Nehemaia
Mbuga ogoha gilibu ngarunaga nemandi ogo
Nehemaianaga mbuga ogoni bi irane halu tebira bu̱lu̱ baga bu nga.
Mbira
Pesia dindinaga kini heagome Nehemaiahondo, Yuda wali agali Yarusaleme haruago handayaho hole pu, layagola puwa ibugua Yarusalemenaga pabe podo wiaru biadai bialu hene. Yarusaleme wali agali bayale holebi Ngode Datagaliwabe mo dunini halu lotu lolebi bayuwa haru halu hene.
Mende
Esera ibugua Ngode Datagaliwabenaga Mana lowinigo dagalalu howa wali agalime tininaga ko biyaru lapani henego lo nga.
Tebone
Nehemaia ibu Yuda dindinaga hondo haga howa biabe ogodagua bini lalu te lo nga.
Nehemaiahanda binidangi galone maru bigi binigo manda bibehe uru.
Biabe berolo manda buwa ibugua Anduane Homogonaga andaneha howa bialu haga hene.
Ani buwa ogoni binidagoni Anduane Homogohondo bi laho wiaabo hene ngagoria hendedemagoni.
Bu̱lu̱ baga buwa kuni gilibu ngago (1.1–2.20)
Nehemaia Yarusaleme dai binigo te lo nga. 3.1–7.73
Yarusalemenaga pabe gialo payabu wiaru biadai bini. 8.1–10.39
Ngode Datagaliwabenaga Mana lowinigo dagalayagola wali agali Ngode Datagaliwabe heba habo nalolene bi lowiyago mo gahenge ho dai bini. 11.1–13.31
Nehemaia ibugua biabe maru bigi binidarunaga lo nga.
1
Nehemaiahanda Yarusaleme mitangi bialu Ngode Datagaliwabehondo bi lenego ogo
1 Hagalia igini Nehemaiahanda bi lo winiyago gilibu ngago ogo. Kini mini Adasegesi Pesia dindi mali kira haru hearia ege mini Kisalebe hayagola i̱ Nehemaia Pesianaga dindi tano timbuni Susa wiagoriani hewaria
2 i̱ hamene mbira ibu mini Hanani ibu Yuda dindi howa agali maru heba ibiniya. Ibiyagola i̱na tihondo Yarusaleme dindibi Yu wali agali Babilono garabaya howa dai biyarubi ti abi kabe lalu hale haru.
3 Anidagua hale harugola tigua ladai bialu howa lalu, Wali agali tini dindini daibu hearuni genda timbuniore handalu hea. Isaraele wali agali baba wali agali taratara palu paraparabu hearumebi hondo yoabu waorehe hea, lalu langiya. Yarusaleme dindi ege to̱le̱ pabe bu yandaho heleneyarubi podobaga bialu haraba payaga biarubi arema nabi heda heneyangi howa podobagabu wiaabo hene wia, lalu langiya.
4 Ogonibi ladai biyago hale howa i̱na dugu timbuniore bialu biraabo haru. Tomo nane howa Ngode Datagaliwabehondo bi lalu haru.
Horo maru dara howa dugu bialu tomo nane Ngode Datagaliwabehondo bi lalu haru. Ibuhondo bi larudagoni au laru.
5 Anduane Homogo Ngode Datagaliwabe Dahuliya andaga kego í̠ daliga gibi minime mandabu mibe nahe kegoni. Í̠ gubalini halu í̠na bia laredagua gubalini howa bialu karu baba baya hangu bulebero lalu habo nalolene bi lo wirigo kagoni.
6 Anduane Homogo i̱ handalu i̱na í̠hondo bi larogoni hale habe. I̱na mbiragangibi horombengibi laabo halu Isaraele wali agali í̠naga biabe bia haga biarunaga la halu kogoni. Ina Isaraele wali agalime ko birima lalu i̱na í̠hondo lapani halu langero. I̱ aguanene biarumebi i̱nabi ko timbuni birima.
7 Bambaore í̠naga biabe bia haga Moseseha howa bi mana iname buluma̱ya lamirigo talialu bia nabi harima. Iname í̠na bilimu laridagua nabi erembira ngialu í̠naga deni howa mana ko timbuni bialu harima.
8 Í̠ni Mosesehondo lamialu lalu, Tígua i̱na larodagua ndo birimiyagua dindi taratara tí wali agali maru karuha bo purogo lolebero.
9 Ani berogola tígua ko birimada lalu mini beregedalu i̱na bilimu larudagua birimiyagua dindi gimbuni ngaruha purogolo kamigoni dege i̱ninaga lotu lalu halimulo helarugoria i̱nime haru dai buwa helolebero, lowiri. Anduane Homogo í̠nime bi abale ogonibi lo wiriru mitangi bialu áyu ina biamogo bia.
10 Anduane Homogo-o wali agali uruni ti í̠ninaga wali agali í̠naga biabe bia hagabi biaruya hendedeni. Ani bialu í̠ninaga hongome gini miriru o karuni.
11 Áyu wali agali í̠naga biabe bia haga maru í̠naga mini mo yaraga hole manda buwa í̠hondo bi lalu karunagabi i̱na langerogobi hale habe. Áyu kini biago ibugua dara halu biamogo bilo í̠nime anidagua mo bia habe, lalu lamini.
Horo uruningi i̱ kini biagonaga waini iba yu pu íbu biabe biaga haru.