4
Aberahamo ia maoromaoro iena abidadama dainai
1 Unai dainai aiemai tubuna Aberahamo be edena bamona do ai herevalaia? Dahaka diba ia davaria?
2 Bema Aberahamo be sibona ena kara dainai Dirava ena vairanai ia maoromaoro neganai, ia be ia hekokoroku diba. To ia be Dirava ena vairanai ia hekokoroku diba lasi.
3 Buka Helaga be inai bamona ia hereva, “Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.”
4 Tau ta ia gaukara neganai davana ia abia. Inai davana be harihari gauna lasi, to iena gaukara davana korikori.
5 To tau ta bema ia gaukara lasi, to iena abidadama be, Dirava ese dika taudia ia gwauraia maoromaoro diba, unai tauna be abidadama tauna. Bona Dirava ia gwau, unai bamona tauna ena abidadama dainai, be ia maoromaoro vadaeni.
6 Oibe, taunimanima haida idia noho, Dirava ese edia kara ia laloa lasi, to ia gwau idia be maoromaoro vadaeni. Davida ese inai bamona taudia ia herevalaia, ia gwau idia be mai moale bada danu.
7 Davida ia gwau:
“Edia kerere Dirava ese ia gwauatao,
bona edia dika ia kokia vadaeni taudia be idia moale!
8 Lohiabada ese iena dika ia laloa lasi tauna,
be mai moale danu.”
9 Inai bamona moale be kopina utua taudia sibona idia abia, a? Lasi. Kopina utua lasi taudia danu do idia abia. Buka Helaga ena hereva mani ita laloa lou, ia gwau: “Aberahamo ese Dirava ia abidadama henia, bona iena abidadama dainai, Dirava ia gwau ia be maoromaoro vadaeni.”
10 Edena negai Dirava ese Aberahamo ia gwauraia maoromaoro? Aberahamo ena kopina ia do utua lasi neganai, o iena kopina ia utua murinai? Lasi, kopina utua kara ia do abia lasi neganai, Dirava ese ia gwauraia maoromaoro.
11 Oibe, kopina utua kara ia do abia lasi neganai, Dirava ese Aberahamo ia gwauraia maoromaoro, iena abidadama dainai. Inai murinai, Aberahamo ese kopina utua kara ia abia, inai be Dirava ese ia gwauraia maoromaoro guna ena toana. Unai dainai Aberahamo be kopina idia utua lasi taudia edia tubuna, bema Dirava ese ia gwauraidia maoromaoro, ia dekenai idia abidadama henia dainai.
12 Aberahamo danu be kopina utua kara idia abia taudia edia tubuna, edia kopina idia utua dainai sibona lasi, to badina be Dirava idia abidadama henia, Aberahamo ese ia abidadama henia bamona, kopina utua ia do abia lasi neganai.
Dirava ena gwauhamata ita abia, abidadama dainai
13 Dirava ese Aberahamo bona iena natudia dekenai ia gwauhamata, tanobada ibounai do ia henia idia dekenai. Inai gwauhamata ia henia, ena badina be dahaka? Aberahamo ese Taravatu ia badinaia dainai? Lasi, ia henia badina be Aberahamo ena abidadama dainai, Dirava ese ia gwauraia maoromaoro.
14 Bema Taravatu idia badinaia taudia sibona mo ese Dirava ena gwauhamata gauna idia abia, abidadama taudia edia abidadama be anina lasi. Bona bema inai bamona neganai, Dirava ena gwauhamata be gwauhamata kava.
15 Taravatu ese Dirava ena badu ia havaraia noho. To bema Taravatu be lasi neganai, Taravatu makohia danu be lasi.
16 Unai dainai, Dirava ena gwauhamata be abidadama dainai taunimanima ese do idia abia. Iena gwauhamata be harihari gauna, Dirava ese ia henia, Aberahamo bamona idia karaia taudia ibounai dekenai. Unai be Taravatu idia badinaia taudia sibona lasi, to abidadama taudia danu. Badina be Aberahamo be ita ibounai iseda tamana.
17 Badina Buka Helaga inai bamona ia torea, ia gwau, “Bese momo edia tamana lau ese oi lau halaoa vadaeni.” Inai gwauhamata be ia gini auka noho Dirava ena vairana dekenai. Bona Aberahamo ese Dirava ia abidadama henia. Inai Dirava ese mase taudia ia hamauria lou diba, bona ia ese idia do vara lasi gaudia ia havaraia diba.
18 Aberahamo ia diba lasi edena bamona Dirava ese unai iena gwauhamata gaudia do ia karaia, to ia ese Dirava dekenai ia abidadama henia momokani, daradara ta lasi. Unai dainai ia be bese momo herea edia tamana Dirava ese ia halaoa. Buka Helaga ia torea bamona, ia gwau, “Oiemu bese momo herea momokani do idia vara.”
19 Aberahamo ena mauri lagani be kahirakahira 100, bona iena tauanina be mase gauna bamona. Sara danu ia buruka momokani, bona natuna ia havaraia diba lasi. Aberahamo ese inai ibounai ia laloa, to iena abidadama ia goada noho.
20 Dirava ese unai gwauhamata ia henia dainai, Aberahamo ia laloa daradara lasi. To iena abidadama ia bada dainai, Dirava ese siahu ia henia, unai dainai Aberahamo ese Dirava ia hanamoa henia.
21 Ia diba momokani Dirava ese iena gwauhamata do ia hamomokania.
22 Unai dainai Dirava ese Aberahamo ia gwauraia maoromaoro, iena abidadama dainai.
23 Inai Buka Helaga ena hereva, “Dirava ese Aberahamo ia gwauraia maoromaoro,” be ia sibona totona lasi.
24 Inai hereva be ita totona danu ia torea, badina ita ese Dirava ita abidadama henia, ia ese iseda Lohiabada Iesu ia hatorea isi lou mase dekena amo. Bona Dirava ia gwau inai bamona abidadama taudia be maoromaoro iena vairanai.
25 Dirava ese Iesu ia siaia, iseda dika dainai do ia mase totona, ma ia ese Iesu ia hatorea isi lou mauri dekenai. Inai toreisi lou dekena amo, Dirava ena vairanai ita maoromaoro diba.