6
Mamoe ena Natuna ese buka ena koua toadia 7 ia makohia
Vadaeni Mamoe ena Natuna lau itaia, ia ese buka ena koua toana ginigunana ia makohia, ia kehoa. Bona mauri gaudia 4 edia huanai, idia ta, iena gadona be guba ia boiboi bamona, ia gwau, “Oi mai.” Vadaeni hosi kurokurona ta lau itaia. Hosi dekenai ia guia tauna be mai ena peva. Unai tau dekenai kwara gauna namona idia henia, vadaeni mai goada danu ia lao, do ia kwalimu totona.
Unai neganai Mamoe ena Natuna ese koua toana iharuana ia makohia. Ma mauri gauna iharuana lau kamonai, ia gwau, “Oi mai.” Vadaeni hosi kakakakana ta ia mai. Ia dekenai ia guia tauna be siahu idia henia, ia ese tanobada dekena amo maino do ia kokia, taunimanima sibodia ta ta do idia alaia mase totona. Unai tau dekenai tuari kaia badana ta idia henia.
Mamoe ena Natuna ese koua toana ihatoina ia makohia. Ma mauri gauna ihatoina lau kamonai, ia gwau, “Oi mai.” Vadaeni lau itaia, hosi koremana ta ia hedinarai. Ia dekenai ia guia tauna ese metau hahetohoa gauna, sikele ta, iena imana dekenai ia dogoatao. Gado ta, mauri gaudia 4 edia huanai dekena amo lau kamonai, ia gwau, “Uiti kilogaram ta sibona be dina ta ena gaukara davana, bona bali kilogaram toi sibona be dina ta ena gaukara davana. To olive dehoro bona uaina be do umui hadikaia lasi.”
Ma Mamoe ena Natuna ese koua toana namba 4 ia makohia. Bona mauri gauna namba 4 lau kamonai, ia gwau, “Oi mai.” Vadaeni hosi ta lau itaia, ena kala be labora bamona. Ia dekenai ia guia tauna ena ladana be Mase, bona Mase Gabuna, Hel, be ia murinai ia lao. Idia ruaosi ese siahu idia abia, vadaeni tanobada ena taunimanima ibounai idia haria kahana 4. Vadaeni kahana ta be idia ese idia biagua. Unai kahana ena taunimanima idia alaia mase, tuari dekena amo, hitolo dekena amo, gorere dekena amo, bona dagedage gaudia dekena amo.
Vadaeni Mamoe ena Natuna ese koua toana namba 5 ia makohia. Pata helagana henunai be mase taudia haida edia lauma idia noho. Inai taudia be guna Dirava ena hereva idia harorolaia, bona mai edia lalona ibounai, inai hereva idia gwauraia hedinarai momokani. Unai dainai haida ese idia dagedage henidia, idia alaia, idia mase. 10 Inai lauma idia boiboi goadagoada, idia gwau, “Siahu Ibounai Lohiabadana, helaga bona momokani, edena negai tanobada taudia do oi kota henia, edia davana do oi henia, aiemai rarana dainai?” 11 Vadaeni idia ta ta dekenai dabua kurokuro idia henia. Ma gado ta ese idia ia hamaoroa, ia gwau, “Do umui laga-ani noho nega sisina, ela bona emui bamona haida bona emui tadikakadia haida do idia alaia mase, umui mase hegeregerena. Bona unai bamona idia mase taudia edia momo be hegeregere neganai, Dirava ese emui rarana ena davana do ia henia.”
12 Mamoe ena Natuna lau itaia, ia ese koua toana namba 6 ia makohia. Vadaeni tano mareremarere bada ia vara, dina danu ia dibura, dabua koremakorema bamona, bona hua be kakakaka, rara bamona. 13 Hisiu danu be guba dekena amo tanobada dekenai idia moru, fig huahua, mage lasi gaudia, lai bada ia toa neganai, fig auna dekena amo idia moru bamona. 14 Guba danu ia lao ore, hegeregere geda idia lokua noho bamona. Ororo bona motumotu ibounai danu edia gabu edia gabu dekena amo idia kokia. 15 Vadaeni tanobada ena king taudia bona lohia taudia, bona tuari biagudia, bona kohu momo taudia, bona goada taudia, bona hesiai mai guia danu taudia, bona ura kwalimu taudia, ibounai be nadi ena kohua dekenai, bona nadi badadia henunai idia hunia, ororo dekenai. 16 Idia ese ororo bona nadi badadia dekenai idia boiboi, idia gwau, “Umui ese aiemai latanai do umui moru diho, ai do umui hunia, helai gabuna badana dekenai ia helai Diravana ena vairana do ai itaia garina. Ai do umui hunia, Mamoe ena Natuna ena badu ese ai do ia abia garina! 17 Badina be idia ruaosi edia badu dinana badana ia ginidae vadaeni, bona daika do ia mauri noho diba?”