11
Đawit Jah Broq Bùa da Is-ra-ên
1 Dìq ca mangai Is-ra-ên lam trùh ta Đawit ta Hêprôn doi: “Nhèn cô oh daq ìh.
2 Adroi nèh jò Saulò ŏi broq bùa, ìh raq mangai ma wèq cwìang ta jàn Is-ra-ên. Chuaq, Boc Plình da ìh khoi doi ca ìh: Ìh phai wèq gòm jàn Is-ra-ên, aih jàn Au. Ìh mangai ma wèq cwìang ta jàn Is-ra-ên, aih jàn Au.”
3 Jò aih dìq ca craq da Is-ra-ên trùh ti Đawit ta Hêprôn. Đawit wêh jao ti wì haq enh ngìa ca Chuaq ta Hêprôn. Wì xùt dàu padèch Đawit tŏc broq bùa Is-ra-ên, troq tiaq bàu Chuaq khoi doi cwa Sa-mu-ên mangai capoch thai Boc Plình.
Đawit Blah Yŏc Jê-ru-sa-lem
4 Đawit wa dìq ca jàn Is-ra-ên hlài ta Jê-ru-sa-lem, aih Jêbu, nòi mangai Jê-bu-xit 'nang ŏi.
5 Mangai Jêbu doi ca Đawit: “Ìh ùh jah mùt ta pagia cô.” Mahaq Đawit blah yŏc đôn hanình Jê-ru-sa-lem, aih raq phôq da Đawit.
6 Đawit doi: “Mangai leq jêh 'blêq jàn Jê-bu-xit adroi baxèm, haq jah broq cwan, jah broq gàu.” Jôap, con calô Xê-ru-ia, haq mangai adroi ma lam jêh, 'màng aih haq jah broq gàu.
7 Đawit ŏi hloi ta đôn hanình taiq 'màng aih jah doi, phôq Đawit.
8 Đawit ha'naoq hlài dìq ca gùng ma dudan ca phôq aih, enh Milô wìh hlài kenh aih, èh Jôap ha'naoq hlài dìq nòi ma 'noiq ta phôq.
9 Đawit rai èh rai dêh, ma jah 'màng aih Chuaq ma wèq dìq ca 'bình plình ŏi ti haq.
Mangai Can Dêh da Đawit
10 Cô 'bài cwan ma tanuq can dêh da Đawit; wì haq mangai ma wiang wèq wa broq ca taneh Diac da Đawit jah dêh, xam dìq ca jàn Is-ra-ên padèch Đawit broq bùa tiaq bàu Chuaq khoi doi adroi ca Diac Is-ra-ên.
11 Cô hiniq mangai lình tanuq tiaq Đawit:
Ja-sô-bê-am, con calô da Hac-mô-ni, cwan mangai khoi wê jaoq jêh 'blêq 300 ngai ta mòiq yàng tajêh poh.
12 Ma tìa, i Ê-li-a-xa, con calô Đôđô ŏi ta A-hô-a; haq hadai mangai ŏi ta piq ngai jah doi mangai tanuq.
13 Haq ŏi ti Đawit ta Pha-đa-mim jò lình Phi-li-tin tagop dabau đòiq tajêh poh. Ŏi ta aih i mòiq toq đùng 'mau mat; dìq ca mangai lình cadàu mot ca lình Phi-li-tin.
14 Mahaq haq cô yòng ta'ne đùng taneh, tajraq hlài wa jêh 'blêq lình Phi-li-tin. 'Màng aih, Chuaq am wì haq jah ta'blêq càn.
15 Piq ngai ŏi ta 30 ngai cwan ma broq gàu loh ta nòi i mòiq toq hmu càn A-đu-lam đòiq glàm Đawit. Jò aih lình Phi-li-tin 'nang đòiq traiq ŏi ta thòng Rê-pha-im.
16 Jò cô Đawit 'nang ŏi ta đôn hanình, mahaq lù lình da Phi-li-tin 'nang ŏi ta 'Bêt-lê-hem.
17 Đawit croh ranŏng haq doi: “Ùac aiq jò cô i cabô 'ràng ca au diac enh adràm da 'Bêt-lê-hem.”
18 'Màng aih wì piq ngai cô lam cwa traiq mangai Phi-li-tin, yŏc diac enh adràm diac da 'Bêt-lê-hem, ahlài ca Đawit. Mahaq Đawit ùh waq ôq; haq ùc diac enh ngìa ca Chuaq,
19 Haq doi: “Waiq xìn Boc Plình padràng au broq bìac cô. Au ôq mahem wì cô 'mòh? Ma jah 'màng aih wì haq khoi cađac dèh can rìh đòiq yŏc diac ca au!” 'Màng aih, Đawit ùh ôq.
