13
Aminona ese Tamara ia hadikaia
Davida ena natuna Abesaloma be mai ena taihuna ta, ena ladana be Tamara. Ia be kekeni mai hairaina, bona Aminona, Davida ena natuna ta ese Tamara ia ura henia. Aminona ese unai kekeni Tamara ia gahusia dainai gorere ia davaria. Badina ia be mai ena dala ta lasi unai kekeni do ia abia, Tamara be kekeni rami hebou dainai. Kekeni rami hebou be edia bese idia taravatua, tau dekena amo do idia noho siri.
To Aminona be mai ena turana ta, ena ladana be Ionadaba, Davida ena kakana Simea ena natuna. Inai Ionadaba be diba momo tauna. Ia ese Aminona ia hereva henia, ia gwau, “King ena natuna e, badina dahaka dina ibounai oiemu toana be oi gorere bamona? Oiemu lalohisihisi ena badina be dahaka?”
Aminona ese ia haere, ia gwau, “Lauegu tadina Abesaloma ena taihuna lau ura henia noho.”
Ionadaba ese Aminona ia hamaoroa, ia gwau, “Oiemu mahuta patana dekenai do oi hekure, do oi gorere koikoi. Vadaeni oiemu tamana ese oi ia itaia neganai, oi ese ia do oi hamaoroa, oi gwau, ‘Mani emu kara egu taihuna Tamara do ia mai, paraoa lau dekenai do ia henia, lau ania, bona aniani sisina egu vairana dekenai, do ia gabua, lau itaia, bona iena imana dekena amo do lau ania.’ ”
Vadaeni Aminona be ia hekure, ia gorere koikoi, bona king ia mai, ia itaia neganai, Aminona ese king ia noia, ia gwau, “Mani emu kara, egu taihuna Tamara do ia mai, keke rua egu vairana dekenai do ia gabua, bona iena imana dekena amo do lau ania.”
Vadaeni Davida ese hereva ia siaia Tamara dekenai, ia gwau, “Oiemu taihuna Aminona ena ruma dekenai do oi lao, iena aniani sisina do oi karaia hegaegae.” Unai dainai Tamara be iena taihuna Aminona ena ruma dekenai ia lao, ia hekure gabuna dekenai ia raka vareai. Vadaeni Tamara ese paraoa ia hapariparia, ia giroagiroa, Aminona ena vairana dekenai keke rua ia karaia, bona idia ia gabua. Vadaeni Tamara ese keke be paraipani dekena amo ia abia, Aminona dekenai ia henia, to ia ese keke ia ura lasi ania.
Aminona ia gwau, “Taunimanima ibounai do oi siaia lao murimuri dekenai.” Ibounai ese inai hereva idia kamonai, ruma idia rakatania. 10 Vadaeni Aminona ese Tamara ia hamaoroa, ia gwau, “Keke be lau dekenai do oi abia mai, bona oi sibona lau dekenai do oi henia, do lau ania.” Tamara ese keke ia abia, bona Aminona ia hekure gabuna dekenai ia abia lao. 11 To Tamara ese keke ia henia neganai, Aminona ese Tamara ia dogoatao, ia rosia, ia gwau, “Egu taihuna e, oi mai, ita mahuta gabu tamona dekenai.”
12 Tamara ia haere, ia gwau, “Taihugu e, lasi, unai bamona lau dekenai do oi karaia lasi, badina be Israela dekenai unai bamona idia karaia lasi. Inai lebulebu kara do oi karaia lasi. 13 Egu hemarai be edena bamona do lau haorea diba, taunimanima edia vairana dekenai? Bona oi be Israela dekenai lebulebu tauna, oi do idia gwauraia. Unai dainai oi dekenai lau noinoi inai, king Davida do oi hereva henia guna, bona ia ese oi dekenai lau do ia henia, do ita headava.”
14 To Aminona ese Tamara ena hereva ia kamonai henia lasi. Aminona be goada herea, vadaeni ia ese ia veria diho, bona ia fosia, ia sihari henia.
15 Unai kara ia ore, vadaeni Aminona ese Tamara ia ura henia lasi momokani. Iena badu ia dekenai ese iena ura henia gunana ia hanaia momokani. Ia ese Tamara ia oda henia, ia gwau, “Oi lao, iniseni oi noho lasi!”
16 To Tamara ese ia haere, ia gwau, “Egu taihuna e, lasi. Hari oi ese lau dekenai oi karaia ena kerere be maragi, to oi ese lau oi lulua lao ena kerere be bada.” To Aminona ese ia dekenai ia kamonai henia lasi.
17 Aminona ese iena hesiai tauna ia boiria, ia gwau, “Inai hahine be lauegu vairana dekena amo do oi abia siri, bona iena murinai egu ruma ena iduara do oi koua bona lokaia momokani.” 18 Vadaeni hesiai tauna ese Tamara ia atoa murimurinai bona iduara ia lokaia.
Tamara ena dabua be dabua latana, bona imana lata gauna, badina be unai dinadia neganai, king edia natuna ulato rami hebou be unai bamona dabua namo herea idia karaia. 19 To Aminona ese ia lulua lao neganai, Tamara ese lahi ena kahu be iena kwarana dekenai ia atoa, bona unai ia karaia noho dabua namona ia darea, ma iena imana be iena kwarana dekenai ia atoa, bona mai tai danu ia raka lao. Iena tai be mai boiboi bada danu.
