22
Ƀài pajàu ep hadròeh trong ramènh hadròeh.
1 Chuaq Jêhowa doe ka Môise qmang kô:
2 Doe ka Arôn xam ƀài kon calô haq ep apàm ta ƀài hì ramènh hadròeh da mangai Isorali dèch crài ka au, dôq wì haq ùh hìaq broq amùa ka yiniq hadròeh au: Au kô raq Chuaq Jêhowa.
3 Anoe ka wì haq qmang kô: Rìm qnhòng ma trùh ta bla atìq èh, tàng cabô oe ta xinoe pì xam ta ƀài kon xau pì ma khoe loh ka ùh hruah, thia haten ka ƀài dahwèq hadròeh mangai Isorali dèch crài ka au, mangai aih èh ep qnoh đac khoe enh ngèa au: Au kô raq Chuaq Jêhowa.
4 Yac ka mangai leq ta kon xau da Arôn loh ka bacùn ùh meh chac haq loh ƀài diac hadriang ùh wìa, aih haq ùh jah acaq ƀài dahwèq hadròeh trùh jò khoe jah hruah. Haq aih hanoh loh ka ùh hruah diq tàng haq bèq ngè cleq khoe ùh hruah enh hanang cachìt, enh mangai i diac apô xep,
5 ùh meh bèq ƀài ngè moq ta taneh, ùh meh enh mangai qnoeq broq ka haq loh ka ùh hruah, haq aih èh hadai loh ka ùh hruah diq.
6 Mangai leq bèq ƀài ngè aih hanoh loh ka ùh hruah trùh xèq clam, ùh jah acaq ƀài dahwèq hadròeh, mahaq ep hùm deh chac ta diac.
7 Atìq ka mahì clìh, haq aih hi jah hruah hlài, khoe aih men jah acaq dahwèq hadròeh, aih la dahwèq acaq da haq.
8 Haq ùh khòh acaq ngè cleq ma cachìt đeh ùh meh hanang haq ngè rôm khoe hit, đòeq ùh hìaq loh ka ùh hruah: Au kô raq Chuaq Jêhowa.
9 Qmang aih, wì haq ep wèq ƀài trong au khoe tanap thê, đòeq wì haq ùh hìaq ep pòq yiniq lui, ùh ep cachìt, taiq khoe broq ka ƀài dahwèq hadròeh loh ka ùh hruah: Au kô raq Chuaq Jêhowa broq ka wì haq wìh wìa hadròeh Qmang aih, wì haq ep wèq ƀài trong au khoe tanap thê, đòeq wì haq ùh hìaq ep pòq yiniq lui, ùh ep cachìt, taiq khoe broq ka ƀài dahwèq hadròeh loh ka ùh hruah: Au kô raq Chuaq Jêhowa broq ka wì haq wìh wìa hadròeh Qmang aih, wì haq ep wèq ƀài trong au khoe tanap thê, đòeq wì haq ùh hìaq ep pòq yiniq lui, ùh ep cachìt, taiq khoe broq ka ƀài dahwèq hadròeh loh ka ùh hruah: Au kô raq Chuaq Jêhowa broq ka wì haq wìh wìa hadròeh
10 Ƀài mangai enh gùng ka cadraq cla pajàu ùh i mòeq ngai leq jah acaq dahwèq hadròeh, yac ka tamoe cla pajàu ùh meh yac ka mangai patìh, dìq ùh jah acaq dahwèq hadròeh.
11 Mahaq mangai leq pajàu khoe yŏc bac rot ahlài, xam mangai ma ha-uang ta hnim haq, aih lòh haq jah acaq.
12 Tàng kon cadrì da pajàu yŏc mangai ùh xài pajàu, aih haq ùh jah acaq yac ka dahwèq hadròeh leq.
13 Tàng kon cadrì da pajàu khoe loh ka hadrô ùh meh ŏng haq cađac, ùh i đeh kon, hlài oe dèh ta hnim baq qmang ka jò oe qyoh, aih haq jah acaq dahwèq acaq da baq haq, mahaq mangai qnoeq ùh khòh acaq dahwèq aih.
14 Tàng cabô troq lò acaq đeh ramènh hadròeh aih èh haq ep padreo hlài ka pajàu troq jaq ramènh hadròeh aih, èh ep kop tam moeq phàn padam maneh jaq dahwèq aih.
