11
Baiq Ngai Mangai Anoi Hlài
1 I mòiq ngai am ca au mòiq toq long tìah ca long wêh, hi khoi doi ca au: “Yòng beq, wêh hnem cùh waiq Boc Plình wa ca'bŏng cùh waiq, wa rèn 'bài mangai ma cùh waiq ŏi ta aih.
2 Khoi èh xàn enh gùng ca hnem cùh waiq apaq wêh, ma jah 'màng aih xàn enh gùng khoi am ca wì jàn Diac 'noiq; wì haq jah tràm jôiq phôq hadròih aih 42 khê.
3 Au am ca wa baiq ngai hapŏng 'yoh Au i cwìang itai. Wa lam anoi hlài bìac loq adroi 1.260 hì; wa haq caxùnh eo xam bai briang.”
4 Wa baiq ngai ma anoi hlài, aih baiq toq long ôliu wa baiq toq jènh đen yòng enh ngìa ca Chuaq da crŏng taneh.
5 Tàng i mangai leq enh jêh wa, èh i ùnh enh hacùng wa haq caprôh loh bùh đac mangai git 'bŏn aih; 'màng aih, mangai leq ma enh jêh wa haq, haq phai 'bìq jêh cachìt 'màng aih.
6 Wa haq i cwìang clenh plình đòiq ùh i ca mè jò wa anoi hlài bàu loq adroi. Wa haq i cwìang itai broq diac wìa mahem, broq bìac 'mèq ranàc ŏi crŏng taneh jò leq, hi mac ca wa haq enh broq toq leq yàng, xôq jah.
Baiq Ngai Mangai Anoi Hlài 'Bìq Jêh
7 Jò wa haq anoi hlài khoi gêh, i ngè yat tŏc enh hàm jrùq, tabroq tajêh ca wa haq, èh jêh cađac wa.
8 Hanang wa haq ŏi ti trong da phôq Jê-ru-sa-lem, hadai jah creo phôq aih Sôđôm loq Aicàp (taiq wì jàn aih ngang dù). Phôq aih raq nòi Chuaq da wa haq khoi 'bìq tiang đình ta long pagat.
9 Wì mangai rìm nòi, rìm bàu capoch, rìm hadròng, wa rìm Diac jah hnoq hanang wa haq piq hì 'ne, ùh thê wì catùh hanang aih.
10 Wì mangai ŏi crŏng taneh bùi lem hnoq bìac cô, wì hi bùi ca dabau, gòi bìac am dech ca dabau taiq baiq toq ngai cô ma anoi bàu loq adroi, khoi broq ca wì mangai ŏi crŏng taneh chìuq xalep.
Baiq Ngai Mangai Anoi Hlài Rìh Hlài
11 Mahaq atìq ca piq hì 'ne aih, i hòi rìh enh Boc Plình mùt ta wa; wa haq padinh yòng. Wì ma ngan hnoq wa haq 'màng aih yùq crè dìq ca jaq.
12 Wa haq tàng bàu dêh enh plình doi ca wa: “Tŏc ta cô beq!” Wa tŏc ta plình ŏi ta yùc; wì ma git ca wa dìq hnoq wa.
13 Adrình ca jò aih, taneh dalàc dìq jaq, mòiq phàn mòiq jàt phôq càn cô raliang, taclìh. 7.000 mangai cachìt ca taneh dalàc aih. 'Bài mangai ma ŏi rìh, dìq jaq wì yùq crè, hi khoi dèch can 'ngah 'ngai am ca Boc Plình ŏi ta plình.
14 'Mèq ranàc ma baiq khoi dìq; ngan cô, 'mèq ranàc ma piq renh trùh.
Ken Yàng Tapèh Hlôi
15 'Bình plình ma tapèh hlôi ken, i bàu ma dêh creo 'noh enh plình doi:
“Pàng cô taneh diac ma ŏi crŏng taneh
khoi wìa Diac Chuaq bèn wa Diac da Crich Haq,
Haq jah wèq cwìang hloi hloi!”
16 Baiq jàt pôn ngai craq broq gàu ma ha'ngui ta gèq bùa enh ngìa ca Boc Plình, dìq bla-op hadrò ta taneh cùh waiq Boc Plình, doi:
17 “Ôi Chuaq Boc Plình ma I Cwìang Itai Dìq Dŏng,
Ìh manàiq i, wa khoi i enh nèh,
ma jah 'màng aih Ìh i cwìang càn caiq đòiq wèq cwìang
càn dŏng dìq rìm bìac.
18 Wì rìm Diac loh nòih,
mahaq can nòih da Ìh khoi trùh,
jò Ìh hadrah mangai cachìt khoi trùh,
jò khoi trùh đòiq 'noh bìac baha ca wì hapŏng 'yoh Ìh,
aih mangai capoch thai Boc Plình,
wa 'bài mangai hadròih,
wa dìq ca mangai 'yoh wa mangai càn ma khoi loq iu hiniq Ìh,
hadai khoi trùh jò Ìh jêh cađac wì mangai ma raliang cađac crŏng taneh.”
19 Jò aih hnem cùh waiq Boc Plình ŏi ta plình khoi pèh, hi khoi hom wêh jao da Chuaq jah hnoq ŏi ta hnem cùh waiq Haq, i camlet 'lìch 'lìch, i atêh dêh, i plình cađah, i taneh dalàc, i mè preo ma càn loh enh plình.