20 Vadaeni iena taihuna Abesaloma ese Tamara ia hereva henia, ia gwau, “Oiemu taihuna ese oi danu umui siharisihari, a? Egu taihuna e, do oi tai lasi, badina ia be oiemu taihuna sibona. Do oi laloa bada lasi.” Vadaeni Tamara be Abesaloma ena ruma dekenai ia noho, to ia be mai ena laloa metau momokani.
21 King Davida ese unai kara ibounai ena sivarai ia kamonai, vadaeni ia badu momokani. 22 Bona Abesaloma ese Aminona ia badu henia momokani, iena taihuna Tamara ia hadikaia dainai. Unai dainai Abesaloma ese Aminona dekenai ia hereva henia lou lasi, lasi momokani.
Abesaloma ese Aminona ia alaia mase
23 Lagani rua ia ore murinai, mamoe huina utua taudia ese Abesaloma ena mamoe edia huina idia utua Bala Hasoro dekenai, Eparaima kahirakahira. Vadaeni Abesaloma ese king Davida ena natuna tau ibounai ia boiria mai unuseni. 24 Abesaloma danu be king Davida dekenai ia lao, ia hereva henia, ia gwau, “Lohia e, lau ese egu mamoe edia huina lau utua noho. King e, mani emu kara oi bona oiemu hesiai taudia aria totona do umui mai, ani?”
25 Davida ese ia haere, ia gwau, “Egu natuna, lasi, ai ibounai do ai mai, be hekwarahi bada oi dekenai garina.” Abesaloma ese ia noia lou, noia lou, to king ia ura lasi, to iena hanamoa sibona ia henia.
26 To Abesaloma ia gwau, “Bema oi be do oi mai lasi, mani emu kara, Aminona dekenai maoro do oi henia, aria dekenai do ia mai.”
King Davida ese Abesaloma ia nanadaia, ia gwau, “Badina dahaka oi ura Aminona be oi dekenai do ia lao?”
27 To Abesaloma ese king ia noia lou, noia lou, ela bona Davida ese Aminona, bona iena natuna tau ibounai ia ruhaia, Abesaloma danu idia lao.
28 Vadaeni Abesaloma ese iena hesiai taudia ia oda henia, ia gwau, “Aminona do umui itaia namonamo, ela bona uaina momo ia inua, bona ia kekero. Ia kekero momokani neganai, do lau gwau, ‘Aminona do umui alaia,’ bona unai neganai do umui alaia mase. Do umui gari lasi, badina lau ese umui lau oda henia, ani? Do umui boga auka, bona do umui laloa goada.”
29 Vadaeni Abesaloma ena hesiai taudia ese Abesaloma ena oda hegeregerena, Aminona idia alaia mase. Unai neganai, king Davida ena natuna tau ibounai idia toreisi, idia ta ta ibounai edia doniki idia guia, idia heau.
30 Idia be do dala dekenai idia noho neganai, tau haida ese inai sivarai Davida dekenai idia hadibaia, idia gwau, “Abesaloma ese king ena natuna tau ibounai ia alaia mase, ta ia mauri lasi.” 31 King Davida ia toreisi, iena dabua ia darea, bona tano dekenai iena vairana ia atoa diho. Iena hesiai taudia, unai gabu dekenai idia gini noho taudia danu ese edia dabua idia darea.
32 To Ionadaba, Davida ena tadina Simea ena natuna ia gwau, “Egu king e, idia ese oiemu natuna tau ibounai idia alaia lasi, to Aminona sibona ia mase vadaeni, Abesaloma ena oda dainai. Inai kara ena badina be inai: Abesaloma ena taihuna Tamara be Aminona ese ia hadikaia negana, ia mai bona hari, Abesaloma ia ura Aminona do ia alaia mase. 33 Unai dainai, egu lohia bona king e, do oi hamomokania lasi oiemu natuna tau ibounai idia mase. Lasi, to Aminona sibona ia mase.”
34 To Abesaloma be ia heau. Vadaeni unai neganai, tuari tauna ta, hanua ia gimaia noho tauna ese iena matana ia negea, taunimanima momo be Horonaimi dalana dekena amo idia mai noho, ororo kahana dekena amo.
35 Vadaeni Ionadaba ese king Davida ia hamaoroa, ia gwau, “Umui itaia, king ena natuna be idia mai noho vadaeni, lau, oiemu hesiai tauna lau gwauraia hegeregerena.”
36 Iena hereva ia doko neganai Davida ena natuna idia ginidae, vadaeni idia tai hamatamaia, mai boiboi bada danu. King Davida danu, mai iena hesiai taudia ibounai be idia tai bada herea.
37 Abesaloma be ia heau, Talemai Amihuda, Gesuru ena king dekenai ia lao.
To Davida be dina ibounai iena natuna Aminona totona ia tai.
38 Abesaloma be ia heau murinai, Gesuru dekenai lagani toi lalonai ia noho. 39 Davida ena taitai Aminona totona ia ore neganai, ia ese Abesaloma dekenai ia laloa lou, bona ia ura bada Abesaloma be do ia giroa mai.