*
भजन-संहिता 3
दाऊद के एक भजन। जब ओह अपन बेटा अबसालोम करा ले भागत रिहिस।
हे यहोवा, कतेक जादा हवंय मोर बईरीमन!
कतेक मनखेमन मोर बिरोध म ठाढ़ होवत हें!
बहुंते झन मोर बारे म कहत हें,
“परमेसर ह ओला नइं बचाय।”
 
पर हे यहोवा, तेंह मोर चारों कोति एक ढाल अस,
तेंह मोर महिमा अस, अऊ तेंह मोर मुड़ ला ऊंचहा करथस।
मेंह यहोवा ला जोर से पुकारथंव,
अऊ ओह अपन पबितर पहाड़ ले मोला जबाब देथे।
 
मेंह लेटथंव अऊ सुत जाथंव;
मेंह फेर जागथंव, काबरकि यहोवा ह मोला संभालथे।
मेंह ओ हजारों-हजार मनखेमन ले नइं डरंव,
जेमन चारों कोति ले मोर ऊपर हमला करथें।
 
हे यहोवा, उठ!
हे मोर परमेसर, मोला बचा!
मोर जम्मो बईरीमन के जबड़ा म मार;
अऊ दुस्टमन के दांत ला टोर दे।
 
छुटकारा यहोवा ही देथे।
हे यहोवा, तोर आसीस तोर मनखेमन ऊपर होवय।
* भजन-संहिता 3: इबरानी म 3:1‑8 ला 3:2‑9 गने गे हवय