15
Bìac Hnoq Ŏi Ta Diac Plình
1 Èh au hnoq mòiq teo halac càn ma 'noiq hòm ŏi ta plình, i tapèh 'bình plình wê tapèh toq bìac 'mèq ranàc ma atìq lùch, ma jah 'màng aih nhò tapèh toq 'mèq ranàc aih, can nòih da Boc Plình khoi dìq.
2 Au hnoq diac raxìq tìah ca gùang xenh alôn ca ùnh. 'Bài mangai ma khoi ta'blêq ca ngè yat, dua 'mù haq wa sôq da hiniq haq, yòng ti 'bò diac raxìq tìah ca gùang, tì wì haq wê broc da Boc Plình.
3 Wì haq calêu 'bŏi calêu Môise, hapŏng Boc Plình, wa 'bŏi calêu Trìu Con, doi:
“Ôi Boc Plình, Chuaq I Cwìang Itai Dìq Dŏng,
Bìac Ìh ma broq dìq jaq càn wa halac!
Ôi Bùa da rìm 'nhòng,
Trong da Ìh ta-atoq wa joq 'nàng.
4 Waiq Chuaq, mangai leq ma ùh loq iu
wa dèch can 'ngah 'ngai am ca Ìh?
Ma jah 'màng aih toq Ìh raq ma hadròih,
rìm Diac èh lam trùh cùh waiq enh ngìa ca Ìh,
ma jah 'màng aih bìac broq ta-atoq
da Ìh khoi jah pa'noh loh.”
5 Khoi èh au hnoq traiq hnem cùh waiq khoi pèh ŏi ta Diac Plình, aih hnem traiq cùh waiq Boc Plình.
6 Tapèh 'bình plình loh enh Hnem Cùh Waiq aih, wê tapèh toq bìac 'mèq ranàc, wì caxùnh eo broq xam bai habùac hreo wa 'ngah; rada wì haq i caxi càt broq xam wang.
7 Mòiq ngè rìh ŏi ta pôn ngè rìh ma crài, am ca wì tapèh 'bình plình tapèh toq doi chrŏng ùc bình can nòih Boc Plình ma rìh halình hloi hloi.
8 Dìq ca hnem cùh waiq i nhòi loh taiq can 'ngah 'ngai lem lình wa cwìang itai da Boc Plình. Ùh i ca mangai leq jah mùt ta hnem cùh waiq adroi ca tapèh bìac 'mèq ranàc da tapèh 'bình plình 'nhòq broq gêh.