuda bona Ierusalema edia latanai danu.
26 To gabeai, Hesekaia ese iena hekokoroku ia negea, bona ia manau lou, ia bona Ierusalema taudia danu. Unai dainai Hesekaia ena dinadia lalonai, Lohiabada ena badu be idia edia latanai ia ginidae lasi.
Hesekaia ena kohu momo bona mataurai
27 Hesekaia ena kohu be momo, bona taunimanima ibounai ese ia idia matauraia. Ia ese kohu haboua rumadia ia haginia. Idia edia lalonai Hesekaia ese iena siliva bona golo bona davana bada nadidia, bona aniani hanamoa muramura, bona kesi, bona davana bada kohu idauidau ia udaia.
28 Aniani haboua rumadia danu ia haginia, iena uiti bona bali bona uaina bona olive dehoro ia haboua totona. Boromakau rumadia danu ia haginia, ubua gaudia idauidau totona, mamoe koua magudia danu.
29 Hesekaia ese danu hanua haida ia haginia, bona mamoe bona boromakau momo herea ia abidia, badina be Dirava ese iena kohu ia habadaia momokani.
30 Hesekaia ese danu Gihona ena Ranu Lohilohi Gabuna ia koua, bona ranu ena heau be ia ese ia haidaua, vadaeni ranu be Davida Ena Hanua ena dina diho kahanai ia heau diho lao. Hesekaia ese iena kara ibounai lalonai kwalimu ia davaria.
31 To Babulonia lohia taudia ese edia hereva gwauraia taudia idia siaia lao, Hesekaia ena tano dekenai ia vara toa kara ena anina do idia nanadaia totona. Unai neganai Dirava ese Hesekaia ia rakatania, ia tohoa, badina ia ura diba Hesekaia ena lalona be edena bamona.
King Hesekaia ia mase
32 Hesekaia ena kara oredia, bona iena kara namodia edia sivarai be Isaia Amoso, peroveta tauna, ena mata hanai hereva lalonai, bona Iuda bona Israela edia King Edia Sivarai Buka lalonai idia torea vadaeni.
33 Vadaeni Hesekaia ia mase, bona idia ese Davida ena bese taudia edia guria gabuna, ororo maragina badinai gabuna dekenai idia guria. Hesekaia ia mase neganai, Iuda bona Ierusalema taudia ibounai ese idia hanamoa bada. Iena natuna tau Manase, ese Hesekaia ena gabuna dekenai king dagi ia abia.