5
Sech Canua Ôi rôm i Tapèh Toq Clep Baxìa
1 Au hnoq ŏi ta tì pah 'ma Haq ma ha'ngui ta gèq bùa, i sech canua khoi achìh baiq pah; sech cô khoi baxìa xam tapèh toq clep baxìa.
2 Au hnoq mòiq 'bình plình ma tadêh creo bàu dêh bòch: “Cabô ma tajì đòiq dŏih 'bài clep baxìa wa pèh sech cô?”
3 'Nhac ca ŏi ta plình, ŏi ta crŏng taneh, loq enh 'neq ca crŏng taneh, ùh i ca cabô leq jah pèh wa nui ngan sech cô!
4 Au hmoi ua-ac loh diac mat bàc, taiq ùh i ca mangai leq ma tajì đòiq pèh sech wa ngan sech cô.
5 I mòiq ngai craq broq gàu doi ca au: “Apaq hmoi! Ngan cô, Baco Hlari da hadròng hadrech Juđa, enh riah Đawit, khoi ta'blêq. Haq jah pèh sech canua wa lêh tapèh toq clep baxìa.”
6 Èh au hnoq ŏi ta'ne gèq bùa wa pôn toq ngè rìh wa 'bài craq broq gàu, Trìu Con yòng, tìah ca khoi 'bìq jêh cachìt, i tapèh toq aki, tapèh toq mat, aih patô tapèh Yiang Boc Plình ma Haq khoi thê loh jàp ta crŏng taneh.
7 Trìu Con aih lam trùh yŏc sech enh tì pah 'ma Haq ma ha'ngui ta gèq bùa.
8 Jò Haq bu yŏc sech, wì pôn toq ngè rìh wa 24 ngai craq broq gàu, bla-op ta taneh enh ngìa ca Trìu Con, rìm ngai i wê broc wa abôq wang tah bình jreo xua thùm, aih bàu waiq khàn da wì mangai hadròih.
9 Wì calêu manè 'bŏi ma neo, doi:
“Ìh tajì đòiq yŏc sech,
dŏih 'bài clep baxìa,
taiq Ìh khoi chìuq cachìt
yŏc dèh mahem đòiq rŏt hlài
enh tôiq lôi 'bài mangai rìm nòi, rìm bàu capoch, rìm hadròng, wa rìm Diac ahlài ca Boc Plình,
10 broq ca wì haq jah wìa mangai bùa wa mangai pajàu am ca Boc Plình,
èh wì jah wèq cwìang ŏi crŏng taneh.”
11 Jò aih au ngan, èh tàng bàu bàc 'bình plình wawenh ca gèq bùa, pôn ngè rìh, wa 'bài craq broq gàu, i 10.000 yàng 10.000, wa bàc ngŏng yàng bàc ngŏng,
12 doi bàu dêh:
“Trìu Con ma khoi chìuq jêh cachìt,
tajì yŏc cwìang itai, can padrŏng, khôn rabiaq, can dêh,
đang ca atŏc 'bang can 'ngah 'ngai lem lình wa xôq ramŏt!”
13 Au tàng rìm hiniq ma khoi jah broq loh ŏi ta plình, ŏi ta crŏng taneh, enh 'neq ca crŏng taneh, ŏi ta diac raxìq wa rìm hiniq enh trom ca aih, wì haq doi:
“Xôq ramŏt, can loq iu, 'ngah 'ngai lem lình
wa cwìang itai dìq dŏng jah Haq ma ha'ngui ta gèq bùa,
wa Trìu Con ma rìh hloi hloi.”
14 Wì pôn ngè rìh doi: “Amen.” Baiq jàt pôn ngai craq broq gàu bla-op enh ngìa cùh waiq Haq.