भजन-संहिता 8
संगीत के निरदेसक बर। गित्तीथ के मुताबिक दाऊद के एक भजन।
1 हे यहोवा, हमर परभू,
तोर नांव ह जम्मो धरती म का ही परतापी ए!
तेंह अपन महिमा
स्वरग म ठहिराय हस।
2 लइका अऊ छोटे लइकामन के दुवारा परसंसा करवाके
तेंह बईरी अऊ पलटा लेवइयामन ला चुप कराय बर
ओमन के बिरूध एक गढ़ बनाय हस।
3 जब मेंह अकास ऊपर बिचार करथंव,
जऊन ह तोर हांथ के काम ए
चंदा अऊ तारामन,
जेमन ला तेंह अपन-अपन जगह म रखे हस,
4 त मनखे ह का ए कि तेंह ओकर ऊपर धियान देथस,
मानव-जाति ह का ए कि तेंह ओकर खियाल रखथस?
5 तेंह ओला स्वरगदूतमन ले थोरकन कम करके बनाय हस
अऊ ओला महिमा अऊ आदर के मुकुट पहिराय हस।
6 तेंह ओला अपन हांथ के काममन के ऊपर राज-करइया बनाय हस;
तेंह हर एक चीज ला ओकर गोड़ खाल्हे कर दे हस:
7 जम्मो भेड़-बकरी अऊ गाय-बईला,
अऊ जंगल के पसु,
8 अकास के चिरई,
अऊ समुंदर के मछरी,
अऊ ओ जम्मो जीव-जन्तु, जेमन समुंदर के पानी म रहिथें।
9 हे यहोवा हमर परभू,
तोर नांव ह जम्मो धरती म का ही वैभवसाली अय।