41
Anduane Homogohanda Isaraele wali agali haru dai bulebero lenego ogo
1 Ngode Datagaliwabehanda lalu,
Dindi kaundiaha wali agali hameigini tara tara kamiru ti bibahendeme bi nale howa i̱na bi larogo hale hadaba.
Tígua mana tínime bialu harimirunaga kodi deni howa
bi latagi haga bule manda manda bialu hadaba.
Bi ai ibunaga larago henenedabe handami̱ya ina haru mandagi íbu ngoai ho hami̱ya.
2 Mbirali dindi bibahende ibu poragoha wai bialu wayali helonaga
agali ni tagira ibiragohayagi howa dabalu kini heleneyago aiwabe.
Dindi tara tara wiaru ibunaga giha mo ya halu dindi odaruninaga kini hearubi bope helonaga hongo miniyago aiwabe.
Ibunaga wai biagane ayu tibu ne gadele yiagome durumbu dibaradagua dibu budabaga biniru be abalu ale mo wiaruni.
Puyabume widi aeane hilo yalu purogo lagadagua ibunaga danda timurume ti bo purogo lo helene.
3 Ibu ibalu howa geme dindi ela nahe bame puyabu poradagua gerai pialu abaleore ibuwa bo hilo waharagola
tigua mbirale mbira biadai bibe nahe holebira.
4 Mbirale uruni bilonaga mo bia henego ai kabe.
Bambaore howa mbirale odaruni bima ibinigonaga miniha magoyu henego aibe.
I̱ Anduane Homogo i̱nime dindi ogo pigane wabirungi henego ko.
Mani hamaro birangibi nde i̱ Anduane Homogo i̱niore dege haho wiaabo holebero, laya.
5 Wali agali dindi kaundiaha karume mbirale i̱na biniru de hendene ka.
De hondowa uruni ti gi timbuni halu duru lalu ka.
Anigo ti mandagi hole íbu ngoai haragoni.
6 Tigua biamogo bigi bigi bialu tininaga bu mini elahe holenaga mo hongo haga haga bima ibalu kagoni.
7 Irame mbirale wabiaga agali heagome mbirale ngolome wabiaga heagohondo lalu, Í̠na biabe bayale birida, lalu ka.
Bi pupu wulenaga mbirale ngolome wabiaga heagome aeaneru hiru gimbu biaga heagohondo lalu,
Í̠na hiru gimbu bigi biridago bayaleoreda, laga.
Ani wabiai howa gime wabini ogoni dindini ibira howa dodo gingirulo hole bulilono agali mili baga biagohondobi, Bayale birida, lalu
tini hangu hangu mo hongo haga biaga.
8 Anigo Isaraeleali i̱naga biabe biahagaore kamiru tí Yagabanaga hameigini howa i̱nime dabarugoni.
I̱naga nenegeali Abarahama ibunaga aguanaliore tí kamigoni.
9 I̱na tíore dindi kaundiaore howa haru ibirugoni.
Tí dindi gibuni gibuni leneha howa haru halu ibirugoni.
Tí i̱naga biabe biahagaore kami lalu langiru.
I̱nime tíhondo manga howa erembira ngialu ndo tí i̱naga halimulo dabo helarugoni.
10 I̱ tí heba kogonigo tí gi nahe halimu.
Tínaga Ngode Datagaliwabe i̱ore kogonigo mbirale ngaru hondowa gi holene nawi.
I̱nime tí biamogo bialu mo hongo halu holebero.
I̱na ti baya hangu mamage halu i̱ninaga hongo timbuni kogome tínaga waitigi karu bope haga bialu tí pele ngulebero.
11 Marume tíhondo keba halu ti manani haru ibuwa helayagua
tinaga bime tí bope habe nahedane hondowa tini taga timbuni holebira.
Tinaga bi lararuni bame nagalone halu tini mo ko halu homolebira.
12 Marume ti baba wai bialu bo hengeda hole manda bialu karia uruni bame dege halu mo ereba hai holebira.
13 I̱ Anduane Homogo tínaga Ngode Datagaliwabe kogoni.
I̱ni tí heba kogonigo tí mo hongo halu bi ogodagua laro,
I̱na tí biamogo buleberogo gi nahe halimu, laya lene.
14 Anduane Homogo ibugua bi ogodagua laragoni.
Isaraele wali agaliru tí dewa ndo howa hongo nahe kamigo
i̱nime tí haru dai biaga kogome tí biamogo buleberogo gi nahalimu.
I̱ Isaraele wali agalirunaga Ngode Datagaliwabe mini tigabi baya buruguleore howa i̱nime tí mo wialu pele ngiaga kogoni.
15 Tí polene hariga hapai kago hengedope halu pilimulonaga
i̱na tí mo hongo halu widi lini hondo ibira ibira bilo bo taulaga nama mbalape gahenge wiagagobi helolebero.
I̱na ani berogome tínaga hongo daligaorehe howa tígua hari timbuni wedaru bo haealabaga bialu
hari bare ngaru be abalu ale helabehe holeberemi.
