8
Clep Baxìa Yàng Tapèh
1 Jò Trìu Con dŏih clep baxìa ma tapèh, i hatenh 'ne jò đùng hô ta plình.
2 Au hnoq tapèh 'bình plình yòng enh ngìa ca Boc Plình wa i tapèh toq ken khoi am ca wì.
3 I mòiq 'bình plình ma 'noiq trùh yòng pah ca'bŏng cùh waiq wê abôq xam wang. Haq khoi jah nhàn bàc jreo xua thùm, đòiq haq mùt pajùm bàu waiq khàn da wì mangai hadròih ŏi ta ca'bŏng cùh waiq xam wang enh ngìa ca gèq Bùa.
4 I nhòi jreo xua thùm pajùm ca bàu waiq khàn da wì mangai hadròih loh enh tì 'bình plình aih pan tŏc enh ngìa Boc Plình.
5 Khoi ca aih 'bình plình yŏc cachah ùnh ta ca'bŏng cùh waiq tah bình ta abôq, hi hwenh ta taneh, èh i plình cađah, atêh dêh, camlet 'lìch 'lìch, wa taneh dalàc.
6 Wì tapèh 'bình plình wê tapèh toq ken padon hlôi.
Ken Yàng Mòiq Hlôi
7 'Bình plình ma baxèm hlôi, èh i mè preo wa ùnh alôn ca mahem, ùc loh ta crŏng taneh, bùh cađac mòiq phàn piq crŏng taneh, bùh cađac mòiq phàn piq long, bùh cađac dŏng nhat.
Ken Yàng Baiq Hlôi
8 'Bình plình ma baiq hlôi, èh au hnoq cacleq tìah ca mòiq toq wang càn 'bìq ùnh bùh, khoi clìh ta diac raxìq,
9 mòiq phàn piq diac raxìq wìa mahem, mòiq phàn piq ngè bìac ma rìh cachìt wa mòiq phàn piq bong 'bìq raliang đac.
Ken Yàng Piq Hlôi
10 'Bình plình ma piq hlôi ken: I mòiq toq halŏng plình 'nang cheo tìah ca hadrêu taclìh enh plình, halŏng plình aih taclìh ta mòiq phàn piq 'bài cròng diac wa diac tamŏc.
11 Hiniq halŏng aih: “Cachiq Xang”. Haq aih broq mòiq phàn piq diac wìa xang, èh i bàc ngai cachìt taiq wì ôq diac wìa xang aih.
Ken Yàng Pôn Hlôi
12 'Bình plình ma pôn hlôi, broq raliang mòiq phàn piq mat mahì, mòiq phàn piq mat khê, mòiq phàn piq mat halŏng, waq ca mòiq phàn piq mat 'ngah aih loh ca clam clôiq, mòiq phàn piq dahì ùh xreo 'ngah, damang hadai mòiq phàn piq ùh xreo 'ngah.
13 Èh au ngan hi tàng mòiq toq chìm cliang càn pan ta'ne plình creo bàu dêh doi: “Nan xa! Nan xa! Nan xa am ca mangai jàn ma ŏi crŏng taneh, ma jah 'màng aih xôq ŏi i atêh ken da piq 'bình plình padon hlôi èh.”