14
Keristani taudia edia mauri umui gwauraia kerere lasi
1 Iena abidadama ia manoka tauna be do umui abia dae, bona iena kara dainai do umui hepapahuahu henia lasi.
2 Ta be mai ena abidadama, vadaeni gau ibounai ia ania, bona ta ena abidadama ia manoka, vadaeni uma gaudia sibona ia ania.
3 Gau ibounai ia ania tauna ese ania lasi tauna do ia gwauraia kerere lasi, bona uma gaudia sibona ia ania tauna danu ese gau ibounai ia ania tauna do ia gwauraia kerere lasi. Badina be Dirava ese unai tau danu ia abia dae vadaeni.
4 Oi be daika, tau ta ena hesiai tauna do oi gwauraia kerere? Iena Biaguna sibona ese do ia gwauraia ia be maoro o kerere. Bona ia be do ia gini, badina be Lohiabada ese ia haginia diba.
5 Tau ta ia gwau dina ta be ia bada momokani, bona tau ta ia gwau dina ibounai be hegeregere. Tau ta ta ibounai, namona be idia diba momokani edia laloa be maoromaoro.
6 Dina ta ia laloa tauna, be Lohiabada totona ia laloa. Bona aniani ibounai ia ania tauna, be Lohiabada hanamoa totona ia ania, badina aniani totona ia ese Dirava ia tanikiu henia dainai. Bona aniani haida ia ania lasi tauna, ese Lohiabada hanamoa totona ia ania lasi, ia danu ese Dirava ia tanikiu henia.
7 Tau ta lasi ia sibona dekenai ia mauri noho, bona bema tau ta ia mase neganai, ia sibona dekenai ia mase lasi.
8 Bema ita mauri, be Lohiabada dekenai ita mauri, bona bema ita mase, be Lohiabada dekenai do ita mase. Unai dainai ita mauri noho o do ita mase, ita be Lohiabada ena.
9 Badina be Keriso ia mase bona ia mauri lou, mase taudia bona mauri taudia edia biaguna do ia lao totona.
10 To oi, dahaka dainai oiemu varavara tauna oi gwauraia kerere? Bona oi, dahaka dainai oiemu varavara oi gwauraia ia be anina lasi? Badina be ita ibounai Dirava ena Kota henia gabuna ena vairana dekenai do ita gini.
11 Buka Helaga dekenai ia torea hegeregerena, ia gwau:
“Lohiabada ia gwau,
‘Lau be mauri Diravana momokani dainai,
tui ibounai lauegu vairana dekenai do idia tui diho,
bona uduna ibounai ese do idia gwauraia hedinarai lau be Dirava.’ ”
12 Badina be ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.
Kara ta oi karaia lasi Keristani varavara ta do ia moru totona
13 Unai dainai, ita ta ta dekenai do ita gwauraia kerere lasi, to iseda lalona dekenai inai bamona do ita laloa: Iseda varavara tauna ta ena dala dekenai hadikaia gauna ta do ita atoa lasi, iena kara dika havaraia garina.
14 Lohiabada Iesu danu lau hakapua dainai, lau diba momokani, gau ta be ia sibona ia miro lasi. To tau ta ese bema gau ta ia laloa ia be miro, unai gau be ia miro ia dekenai.
15 Bema oiemu aniani gauna dekena amo oiemu varavara tauna ena lalona oi hadikaia neganai, oi be lalokau dalana oi karaia lasi. Keriso be unai tau totona ia mase, vadaeni oi ese oiemu aniani gauna dekena amo do oi hamasea lasi.
16 Bema umui laloa emui kara ta be namo, umui karaia neganai do umui naria namonamo, unai emui kara be tau haida do idia herevalaia ia dika garina.
17 Badina Dirava ena Basileia be aniani gauna lasi o inuinu gauna lasi, to kara maoromaoro, bona maino, bona moale, Lauma Helaga ese ia henia gaudia.
18 Bona Keriso ena hesiai gaukara inai bamona ia karaia noho tauna ese Dirava ena moale bona taunimanima edia hanamoa do ia abia.
19 Unai dainai maino daladia do ita tahua, bona ita ta ta ese iseda bamona ta ta edia abidadama do ita hagoadaia.
20 Dirava ena gaukara do umui hadikaia lasi, aniani gauna totona. Momokani, gau ibounai umui ania diba, to bema tau ta ena lalona oi hakaua kerere, aniani ta oi ania dekena amo, vadaeni oi be oi kerere inai.
21 Dala maorona be inai, vamu do ita ania lasi, uaina do ita inua lasi, bona iseda varavara tauna ta do ita hamorua totona kara ta do ita karaia lasi, unai be ia namo.
22 Namo oi ese oiemu abidadama do oi laloa, oiemu abidadama be oi sibona bona Dirava emui huana dekenai gauna. Bema tau ta ia laloa iena kara ta be ia namo, bona iena lalona ese ia gwauraia unai kara ia kerere lasi neganai, unai tau be ia moale bada.
23 To bema tau ta be ia ania noho gauna dekenai ia daradara neganai, Dirava ese unai tau ia gwauraia kerere vadaeni, badina iena kara be abidadama dekenai ia karaia lasi. Badina be bema kara ta abidadama dekenai ita karaia lasi neganai, unai kara be ia dika.