11
Davida bona Bataseba
1 Siahu negana be kahirakahira do ia ginidae, bona lagani ibounai, unai be king taudia tuari totona idia toreisi negana. Vadaeni unai neganai Davida ese Ioaba mai ena tuari biagudia bona Israela tuari taudia ibounai ia siaia lao. Bona idia ese Amono taudia idia halusia momokani, bona Raba hanua idia koua hagegea. To Davida be Ierusalema dekenai ia noho.
2 Adorahi ta, Davida be iena mahuta patana dekena amo ia toreisi, iena ruma badana ena guhi dekenai ia raka. Vadaeni guhi dekena amo Davida ese hahine ta ia itaia, ia digu noho. Ia be hahine namona, mai ena hairaina.
3 Davida ese hesiai tauna ia siaia, do ia davaria, unai hahine be daika. Ia davaria ia be Bataseba Elerama, Hiti tauna ladana Uria ena adavana.
4 Davida ese hesiai taudia ia siaia, idia ese hahine idia abia. Bona hahine be Davida dekenai ia mai, Davida ese ia sihari henia. Unai neganai hahine be iena hua gorere dekena amo ia goeva vadaeni. Unai murinai, hahine be iena ruma dekenai ia giroa lou.
5 Gabeai hahine ia davaria ia be rogorogo, vadaeni ia ese hereva ia siaia, Davida ia hamaoroa, ia gwau, “Lau be lau rogorogo vadaeni.”
6 Unai dainai Davida ese hereva ta ia siaia Ioaba dekenai, ia gwau, “Uria, Hiti tauna do oi siaia mai.”
7 Uria be ia dekenai ia ginidae neganai, Davida ese Ioaba bona iena tuari taudia be edena bamona, bona tuari ena sivarai be edena bamona ia nanadaia.
8 Vadaeni Davida ese Uria ia hamaoroa, ia gwau, “Oiemu ruma dekenai do oi lao, oiemu aena do oi huria.” Vadaeni Uria be king ena ruma dekena amo ia diho, bona king ese harihari gauna ta Uria dekenai ia siaia lao.
9 To Uria be king ena ruma ena iduara badinai ia mahuta, iena king ena hesiai taudia ibounai danu, ia be iena ruma korikori dekenai ia lao lasi.
10 Tau haida ese Davida idia hamaoroa, idia gwau, “Uria be iena ruma dekenai ia lao lasi.” Vadaeni Davida ese Uria ia nanadaia, ia gwau, “Badina dahaka oiemu ruma dekenai oi giroa lou lasi, oi be gabu daudau dekena amo oi giroa mai vadaeni?”
11 Uria ese Davida dekenai ia haere, ia gwau, “Israela tuari taudia be tuari gabuna dekenai idia tuari noho, bona Taravatu Maua be idia danu ia noho. Lauegu tuari biaguna Ioaba mai ena taudia be ruma lasi, tano dekenai idia kamepa noho. Lau be egu ruma dekenai do lau lao, do lau aniani, do lau inua, lauegu adavana danu do ai mahuta hebou, a? Lasi, Dirava ena vairanai lau gwauhamata, unai bamona do lau karaia lasi!”
12 Vadaeni Davida ia gwau, “Hari dina dekenai iniseni do oi noho, bona kerukeru oi do lau siaia lou.” Unai dainai, Uria be Ierusalema dekenai ia noho, unai dina bona kerukeru ela bona daba rere.
13 Davida ese aniani totona ia boiria, vadaeni Uria be king ena aniani patana dekenai ia aniani bona ia inua ela bona ia kekero. To unai hanuaboi, iena ruma korikori dekenai ia lao lasi, to iena geda dekenai ia mahuta, king ena hesiai taudia edia mahuta gabuna dekenai.
14 Daba neganai, Davida ese revareva ta ia torea Ioaba dekenai, bona Uria ena imana dekenai ia siaia.
15 Revareva lalonai Davida ese inai bamona ia torea, “Uria be tuari ia auka momokani gabuna dekenai do oi atoa, bona ia dekena amo do oi siri, do idia alaia mase totona.”
16 Vadaeni Ioaba ese hanua ia koua hagegea neganai, ia ese Uria dekenai gabu ta ia henia, ia diba unai be tuari diba momo taudia do idia mai gabuna.
17 Vadaeni unai hanua taudia idia raka mai, Ioaba ena tuari taudia dekenai idia tuari. Ioaba ena opesa taudia haida idia moru, bona Uria, Hiti tauna danu idia alaia mase.
18 Vadaeni Ioaba ese hereva ia siaia, tuari ena sivarai ibounai Davida dekenai ia hamaoroa.
19 Ioaba ese hereva siaia tauna ia hamaoroa, ia gwau, “Tuari sivarai king dekenai oi hamaoroa vadaeni neganai,
20 be sedira do ia badu, oi do ia gwau henia, do ia gwau, ‘Badina dahaka hanua kahirakahira umui tuari noho? Umui diba lasi, idia ese magu dekena amo diba idia pidia, a?
21 Abimeleka Ierubeseta be daika ese ia alaia mase? Hahine ta ese uiti moia nadi ta magu dekena amo ia negea diho ia latanai, bona Tebese hanua dekenai ia mase, ani? Badina dahaka magu dekenai umui lao?’ Unai bamona ia hereva neganai, oi ese inai bamona do oi gwau, ‘Oiemu hesiai tauna Uria, Hiti tauna, danu ia mase vadaeni.’ ”
22 Vadaeni hesiai tauna ia lao, bona ia ginidae neganai, ia ese Ioaba ia hadibaia hereva ibounai be Davida dekenai ia hamaoroa.
23 Hesiai tauna ese Davida ia hadibaia, ia gwau, “Idia ese hanua idia rakatania, idia ese ai idia halusia, to taunimanima noho lasi tano dekenai ai tuari goada, ai luludia lao, ela bona hanua ena ikoukou dekenai.
24 Unai neganai peva taudia ese magu dekena amo diba idia pidia ai dekenai, bona king ena tuari taudia haida be idia mase, oiemu hesiai tauna Uria, Hiti tauna danu ia mase.”
25 Davida ese hesiai tauna ia hamaoroa, ia gwau, “Ioaba be inai bamona do oi hamaoroa, oi gwau, ‘Inai sivarai dainai do oi laloa momo lasi, badina be tuari lalonai ita diba lasi daika bona daika do idia mase.’ Bona Ioaba do oi hamaoroa, oi gwau, ‘Unai hanua do umui tuari henia goadagoada, bona do umui halusia.’ Inai hereva dekena amo Ioaba ena lalona do oi hagoadaia.”
26 Uria ena adavana Bataseba ia kamonai iena adavana ia mase, vadaeni ia totona ia taitai.
27 Taitai dinadia be idia ore neganai, Davida ese hesiai tauna ia siaia, Bataseba ia hakaua mai iena ruma dekenai, vadaeni Davida ese Bataseba ia adavaia. Bataseba ese natuna tau Davida dekena amo ia havaraia. To Lohiabada ese Davida ena kara dainai ia badu.