19
Calêu Manè Jò Ba-bi-lôn Raliang
1 Atìq ca bìac cô, au tàng bàu dêh da mangai bàc pajùm ŏi ta plình, doi:
“Ha-lê-lu-ya!
Bìac dèch claih, bìac 'ngah 'ngai lem lình wa cwìang itai dìq ŏi ta Boc Plình da bèn.
2 Bìac hadrah da Haq dìq jaq ta-atoq wa joq 'nàng.
Haq khoi hadrah gu cadrì tango anang càn caiq
khoi lah broq amùa ca crŏng taneh xam bìac tango da haq.
Boc Plình baxa chau haq taiq haq khoi broq ta-ùc mahem 'bài hapŏng Boc Plình!”
3 Wì haq doi yàng ma baiq hòm:
“Ha-lê-lu-ya!
Nhòi loh enh ùnh ma bùh haq pan tŏc hloi hloi.”
4 Baiq jàt pôn ngai craq broq gàu wa wì pôn ngè rìh hacùn cràng cùh waiq Boc Plình đang ha'ngui ta gèq bùa. Wì doi:
“Amen. Ha-lê-lu-ya!”
5 I bàu enh gèq bùa doi:
“Phai manè apôi Boc Plình beq,
dìq ca pì hapŏng Haq
ma loq iu loq crè ca Haq,
'nhac ca 'yoh loq càn.”
6 Au tàng i bàu mangai bàc tìah ca atêh diac còi càn, tìah ca plình catô ma dêh, doi:
“Ha-lê-lu-ya!
Ma jah 'màng aih Chuaq, Boc Plình bèn,
Haq ma i cwìang itai dìq dŏng, 'nang wèq cwìang.
7 Bèn phai bùi lem, bùi lem dìq jaq hi broq 'ngah 'ngai Haq,
ma jah 'màng aih hì ta'nèp da Trìu Con khoi trùh,
mai Haq khoi padon dađeh.”
8 Khoi am haq caxùnh eo lem lình hreo xam bai habùac lem,
ma jah 'màng aih bai habùac cô bìac ma lem ta-atoq da 'bài mangai hadròih.
9 'Bình plình doi ca au: “Achìh beq: Am xôq ramŏt ca wì ma khoi akhen trùh caq hiniang lè ta'nèp da Trìu Con”, hi khoi haq doi tam ca au: “Bàu cô bàu joq 'nàng da Boc Plình.”
10 Au bla-op enh ngìa 'bình plình jang jènh haq cùh waiq haq, mahaq haq doi ca au: “Apaq broq 'màng cô; au hadai broq hapŏng troi ìh. Au cô bua ìh wa 'bài oh daq ìh ma wèq bàu anoi hlài da Chuaq Jêxu. Phai cùh waiq Boc Plình, ma jah 'màng aih bìac anoi hlài bàu Chuaq Jêxu, aih raq bàu da mangai capoch thai Boc Plình.”
11 Èh au hnoq plình tapèh, hi khoi au hnoq i mòiq toq axêh taboc. Haq ma còi axêh aih, hiniq Haq: Wèq Dèh Manoh wa Bàu Joq 'Nàng. Haq yŏc bìac ta-atoq đòiq hadrah wa tabroq tajêh.
12 Mat Haq tìah ca pla ùnh, gàu Haq côi bàc cadoh bùa, wa i achìh mòiq hiniq ta Haq, enh gùng ca Haq ùh i ca mangai leq ma loq.
13 Haq caxùnh eo khoi lùac ta mahem, hiniq Haq jah padèch doi: “Bàu Boc Plình.”
14 'Bài cwung đôiq ŏi ta plình dìq caxùnh bai habùac lem, taboc wa hreo, còi axêh taboc tiaq Haq.
15 Enh hacùng Haq loh mòiq pla chang gùm hin, Haq yŏc đòiq jêh baxa rìm jàn, èh “Haq jah yŏc long dùi xam mem wèq cwìang wì;” Haq jah jôiq padit plì nho ta hàm, aih plì nho da can nòih ramòt da Boc Plình ma i cwìang itai dìq dŏng.
16 Ta eo cwàn Haq wa ta cataih Haq khoi achìh hiniq:
Bùa enh 'nhèq dìq ca bùa wa Chuaq enh 'nhèq dìq ca chuaq.
17 Èh au hnoq mòiq 'bình plình yòng ta mat mahì, haq dêh bàu creo dìq ca chìm ma pan ta'ne plình wa crŏng taneh, doi: “Trùh ta cô beq, tagop hlài đòiq caq hiniang càn da Boc Plình,
18 đòiq pì caq jam 'bài bùa, 'bài cwan, jam wì i cwìang, jam axêh wa 'bài mangai ma còi axêh, jam 'bài mangai ùh tawac pakènh, wa hapŏng dìch, mangai 'yoh wa càn.”
19 Au hnoq ngè yat wa 'bài bùa crŏng taneh wa cwung đôiq da wì haq, tagop pajùm padon tabroq tajêh ca Haq ma còi axêh wa cwung đôiq da Haq.
20 Mahaq ngè yat aih 'bìq rùp pajùm ti mangai amòng capoch bàu loq adroi ma khoi lah broq bàc bìac halac enh ngìa ca haq, đòiq padô 'nùt 'bài mangai khoi i teo hadro da ngè yat wa cùh waiq dua 'mù haq, hi khoi wa baiq aih ma ŏi rìh, dìq 'bìq hwenh clìh ta 'bau ùnh đang cheo dêh xam dahwèq ngèq ùnh 'nang bùh.
21 'Bài mangai ma ŏi rìh dìq cachìt ca chang gùm loh enh hacùng Haq ma còi axêh, èh dìq ca chìm caq panàc jam wì haq.