15 Mangai pajàu apaq paqmèq ka ƀài ramènh mangai Isorali ma tadreo dèch ka Chuaq Jêhowa:
16 Aih la am wì acaq hlài ƀài ramènh hadròeh enh aih broq ka wì pòq hlài deh yiniq lui wì ma khoe broq, wì ep dèch hòm ramènh baxon hlài dèh yiniq lui, majah qmang aih: Au kô raq Chuaq Jêhowa broq ka ƀài ramènh aih hadròeh.
17 Chuaq Jêhowa doe tam ka Môise rameh:
18 Anoe Arôn xam ƀài kon calô haq, hloe xam ka mangai Isorali qmang kô: Yac ka mangai Isorali qnì, ùh meh mangai diac wì rìh oe qne wì haq, jò dèch ramènh bùh ka Chuaq Jêhowa, yac ka đòeq pagêh deh bàu rađeh ma khoe tèu jò waiq khàn qnì, yac ka ramènh manoh cla enh đeh, đòeq waq ka jah dì,
19 aih ep dèch mòeq toq ma calô ùh i qmòe ka xìt habau ma rùp enh calùh ƀo, enh calùh trìu kon ùh meh bubi.
20 Pì paq dèch ma leq ma i xìt i habau, majah qmang aih haq ùh jah dì.
21 Jò mangai leq dèch ka Chuaq Jêhowa ramènh waiq kan catèm xi ƀo loq xi trìu, yac ka dèch đòeq padreo bàu đeh khoe tèu jò waiq khàn, ùh meh ramènh manoh cla enh, đòeq kon ramènh aih jah dì, aih ùh jah i xìt habau. Jò mangai leq dèch ka Chuaq Jêhowa ramènh waiq kan catèm xi ƀo loq xi trìu, yac ka dèch đòeq padreo bàu đeh khoe tèu jò waiq khàn, ùh meh ramènh manoh cla enh, đòeq kon ramènh aih jah dì, aih ùh jah i xìt habau.
22 Pì apaq dèch ka Chuaq Jêhowa mòeq toq kon ramènh leq ma lua mat, tagoh jo, khoe dahit, rahenh, talôq, ùh meh lùa kaq; pì paq rùp ma aih broq ramènh bùh đòeq dèch ka Chuaq Jêhowa ta prang tadreo.
23 Pì khòh rùp mòeq toq ƀo qnì trìu qnì jènh jo haq yôh hrình ùh meh đêq hrình đòeq hubroq kon ramènh loh enh manoh cla enh, mahaq broq kon ramènh hu pagêh deh bàu khoe tèu jò waiq khàn, kon ramènh qmang aih ùh jah dì.
24 Pì ùh jah dèch ka Chuaq Jêhowa kon ramènh leq cleo haq ma padah, dahit ùh meh khoe pah. Pì ùh jah broq bìac kô oe ta taneh diac pì
25 Hadai apaq yŏc enh tì mangai diac wì kon ramènh leq ma khoe qmang aih đòeq broq broq dahwèq dèch ka Boc Plình pì, majah qmang aih haq khoe pi wìa khoe i xìt habau ta chac haq, haq ùh jah dì.
26 Chuaq Jêhowa doe tam ka Môise:
27 Yac ka kon ƀo qnì kon trìu qnì ùh meh kon bubi neo xêh, haq ep oe deh ti kan tapèh hì; mahaq hi trùh hì rahem aih èh haq jah dì đòeq broq ramènh bùh ka Chuaq Jêhowa.
28 Yac ka ƀo kan yac ka trìu kan pì apaq pàc pajùm xam kon haq ta moeq hì.
29 Jò pì dèch ramènh manè apôi aih ep dèch qmang leq đòeq ramènh aih jah dì am da pì.
30 Ramènh aih ep acaq qmòe ta hì aih raq, ùh dùh đòeq rah trùh sroq atìq: Au kô raq Chuaq Jêhowa.
31 Qmang aih, ep wèq rai broq tiaq ƀài ranenh au: Au kô raq Chuaq Jêhowa.
32 Paq broq amùa ka yiniq hadròeh au, aih èh au jah padèch hadròeh qne mangai Isorali: Au kô raq Chuaq Jêhowa broq ka pì jah wìh wìa hadròeh,
33 aih la Mangai ma khoe qnoh pi loh khoe ka gùng Êdip, đòeq broq Boc Plình pì: Au kô raq Chuaq Jêhowa.