12
Hahine bona huala badana
1 Vadaeni hoa kara badana ta guba dekenai ia hedinarai. Hahine ta, iena dabua be dina, bona hua be iena aena henunai ia noho, bona hisiu 12 ese iena kwarana idia hagegea.
2 Ia be rogorogo, bona iena mara be kahirakahira, vadaeni hisihisi dainai ia tai mai boiboi bada danu.
3 Ma hoa kara badana ta guba dekenai ia hedinarai. Huala badana ta, kakakaka gauna, iena kwarana be 7, bona iena doana be 10. Iena kwara gaudia be 7, iena kwarana ta ta edia latanai.
4 Huala ese iena iuna dekena amo guba ena hisiu momo ia daroa, vadaeni tanobada dekenai idia moru. Hisiu ibounai orea toi dekena amo hisiu orea ta ia botaia, idia moru diho. Unai huala ese, unai do ia mara hahine ena vairanai ia gini hegaegae noho. Ia naria noho, ela bona unai hahine ese mero do ia havaraia, ia ese mero do ia ania totona.
5 Vadaeni hahine ia mara, mero ta ia abia. Unai mero ese vaira neganai auri itotohi dekena amo bese ibounai do ia gunalaia. To hahine ia mara, be nega tamona iena mero idia abia daekau Dirava dekenai, bona Dirava ena helai gabuna badana dekenai.
6 Unai neganai unai hahine be taunimanima idia noho lasi gabuna dekenai ia heau lao, Dirava ese ia karaia hegaegae gabuna dekenai ia noho. Unuseni be dina 1260 lalonai unai hahine do idia ubua bona naria.
Guba dekenai tuari ia vara
7 Vadaeni guba dekenai tuari ia vara. Mikaela mai ena aneru momo danu ese huala idia tuari henia. Huala mai ena aneru momo danu ese Mikaela idia tuari henia.
8 To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho.
9 Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.
10 Unai neganai lau kamonai, gado badana guba dekenai ia boiboi, ia gwau, “Harihari iseda Dirava ena hamauria ia ginidae vadaeni. Harihari iena Keriso ese iena siahu ia hedinaraia vadaeni. Badina be unai samania tauna ese Dirava ena vairanai, dina bona hanuaboi, guna ia gini, iseda varavara ia samania, be hari aneru ese idia negea vadaeni. Guba dekena amo ia idia negea diho vadaeni.
11 Iseda varavara ese Mamoe ena Natuna ena rarana dainai, bona iena hereva idia gwauraia dainai, Satani dekena amo idia kwalimu. Bona edia tanobada mauri idia laloa momo lasi, to Keriso dainai edia mauri idia atoa diho.
12 Guba e, bona guba lalonai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”
Huala ese tanobada ia tuari henia
13 Huala ia diba, tanobada dekenai ia idia negea diho neganai, ia ese unai mero ia havaraia hahine ia lulua hamatamaia.
14 To ugava manu ese iena hanina rua unai hahine dekenai idia henia, vadaeni ia ese unai huala dekena amo ia roho lao taunimanima noho lasi gabuna dekenai, iena gabu korikori dekenai. Unuseni lagani toi mai kahana ta do idia ubua bona naria, bona huala ese unuseni do ia hadikaia diba lasi.
15 Vadaeni huala ese hahine ia lulua, bona iena uduna dekena amo ranu ia negea, sinavai ia abata bamona, unai abata ese hahine do ia abia, do ia haboioa ore totona.
16 To tanobada ese hahine ia durua. Tanobada ese iena uduna ia kehoa bamona, unai huala ia negea ranuna, be tanobada ese ia hadonoa ore.
17 Vadaeni huala ese unai hahine ia badu henia dainai, ia lao, hahine ena natuna oredia, idia do noho taudia, ia tuari henia. Unai taudia be inai: Idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai, ma idia badinaia danu.
18 Vadaeni huala ese davara ena kone dekenai ia gini.