Cô bìac wì piq ngai can dêh khoi broq.
20 A-bi-sai, oh Jôap, cwan broq gàu 30 ngai. Haq khoi wê jaoq jêh 'blêq 300 ngai, 'màng aih haq hadai i 'bang tìang tìah ca wì piq ngai aih dìq.
21 Haq jah padèch yi hnao ca wì Piq Ngai phàn baiq tau wa jah wìa mangai broq gàu ca wì haq, mahaq haq ùh dàng ca wì Piq Ngai phàn mòiq ma 'noiq.
22 Bê-nai-a, con calô Jê-hô-a-đa ŏi ta Cap-xê-ên, haq mangai lình tanuq, jah bàc 'bang tìang càn. Haq mangai ma jêh cachìt baiq ngai con calô da A-ri-ên, mangai Moap. I mòiq hì ma 'noiq jò i twiac clìh, haq loh ta mòiq còp hmu jêh cachìt mòiq toq baco hlari.
23 Haq hadai jêh mòiq ngai mangai Aicàp ca'nhòng 2,3 hagat wa ta tì haq hadai i wê mòiq toq jaoq gàn haq toq long xia atenh bai. Bê-nai-a wê long đòiq tajêh ca mangai aih. Haq jah yŏc jaoq ta tì mangai Aicàp wa jêh hlài cla mangai aih.
24 Aih bìac da Bê-nai-a, con calô Jê-hô-a-đa, khoi broq; haq hadai i 'bang tìang tìah ca wì piq ngai i can dêh.
25 Ta lù wì Piq Jàt Ngai tau, haq hadai jah padèch, mahaq haq ùh dàng ca wì Piq Ngai tau. Bùa Đawit thê haq wèq lình ma gòm rap bùa.
26 Hiniq 'bài lình ma can dêh aih:
A-sa-ên, oh Jôap;
Ên-ha-nan, con calô da Đôđô, mangai 'Bêt-lê-hem;
27 Samôt, mangai Harôn;
Hêlêt, mangai Phalôn;
28 Ira, con calô da Ikêt, mangai Tê-cô-a;
A-bi-ê-se ŏi A-na-tôt;
29 Si-bê-cai ŏi Husa;
Ilai ŏi A-hô-a;
30 Ma-ha-rai ŏi Nê-tô-pha;
Hêlêt, con calô da Ba-a-na ŏi Nê-tô-pha;
31 Itai, con calô da Ribai ŏi Ghi-bê-a, con xau Bên-ja-min;
Bê-nai-a ŏi Phi-ra-thôn;
32 Hurai ŏi Na-ha-lê Ga-ach;
A-bi-ên ŏi A-ra-ba;
33 Ach-ma-wêt ŏi Ba-hu-rim;
Ê-li-a-ba ŏi Sa-an-bôn;
34 Bê-nê-ha-sem ŏi Ghixôn;
Jô-na-than, con calô da Sagê ŏi Hara;
35 A-hi-am, con calô da Saca ŏi Hara;
Ê-li-pha, con calô da Urò;
36 Hêphê ŏi Mê-kê-ra;
A-hi-ja ŏi Phalôn;
37 Hêtrô ŏi Catmên;
Na-a-rai, con calô da Êbai;
38 Jôên, oh Nathan;
Mi-bê-ha, con calô da Hagri;
39 Xêlec mangai Amôn;
Na-ha-rai ŏi Bê-ê-rôt, mangai wê ranac tajêh da Jôap; con calô da Xê-ru-ia.
40 Ira ŏi Itrit;
Garep hadai ŏi Itrit;
41 Uria mangai Hêtit;
Xabat, con calô da Aclai;
42 A-đi-na, con calô da Sixa, mangai Rubên; haq con ramua da hadròng hadrech Rubên; i 30 ngai tiaq haq.
43 Hanan, con calô da Ma-a-ca;
Jê-hô-sa-phat ŏi Mêthen;
44 Uxia ŏi Ach-ta-rôt;
Samah wa Jê-i-ên, con calô da Hôtam ŏi A-rô-e;
45 Jê-đi-a-ên, con calô da Simri wa Jôha,
oh haq mangai Thisit;
46 Ê-li-ên ŏi Ma-ha-wim;
Jê-ri-bai wa Jô-sa-wia, con calô da Ên-na-am;
Gitma mangai Moap;
47 Ê-li-ên, Ôbêt wa Ja-a-si-ên, mangai Bêt-sô-ba.