5
स्याणागोळी अदिक नवयुवकगोळी बातणी
1 नीम दा जो स्याणा आन, ना आंदुर घाई स्याणा अदिक मसीह अन दुखगोळ्द गवाह अदिक प्रगट आगावाळा महिमा दा सहभागी आगकु आंदरी ईद समझुसतीन.
2 कि परमेश्वर उन आ झुण्ड इन, जो नीम्द न्याड्या दा आद रखवाली माळी; अदिक दबाव देल ईला लेकीन परमेश्वर उन इच्छा अन अनुसार खुशी देल, अदिक कमाई इन लालच साटी ईला लेकीन मन हचकु.
3 जो लॉकुर नीम्द देखरेख इन साटी सौप्सकु आग्यार, नीव आंदुर मा अधिकार जतुसबाळी, बल्की झुण्ड इन साटी ऊंद आदर्श बन्सी.
4 याग प्रधान रखवाला प्रगट आदान, रा नीमी महिमा अन मुकुट कोटकु आदीत यदुर्द चमक यागलु खतम आगाल.
5 ईदा प्रकार हे नवयुवकगोळा, नीव भी तान स्याणागोळ्द हात्ती ईरी, अदिक नीव सप्पा च्या सप्पा आबुर दाबुर स्यावा माळोर साटी विनम्रता धारण माळी, यतिकी शास्त्र दा लिख्सकु आद, “परमेश्वर अभिमानीगोळ्द विरोध माळतान, लेकीन नम्र लॉकुर मा अनुग्रह माळतान.”
6 इदुरसाटी परमेश्वर उन बलवन्त कय इन ल्यालमा दीनता देल ईरी, यदुर देल आव नीमी उचित समय मा वाळुसुल.
7 तान सप्पा चिन्ता आऊन मा हाक बुळी, यतिकी आऊक नीम्द ध्यान आद.
8 सचेत आगी, अदिक जाग्सतेला ईरी; यतिकी नीम्द दुश्मन शैतान गरजुसतेला हुल्ल इन घाई ईल अल ओयाळतेला ई ताक दा ईरतान कि यारीक हरकु तिनुल.
9 विश्वास दा मजबूत आगकु, अदिक ईद जान्सकु आऊन सामना माळी कि नीम वार्टुर जो दुनिया दा आर हिंग अच दुख झेलसेत्यार.
10 ईग परमेश्वर जो सप्पा अनुग्रह अन दाता आन, याव नीमी मसीह दा तान अनन्त महिमा अन साटी कारदुन, नीम्द थ्वाळासा समय ताका दुख नेगदुर बाद्दा खुद अच नीमी सिद्ध अदिक संची अदिक बलवन्त माळ्यान.
11 आऊंदा साम्राज्य हमेशा हमेशा ईरूल. आमीन.
आखरी अभिवादन
12 ना नीमी ऊंद संक्षिप्त चिट्ठी सिलवानुस उन सहयोग देल लिख्सदीन, यारी ना विश्वासलायक मसीह वार्ट मान्सतीन. ना नीमी प्रोत्साहित माळोद चाहसतीन अदिक नांद गवाही कोळतीन जो परमेश्वर उन सही अनुग्रह हुन, ईदुर दा संची ईरी.
13 जो बेबीलोन दा नीम्द घाई निवळुस्द मंडली इन लॉकुर, आंदुर नीमी नमस्कार अनतार अदिक मसीह दा नान पार मरकुस उन भी नीमी नमस्कार.
14 मसीह दा प्यार पुर्ण भाव देल आबुर दाबुर इक कुतक्या हुडुकु नमस्कार माळी.
नीमी सप्पा मुंदरी, जो मसीह दा आईर, शांती सिकतेला ईरूल.