प्रकाशितवाक्य यूहन्ना के द्वारा
प्रकाशितवाक्य यूहन्ना अन्द द्वारा
परिचय
प्रकाशितवाक्य अन ई किताब व्हाशोद नियम इन आखरी किताब हुन अदिक अद आखरी दा लिख्सकु आग्याद प्रेरित यूहन्ना यीशु उन जनम इन बाद्दा इसवी सन ९५ इन हात्तीपास लिख्सकु आग्याद. १:१ अदिक आवा यूहन्ना रचित खुशखबरी अदिक यूहन्ना अन्द किताब १, २, ३ लिखस्यान. ईवा यूहन्ना अक लॉकुर यार मा यीशु उन प्यार ईरोद हिंग माताळकु अरू तोगोर यूहन्ना १३:२३ यीशु मसीह अन खुशखबरी इन पातमा हेसुर इन टापू मा याग सजा कडोन आग आव ईद किताब लिखस्यान. प्रकाशितवाक्य १:९
ईद किताब लिखसोद हींद यूहन्ना अन्द ईद उद्देश ईरोद की नानोर वाचुसावाळेर इक यीशु उन सांगुळ विश्वास दा ईरोरसाटी हिम्मत कोळोद अदिक यीशु उन मात्त वापस बरोद हात्ती ईरोद इदुरसाटी आऊंदा आशा निर्माण माळी. १:३२२:७ आव सप्पा विश्वासीगोळ इक ईद चिट्ठी लिख्सदुन विशेष माळकु येळ मंडली इक लिख्सदुन यऊर्द उल्लेख अध्याय २३ दा सीकतद, यूहन्ना खुद इन लिखावट इक परमेश्वर उन दी टु बंदाद बातणी, भविष्यवाणी हिंग हेळतद. अदिक जो मातगोळ इक आव खुद नोळदुन आ मातगोळ्द वर्णन अद अलंकारी शब्द देल मीलुसतद ईद जो किताब आद ईद हाळोद नियम इन भागगोळ देल मीलता जुलता आद. विशेष माळकु जकर्याह ६:१-८ आयातगोळ से अदुर्द समानता आद हांग अच येळ तुतारी अदिक येळ कटोरा ईव परमेश्वर मिस्त्र दा तंदुन आ दुखगोळ घाई आव. निर्गमन ७:९ प्रकाशितवाक्य आखरी दिनगोळ्द वर्णन माळतद. आखरी दा यीशु विजयी ह्यांग आदान अदिक आऊन मा विश्वास ईटावाळेर आऊन सांगुळ अनन्त काल ताका ह्यांग जीवीत ईत्तार हिंग आव हेळतान ईद किताब इन द्वारा नीमी शक्ति सिकुल अदिक यीशु उन दुबारा बरोर साटी नीमी आशा सिकुल.
रूप-रेखा
१. यूहन्ना सुरूवात दा खुद इन पयचान माळकु आऊक भविष्यवाणी ह्यांग हासिल आत ईद हेळकु सुरूवात माळतान प्रकाशितवाक्य १:१-२०
२. यीशु उन दी टु येळ मंडली इक मुंद सिक्द बातणी यूहन्ना कोळतान. प्रकाशितवाक्य १:१–३:२२
३. बाक आव येळ सिक्कागोळ्द बारा दा हेळतान प्रकाशितवाक्य ४:१–८:५ अदिक येळ तुतारीगोळ्द वर्णन माळतान. ८:६–११:१९
४. ईदुर बाद्दा यूहन्ना ऊंद स्याण पार येळ ताल्लावाळा हाव सांगुळ ह्यांग लळाई माळतान ईद हेळतान. १२:१–१४:२०
५. ईदुर बाद्दा यूहन्ना सिट्ट इन कटोरा अन बारा दा लिख्सतान १५:१–१६:१८
६. ईदुर बाद्दा परमेश्वर आऊन आकाश दाकळोर दुश्मनगोळ मा ह्यांग विजय हासिल माळतान ईद हेळतान. प्रकाशितवाक्य १७:१–२०:१५
७. जो व्हाशोद स्वर्ग अदिक व्हाशोद पृथ्वी आखरी दा बंदीत अदुर्द वर्णन माळतान. प्रकाशितवाक्य २१:१–२२:२१
1
1 यीशु मसीह अन्द प्रकाशितवाक्य, जो आऊक परमेश्वर इदुरसाटी कोटान कि तान दासगोळी आ मातगोळ, यऊर्द राटनेरी आगोद जरूरी आद, तोरसुल; अदिक आव तान स्वर्गदूतगोळ इक कळुकु आऊन द्वारा तान दास यूहन्ना अक हेळदुन,
2 यूहन्ना परमेश्वर उन वचन अदिक यीशु मसीह अन्द गवाही, मतलब जो येनारा आव नोळीदुन अदुर्द गवाही कोट्टुन.
3 धन्य आन आव जो ई भविष्यवाणी इन वचन इक वाचुसतान, अदिक आंदुर जो केळतार अदिक इदुर दा लिख्सद मातगोळी मान्सतार; यतिकी समय हात्ती आद.
