1 इदुरसाटी हे नान वार्टुरा, प्रभु दा खुश ईरी. अव अच मातगोळ नीमी घळी घळी लिख्सली नानी रा येनु तकलीफ आगाल, अदिक ईदुर दा नीम कुशलता आद, 2 नायगोळ से सावधान ईरी, आ बेकार क्याल्सा माळावाळेर से सावधान ईरी, आ काट कूट माळावाळेर से सावधान ईरी. 3 यतिकी खतनावाळेर रा नाव अच हुयेव जो परमेश्वर उन आत्मा अन्द अगुवाई देल उपासना माळतेव, अदिक मसीह यीशु मा घमण्ड माळतेव, अदिक मय मा भरोसा ईटालेव. 4 लेकीन ना रा मय मा भी भरोसा ईट सकतीन. अगर यारारा दुसरा अक मय मा भरोसा ईटोद विचार आगुल, रा ना आऊन से यक्कुल ईट सकतीन. 5 ✡आठवा दिशी नान खतना आत, इस्त्राएल इन वंश अदिक बिन्यामीन इन गोत्र नव हुईन; इब्रानिगोळव इब्रानी हुईन; व्यवस्था अन्द बारा दा अगर अंदीर रा फरीसी हुईन. 6 ✡उत्साह अन्द बारा दा अगर अंदीर रा मंडली इन सतुसावाळा; अदिक व्यवस्था अन्द न्यायीपन इन बारा दा अगर अंदीर रा निर्दोष ईरीन. 7 लेकीन जो जो मातगोळ नान फायदा नव ईरव, अवरीका ना मसीह अन्द कारण नुकसान सम्स कोंडीन. 8 उलटा ना तान प्रभु यीशु मसीह अन्द पयचान इन उत्‍तमता अन्द कारण सप्पा मातगोळी नुकसान सम्सतीन. यदुर कारण ना सप्पा वस्तुगोळ्द नुकसान नेगदीन, अदिक अवरी काळी कचरा सम्सतीन, यदुर से ना मसीह अक हासिल माळाईन 9 अदिक अदुर दा ना सिक्कु आगुल; ना कि तान अद न्यायीपन इन सांगुळ, जो व्यवस्था देल आद, उलटा आ न्यायीपन इन सांगुळ जो मसीह मा विश्वास माळदुर कारण आद अदिक परमेश्वर दी टु विश्वास माळदुर मा सिकतद; 10 ताकी ना अदरी अदिक अदुर्द मृत्युंजय इन सामर्थ्य अक, अदिक अदुर सांगुळ दुखगोळ दा सहभागी आगोद मर्म इक जान्साईन, अदिक आऊन मृत्यु उन समानता अक हासिल माळाईन. 11 कि ना यातोदारा भी रीति देल सोत्‍तुर दा टु जित्‍ता आगोद पद ताका पोहचुसाईन.

12 ईद मतलब हैलेच कि ना ईग हासिल माळ कोंडीन, या सिद्ध आगेगिन; लेकीन आ पदार्थ अक हुडोर साटी ओळ्त होगतीन, यदुर साटी मसीह यीशु नानी हुळदिदुन. 13 हे वार्टुरा, नान ईद भावना हैलेच कि ना हासिल माळ कोंडीन; लेकीन सिर्फ ऊंद क्याल्सा माळतीन कि जो मातगोळ हिंद ईतोग्याव अवरी मारूकु, मुंदळव मातगोळ दी वाळुसतेला, 14 निशाना दी ओळ्त होगतीन, ताकी अद ईनाम हासिल माळाईन यदुर साटी परमेश्वर नानी मसीह यीशु दा म्याकुच कारदान. 15 नाम दा टु यास सिद्ध आर, ईदा विचार ईटुल, अदिक अगर यातोदारा मात दा नीम दुसरा अच विचार ईरूल रा परमेश्वर अदरी भी नीम मा प्रगट माळ बुट्टान. 16 इदुरसाटी यल ताका नाव पोहचुसेव, अदुर्दा अनुसार नळदेव. 17 ✡हे वार्टुरा, नीव सप्पा मुंदुर मिलुसकु नान घाई व्यवहार माळी, अदिक आंदरी पयचान दा ईटी जो ई रीति मा नळुतार यदुर उदाहरण नीव नाम दा नोळतीर; 18 यतिकी हापाळ सा हिंग व्यवहार माळतार, यार्द चर्चा ना नीम से घळी घळी माळीन, अदिक ईग भी वर्ल वर्लकु अनतीन कि आंदुर तान चाल-चलन देल मसीह अन्द क्रूस देल दुश्मनी माळावाळेर उर. 19 आंदुर अन्त विनाश आद, आंदुर मय व्हाट्टा हुन, आंदुर तान शरम इन मातगोळ मा विचार माळतार अदिक पृथ्वी इन वस्तुगोळ मा महिमा हचकु ईरतार. 20 लेकीन नाम स्वदेश स्वर्ग मा आद; अदिक नाव ऊंद उद्धारकर्ता प्रभु यीशु मसीह अन्द अल टु बरोद हादी कायेतेव. 21 आव तान शक्ति इन आ प्रभाव इन अनुसार यदुर द्वारा आव सप्पा वस्तुगोळी तान वश दा माळ सकतान, नाम दीन-हीन मय इन रूप बदलुसकु, तान महिमा अन्द मय इन अनुकूल माळ बुट्टान.