16 Tíha genda bu ngaru dabiabi bame be abalu taulo wahagadagua
puyabume yalu pu waholebira.
Tígua tínaga Anduane Homogo i̱ kogonigo i̱nihondo turu taraore holeberemi.
I̱ Isaraele wali agalirunaga Anduane Homogo mini tigabi baya burugule kogonigo tígua i̱naga mini yaraga halu holeberemi, laya.
17 Ibugua lalu, I̱naga wali agali burupale howa iba nolene hai bialu
tí kembobe lebolaho howa i̱ olaramigola
Anduane Homogo i̱nime tínaga bi laramigo hale holebero.
I̱ Isaraele wali agalirunaga Ngode Datagaliwabe i̱ni kogome ti embeda halu yu wanaholebero.
18 Hari bare dindi ko yobi iba nabiraga ngaruha i̱na iba dugualu
dindi ulini ngaruha iba bayale gagaheru uliha dugualu pelolebero.
Dindi ko yobi wali agali nahagaha iba kuyama timbuni ibalu berelolebero.
Dindi iba nabere winiruha iba bayaleru dewa dugualu pelolebero.
19 Dindi ko yobi ogoni wiyagoria ira tamiaru bayale mo anda halu
ira hongohe timbuni tara tara maru mini agasiaru oliberu uruni mo andaho helolebero.
Dindi ko ngaruha ira ira mini yunibabi saibarasabi ira tara tara maru dewabi anda ho helaga bulebero.
20 Ani bidogo hondowa wali agali tigua manda bialu Anduane Homogo i̱na ani biyada manda bulebira.
I̱ Isaraele wali agalinaga Ngode Datagaliwabe mini tigabi baya buruguleore kogome uruni binidane hondolebira, Anduane Homogohanda laya,
lalu Aisaiahanda lene.
Mbirale gime wabiniru ti Ngode Datagaliwabe henene ndo kago ogo
21 Anduane Homogo Isaraele wali agalirunaga kini ibugua ogodagua laya,
Dindi maru ngarunaga mbirale bi pupu wulenaga gime wabiniru-o tí bibahende godi deni howa tínaga bi hale halu dabelo íbu holene nga.
Bi loleberemiru baya hanguore lo manda mandabu yalu godini howa latagi hole ibalimu.
22 Tígua kodi deni howa bamba biniru ogodagua bini lalu iname hale halu irane manda buluma̱ya latagi halimu.
Ani bialu mani bulebiragonagabi ogodagua bulebira lalu laramigo lola harangi ina manda bialu heneneda manda buluma̱ya lalimu.
23 Ani bulebira laramigo henene tagira ibiyagua nde gime wabini biaru heneneore henedalo hondoleberema.
Mbirale gibi mbira birimiyaguabi turubini mbira birimiyaguabi tí heneneore heneda ina manda buluma̱yanaga mbirale mbira bilimu.
Ina gi howa handawa buluma̱yabi tínaga hongo walia halimu.
24 Anigo henene halu tígua uruni ale mbira bibe naheore kamigoni.
Tínibi tígua beramilirubi irane nagalone bame dege ndodabe.
Wali agali urunihondo bi pupu wiaga karubi ti nde nagalone ko ngubi uruni ale dege ka.
25 Agali mbira ni tagira ibiragohayagi howa dabo heledogo.
Agali ogoni ibugua i̱naga mini yaraga haga heago i̱na ibu uyurahayagi howa haru ibulebero.
Agalime todobene be wabule howa dindi waru duguwa geme hengedo tagada baga biagadagua
ogoni ibugua kini bu karu bibahende bo hengedai hole ibiragoni.
26 Ai mbirale bi pupu wulenaga gime wabiniru-o uru ale tagira ibulebira lalu tí mbirali kamiru ariame latagi harimibe.
Tí kamiru aria mbirame bi uruni ale latagi halu mbiwia harimiyagua nde iname ibugua bi heneneore laga ka loleberema.
Anigo tí kamiru aria mbiralime bi uruni lalu mbiwia nahe kamigoni.
Tígua bi uruni latagi henego mbiralime hale nahe dege kagoni.
27 Anduane Homogo i̱na ala Saiono tanoni hearuhondo ogo ale bulebira lalu latagi harugoni.
I̱na agali mbirame bi mana debene Yarusaleme yalu pelo pelarugoni.
I̱na ogodagua labe lalu, Tínaga wali agaliru andaga ibalu kagoni, labe lamirugoni.
28 Mbirale gime wabini wiaruni i̱na handalu koria ti bi mbira layane nahende dege ko.
I̱na tihondo ladai bilonaga bi hale harugolabi mbira ladai nabi dege wia.
29 Mbirale gime wabini uruni tini nagaloneore wuwa
mbirale mbira ema bialu nabulene ale ngaruni de handa nabere.
Ke̱ howa uruni bame agali gime wabini degeme mbirale mbira bibe naheore nga,
lalu Anduane Homogohanda Aisaiaha howa latagi hene.