येळु मंडलीगोळ्द अभिवादन
4 यूहन्ना अन्द दी टु आसिया अन्द येळ मंडलीगोळ्द हेसुर:
आऊन दी टु जो आन अदिक जो ईरोन अदिक जो बरावाळा आन; अदिक आ येळ आत्मागोळ दी टु जो आऊन सिंहासन इन मुंद आन,
5 अदिक यीशु मसीह दी टु जो विश्वासयोग्य गवाह अदिक सोत्तुर दा टु जीत्ता आगावाळेर दा पयला अदिक पृथ्वी इन राजागोळव न्यायाधीश हुन, नीमी अनुग्रह अदिक शांती सिकतेला ईरूल.
आव नाम से प्यार ईटतान, अदिक आव तान रक्ता अन द्वारा नामी पापगोळ देल बिळसुस्यान,
6 अदिक नामी ऊंद राज्य अदिक तान आप्प परमेश्वर उन साटी याजक भी माळ बुट्टुन; आऊंदा महिमा अदिक पराक्रम हमेशा ईरूल. आमीन.
7 नोळी, आव बादलगोळ सांगुळ बरावाळा आन, अदिक हर ऊंद कण्ण आऊक नोळीत, उलटा यार आऊक छेद केळदीदुर आंदुर भी आऊक नोळ्यार, अदिक पृथ्वी इन सप्पा जाती आऊन कारण याद्दा बळदार. हव. आमीन.
8 प्रभु परमेश्वर, जो आन अदिक जो ईरोन अदिक जो बरावाळा आन, जो सर्वशक्तिमान आन, ईद अनतान, “ना अच पयला अदिक आखरी हुईन.”
यूहन्ना अक मसीह अन्द दर्शन
9 ना यूहन्ना, जो नीम वार्ट अदिक यीशु उन क्लेश अदिक राज्य अदिक धीरज दा नीम सहभागी आईन, परमेश्वर उन वचन अदिक यीशु उन गवाही इन कारण पतमुस हेसुर इन टापू दा ईरीन.
10 ना प्रभु उन दिन आत्मा दा होटबंदीन, अदिक तान हिंद तुरही घाई धोळ्द शब्द ईद अनतेला केळदीन,
11 “जो येनारा नी नोळत्या अदरी किताब दा लिख्सकु येळु मंडलीगोळ्द हात्ती कळुबुळ, मतलब इफिसुस, स्मुरना, पिरगमुन, थुआतीरा, सरदीस, फिलदिलफिया, अदिक लौदीकिया अक.”
12 आग ना आऊक, जो नान से माताळोन, नोळोर साटी तान मार्रा तिर्गुसदीन; अदिक हिंद तिर्गकु ना व्हान्ना अन्द येळ दिंग्या ईटोद जागा ऊंद जागा नोळदीन,
13 अदिक आ दिंग्या ईटोद जागा अन्द न्याड्या दा मंळसा अन पार उन घाई ऊंद आरी इक नोळदीन, जो काल ताका फळक्या हाक्कु, अदिक याद्दा मा व्हान्ना अन्द पट्टा कटकु ईरोन.
14 आऊन ताल्ला अदिक चुट्टी बिळेव ऊन बल्की पाला अन घाई चमकदार ईरव, अदिक आऊन कण्णगोळ बेक्की इन ज्वाला अन्द घाई ईरव.
15 आऊन कालगोळ वळ्लीद पीतळा अन घाई ईरव जसा हिंग हतव कि भट्टी दा सेक्सकु आग्याव, अदिक आऊन शब्द हापाळ नीर इन आवाज इन घाई ईरोद.
16 आव तान ऊम्मा कय दा येळ तारा हुळकु ईरोन, अदिक आऊन बाय देल तेज येढ्ढ धार इन तलवार होळतोगोद. आऊन मार्रा हिंग प्रज्वलित ईरोद, ह्यांग सुर्य भर बिसुल इन समय चमकुसतद.
17 याग ना आऊक नोळदीन रा आऊन कालगोळ मा मुर्दा घाई बिदोदीन. आव नान मा तान ऊम्मा कय ईटकु अंदुन, “अंजबाळ; ना पयला अदिक आखरी अदिक जीवता हुईन;
18 ना सोतोगीदीन, अदिक ईग नोळ ना हमेशा हमेशा जित्ता आईन; अदिक मृत्यु अदिक अधोलोक इन चाबीगोळ नान दा हात्ती आव.
19 इदुरसाटी जो मातगोळ नी नोळ्या अदिक जो मातगोळ आगेत्याव अदिक जो मातगोळ ईदुर बाद्दा आगव आव, अव सप्पा मातगोळी लिख्स कोम.
20 मतलब आ येळ तारागोळ्द भेद नी अवरी नान ऊम्मा कय दा नोळीद, अदिक आ येळ व्हान्ना अन्द दिंग्या ईटोद जागा अन्द भेद: अव येळ तारा येळु मंडलीगोळव स्वर्गदूत हुव, अदिक अव येळ दिंग्या ईटव जागा येळ मंडलीगोळ हुव.